ខ្មែរកម្ពុជាក្រោមម្នាក់ត្រូវបានវៀតណាមវាយស្លាប់
ដោយ សុខ សេរី
2010-09-03
កាលពីពេលថ្មីៗនេះ មានការចោទប្រកាន់ថា គ្រួសារខ្មែរកម្ពុជាក្រោមកំពុងតែរងការរើសអើងក្នុងទម្រង់ផ្សេងៗ គ្នា ប៉ុន្តែឥឡូវនេះ មានប្រជាពលរដ្ឋខ្មែរកម្ពុជាក្រោមម្នាក់បានស្លាប់ និង១១នាក់ទៀតបានរងរបួស។
ព្រះសង្ឃពុទ្ធសាសនាខ្មែរកម្ពុជាក្រោមច្រូតស្រូវនៅក្នុងទឹកដីកម្ពុជាក្រោម (ក្នុងប្រទេសវៀតណាម)
ប្រជាពលរដ្ឋខ្មែរកម្ពុជាក្រោមម្នាក់ បានស្លាប់ និង១១នាក់ទៀត បានរងរបួសនៅក្នុងការព្រួតវាយដោយក្រុមជនជាតិវៀតណាមរាប់សិបនាក់ ប្រើដំបង និងកាំបិត កាលពីថ្ងៃទី២ ខែកញ្ញាថ្មីៗនេះ នៅចម្ការកៅស៊ូមួយ នៅក្នុងខេត្តដុងណៃ ប្រទេសវៀតណាម។
ប្រជាពលរដ្ឋខ្មែរកម្ពុជាក្រោម ដែលបានស្លាប់នោះ គឺមានឈ្មោះ ចៅ ណែត ភេទប្រុស អាយុ២៥ឆ្នាំ ជាកម្មករនៅក្នុងចម្ការកៅស៊ូ បានស្លាប់នៅក្នុងមន្ទីរពេទ្យ នៅក្នុងក្រុងព្រៃនគរ ឬក្រុងហូជីម៉ិញ។
ប្រជាពលរដ្ឋខ្មែរកម្ពុជាក្រោម ១១នាក់ទៀត ជាបុរស បានរងរបួសដោយសារការព្រួតវាយដោយក្រុមជនជាតិវៀតណាមនោះ។
គ្មានប្រភពជាផ្លូវការណាមួយ បញ្ជាក់ឲ្យដឹងអំពីមូលហេតុនៃការព្រួតវាយនោះទេ ប៉ុន្តែប្រភពគ្រួសារជនរងគ្រោះ និងអ្នកភូមិ បានផ្ដល់ព័ត៌មានថា គឺបណ្ដាលមកពីការរើសអើង និងការប្រមាថដល់ប្រជាពលរដ្ឋខ្មែរកម្ពុជាក្រោមទាំងនោះ ដែលញាំងឲ្យមានជម្លោះហិង្សានេះ។
ឪពុករបស់ជនរងគ្រោះដែលស្លាប់ ដែលសុំមិនប្រាប់ឈ្មោះ នៅក្នុងឃុំចូវទ្បាំង ស្រុកស្វាយទង ខេត្តអានយ៉ាង ទឹកដីខ្មែរកម្ពុជាក្រោម បានថ្លែងប្រាប់វិទ្យុអាស៊ីសេរីតាមទូរស័ព្ទនៅថ្ងៃទី៣ ខែកញ្ញា ថា ៖ «គេគុំគួនយើង បានជាគេធ្វើបាបយើងហ្នឹង»។
សាកសព និងអ្នករងរបួស ១១នាក់ នឹងត្រូវដឹកពីក្រុងព្រៃនគរ ឬក្រុងហូជីម៉ិញ មកស្រុកកំណើតវិញ នៅក្នុងខេត្តអានយ៉ាង ឬខេត្តមាត់ជ្រូក នៅថៃ្ងទី៣ ខែកញ្ញា។
ប្រជាពលរដ្ឋខ្មែរកម្ពុជាក្រោម នៅក្នុងឃុំអាងគឺ ស្រុកទិនបៀង ខេត្តអានយ៉ាង ដែលបានដឹងរឿងនេះ បានថ្លែងថា ៖ «វាទៅដើរលេងយប់។ យួនលើគ្នាមកកាប់វា លើកគ្នាអស់មួយភូមិ។ វាកាប់សុទ្ធតែដាវ ពួកវាហ្នឹង។ វាមើលងាយខ្មែរ ឃើញយើងក្រ យើងទៅរកស៊ីអ៊ីចឹង»។
ប្រធានអង្គភាពស៊ើបអង្កេត នៃសមាគមការពារសិទ្ធិមនុស្សខ្មែរកម្ពុជាក្រោម នៅក្នុងប្រទេសកម្ពុជា លោក ថាច់ ឈួនយ៉ាត បានមានប្រសាសន៍ថា អំពើនេះនឹងរីករាលដាល បើសិនណាគ្មានវិធានការទប់ស្កាត់ ៖ «បើសិនណារដ្ឋាភិបាលមិនអាចការពារបាន មិនអាចទប់ស្កាត់រឿងនេះបាន។ នឹងជាកំហុសរបស់រដ្ឋាភិបាលមួយដែរ»។
លោកបានទទូចសុំឲ្យអាជ្ញាធរវៀតណាមចាត់វិធានការណ៍ ចាប់ខ្លួនជនល្មើសដើម្បីផ្ដន្ទាទោសតាមច្បាប់ប្រទេសវៀតណាម៕
អត្ថបទដែលទាក់ទង
សកម្មជនការពារដីធ្លីខ្មែរក្រោម ធ្លាក់ខ្លួនឈឺធ្ងន់
ខ្មែរក្រោមបង្សុកូលលោកឧកញ៉ា សឺន គុយ ក្នុងឱកាសបុណ្យចូលឆ្នាំថ្មី
មេដឹកនាំខ្មែរក្រោមស្នើរដ្ឋាភិបាលអូស្ត្រាលីជួយពិនិត្យមើលការរំលោភសិទ្ធិ
ខ្មែរក្រោមនៅភូមិបែកក្រង់ប្រឈមនឹងការខ្វះទឹកប្រើប្រាស់
មេដឹកនាំខ្មែរក្រោមជួបមន្ត្រីការទូតអាមេរិក
មេដឹកនាំខ្មែរក្រោមជួបមន្ត្រីការទូតអាមេរិក
សិទ្ធិសេរីភាពក្នុងការប្រារព្ធពិធីចូលឆ្នាំខ្មែររបស់ខ្មែរក្រោម
វៀតណាមត្រៀមចាប់ផ្សឹកព្រះសង្ឃខ្មែរថែមមួយអង្គទៀត
ខ្មែរក្រោមជួបមន្ត្រីជាន់ខ្ពស់សហរដ្ឋអាមេរិក
ខ្មែរក្រោមប្រារព្ធខួប៥ឆ្នាំនៃការសុគតរបស់ព្រះតេជព្រះគុណ អ៊ាង សុខធឿន
មតិ
Click here to add your own comment