ប្រភពប៉ូលិសថៃបានឲ្យដឹងថា គ្រាប់បែកមួយគ្រាប់ត្រូវបានគេបោះចូលទៅខាងមុខវេទិកានៃក្រុមបាតុករប្រឆាំងរដ្ឋាភិបាលមកពីសម្ព័ន្ធភាពប្រជាជនដើម្បីលទ្ធិប្រជាធិបតេយ្យនៅក្នុងបរិវេណអគាររដ្ឋាភិបាលថៃ កាលពីវេលាម៉ោងបីកន្លះទាបភ្លឺព្រឹកមិញនេះ។
វរសេនីយ៍ឯកប៉ូលិស លោក Somchai Chueyklin បានប្រាប់កាសែតថា អ្នកតវ៉ាម្នាក់បានស្លាប់ក្រោយពេលយកទៅដល់មន្ទីរពេទ្យ ហើយ១១នាក់ផ្សេងទៀតកំពុងស្ថិតក្នុងស្ថានភាពធ្ងន់ធ្ងរ។
ប្រភពមន្ត្រីប៉ូលិសដដែលបានឲ្យដឹងទៀតថា គ្រាប់បែកនោះគឺជាគ្រាប់ដែលមានកម្លាំងខ្លាំង ហើយប៉ូលិសកំពុងរង់ចាំការត្រួតពិនិត្យដោយក្រុមប៉ូលិសកោសល្យវិច័យ។ ប៉ូលិសនៅពុំទាន់អាចរកឃើញអ្នកវាយប្រហារដោយគ្រាប់បែកនោះនៅឡើយទេរហូតមកទល់ពេលនេះ។
មេដឹកនាំសម្ព័ន្ធភាពប្រជាជនដើម្បីលទ្ធិប្រជាធិបតេយ្យ លោក សុនធិ លីមថុងគុល ដែលបានដឹកនាំបាតុករប្រឆាំងរដ្ឋាភិបាលថៃកាន់កាប់អគាររដ្ឋាភិបាលជាច្រើនខែមកហើយនោះបានចោទថា រដ្ឋាភិបាលជាអ្នកនៅក្រោយការវាយប្រហារនោះ និងបានប្រកាសថា ក្រុមសម្ព័ន្ធភាពរបស់លោកនឹងដឹកនាំមហាបាតុកម្មមួយប្រឆាំងរដ្ឋាភិបាលថៃនៅរសៀលថ្ងៃអាទិត្យ ទី២៣ ខាងមុខនេះ៕