សាក្សីស្ត្រីទីមួយឆ្លើយបំភ្លឺប្រឆាំង ឌុច នៅសាលាក្ដីខ្មែរក្រហម
ដោយ ឡេង ម៉ាលី
2009-07-09
កសិណសាក្សីជាស្រ្តីលើកទីមួយ ដែលជាអតីតអ្នកទោស បានឡើងបំភ្លឺអង្គជំនុំជម្រះសាលាក្តីខ្មែរក្រហម ប្រឆាំងនឹងជនជាប់ចោទ ឌុច អតីតប្រធានមន្ទីរសន្តិសុខ ស-២១ ឬគុកទួលស្លែង។
សាក្សី ជិន ម៉េត ឆ្លើយបំភ្លឺនៅក្នុងសវនាការនៃសាលាក្ដីខ្មែរក្រហម កាលពីថ្ងៃទី៨ កក្កដា ២០០៩។
ស្ត្រីដើមបណ្តឹងរដ្ឋប្បវេណីមួយរូប គឺអ្នកស្រី ជិន ម៉េត អាយុ ៥១ឆ្នាំ បានប្រាប់អង្គជំនុំជម្រះសាលាក្តីខ្មែរក្រហមថា អ្នកស្រីជាអតីតអ្នកទោសមន្ទីរសន្តិសុខស-២១ របស់ខ្មែរក្រហម រយៈពេល ១៥ថ្ងៃ។
អ្នកស្រី ជិន ម៉េត បានអះអាងបែបនេះជាមួយនឹងការបង្ហាញរូបថតរបស់អ្នកស្រី ដែលបន្សល់ទុកនៅគុកទួលស្លែងផងដែរ ៖ «នេះរូបខ្ញុំនៅជិតបង រ៉ន។ បង រ៉ន គាត់ជាអ្នកដាំបាយនៅកងខ្ញុំ»។
នៅក្នុងអង្គជំនុំជម្រះ ក្រៅពីការបង្ហាញភស្តុតាងខាងលើ អ្នកស្រី ជិន ម៉េត ក៏បានរៀបរាប់ដោយក្តីខ្សឹកខ្សួលផងដែរអំពីការឈឺចាប់ពីការធ្វើបាបផ្សេងៗ ក្នុងពេលរស់នៅជាអ្នកទោសនៅពេលនោះ។ អ្នកស្រីបញ្ជាក់ទៀតថា ស្លាកស្នាមដែលបណ្តាលមកពីខ្នោះបានបន្សល់នៅជើងរបស់អ្នកស្រីរហូតសព្វថ្ងៃ។
អ្នកស្រី ជិន ម៉េត ថ្លែងដូច្នេះថា ៖ «ខ្ញុំមានស្លាកស្នាមនេះគេចងខ្សែ ជើងមានដំបៅ ហើយកជើងនេះស្នាមគេចាប់ មិនដឹងចាប់ម៉េចដាច់ដំបៅ។ ពេលដែលខ្ញុំទៅនៅកង ១៧ហ្នឹង គេបានឲ្យថ្នាំខ្ញុំលាបទៅជាទៅ តែមានស្លាកស្នាមនៅជាប់ដល់សព្វថ្ងៃនេះ»។
ក្នុងពេលដែលអង្គជំនុំជម្រះឲ្យឡើងធ្វើសេចក្តីសន្និដ្ឋានឆ្លើយតបនឹងការអះអាងរបស់អ្នកស្រី ជិន ម៉េត និងឯកសារប្រវត្តិរូបរបស់មន្ទីរស-២១ ជនជាប់ចោទ ឌុច ទទួលស្គាល់ដូច្នេះ ៖ «រូបថតនេះពិតជារូបថតដែលចេញពីមន្ទីរស-២១ មជ្ឈមណ្ឌលព្រៃសប្រាកដ។ ឯកសារនេះ ពិតជាឯកសារដែលចេញពីមន្ទីរស-២១ មជ្ឈមណ្ឌលព្រៃស។ ទម្រាំបែបបទនេះ ជាទម្រង់បែបបទដែលមិត្ត ហ៊ុយ ធ្វើសម្រាប់អ្នកដែលទៅនៅក្នុងមជ្ឈមណ្ឌលព្រៃសនេះ ទទួលការអប់រំសាថ្មី»។
ក៏ប៉ុន្តែនៅពេលដែលប្រធានចៅក្រមអង្គជំនុំជម្រះសួរបញ្ជាក់ថា តើអ្នកស្រី ជិន ម៉េត ពិតជាជាប់ឃុំឃាំងនៅមន្ទីរសន្តិសុខ ស-២១ ឬទេ? ជនជាប់ចោទ ឌុច បានបញ្ជាក់ដូច្នេះថា ៖ «ខ្ញុំជឿថា មិត្ត ជិន ម៉េត នេះ រងទុក្ខវេទនាដែលគេឃុំឃាំងសួរចម្លើយ នៅកង ៤៥០។ ខ្ញុំនិយាយយ៉ាងនេះមិនមែនចង់បដិសេធឧក្រិដ្ឋកម្មខ្លួនឯងទេ ក៏ប៉ុន្តែការបញ្ជូនទៅស-២១ ដែលបញ្ជូនចូលទៅដល់មជ្ឈមណ្ឌលគុក នៅភ្នំពេញហើយ អត់ចេញទេមិត្ត ម៉េត គឺមិត្តនៅហ្នុង ខ្ញុំយកទៅជើងឯកហើយ»។
តាមឯកសារប្រវត្តិរូបរបស់មន្ទីរស-២១ និងការអះអាងពីសាមីខ្លួនអ្នកស្រី ជិន ម៉េត ជាអតីតយុទ្ធនារីម្នាក់នៃកងទ័ពខ្មែរក្រហមក្នុងកងពលលេខ ៤៥០ នៅមុនពេលចាប់ខ្លួន។
អ្នកស្រី ជិន ម៉េត បានថ្លែងប្រាប់អង្គជំនុំជម្រះសាលាក្តីខ្មែរក្រហមថា ការឈឺចាប់របស់អ្នកស្រីៗបានលាក់ទុកជាយូរមកហើយ។ អ្នកស្រី ជិន ម៉េត នឹងឡើងបំភ្លឺក្នុងអង្គជំនុំជម្រះជាបន្តទៀតនៅថ្ងៃទី៩ ខែកក្កដានេះ៕
អត្ថបទដែលទាក់ទង
- អ្នកឃ្លាំមើល៖ ការជ្រៀតជ្រែករបស់រដ្ឋាភិបាលជាការគំរាមដល់តុលាការខ្មែរក្រហម
- រឿងក្ដីឌុចជិតដល់ទីបញ្ចប់ខណៈជនរងគ្រោះឃើញពន្លឺយុត្តិធម៌តិចនៅឡើយ
- ឌុចព្រួយបារម្ភចំពោះការប្រឈមមុខនឹងការកាត់សេចក្ដីចុងក្រោយ
- សង្គមស៊ីវិលផ្សព្វផ្សាយការយល់ដឹងពីសាលាក្ដីខ្មែរក្រហមនៅស្វាយរៀង
- មន្រ្តីនៃសាលាក្ដីខ្មែរក្រហមអំពាវនាវឲ្យជនរងគ្រោះដាក់ពាក្យបណ្ដឹងឲ្យបានឆាប់
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.