អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា បានបើកកិច្ចជំនួបជាមួយមន្ត្រីអង្គការសង្គមស៊ីវិលមុនគេបង្អស់ ជាថ្ងៃទី១ នៃដំណើរទស្សនកិច្ចជាផ្លូវការនៅកម្ពុជា រយៈពេល ៥ថ្ងៃ មុននឹងជួបពិភាក្សាការងារជាមួយមន្ត្រីជាន់ខ្ពស់រដ្ឋាភិបាល និងបណ្ដាស្ថាប័នសំខាន់ៗក្នុងប្រទេសកម្ពុជា។
មន្ត្រីអង្គការមិនមែនរដ្ឋាភិបាលជាច្រើនបានចូលជួបលោក សុរិយា ស៊ូប៊ែឌី អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា កាលពីថ្ងៃច័ន្ទ ទី៣០ ឧសភា នៅឯស្នាក់ការរបស់លោក។ ក្នុងជំនួបនោះ មន្ត្រីអង្គការសង្គមស៊ីវិល បានលើកនូវបញ្ហាសំខាន់ៗមួយចំនួន ដូចជាស្ថានភាពសិទ្ធិមនុស្ស ការរឹតត្បិតសិទ្ធិសេរីភាពបញ្ចេញមតិ ករណីរំលោភដីធ្លី និងពិចារណាពីសេចក្ដីព្រាងច្បាប់ស្ដីពីការគ្រប់គ្រងអង្គការ និងសមាគមជាដើម។
លោក ធន សារាយ ប្រធានសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ហៅថា អាដហុក (Adhoc) មានប្រសាសន៍ថា ថ្វីត្បិតតែអ្វីដែលសង្គមស៊ីវិលលើកឡើងជាបញ្ហាដដែលក៏ដោយ ប៉ុន្តែលោកសង្ឃឹមថា វត្តមានរបស់អ្នករាយការណ៍ពិសេសរូបនេះជាសញ្ញាវិជ្ជមានមួយ។
លោកបន្តថា ៖ «បាទ! វត្តមានរបស់គាត់អាចជួយដែរ ជួយឲ្យមានការយកចិត្តទុកដាក់ អ្វីជាបញ្ហារបស់សង្គមស៊ីវិលដែលលើកឡើង អាចធ្វើឲ្យមន្ត្រីរដ្ឋាភិបាលគាត់មានការចាប់អារម្មណ៍ ព្រោះថា អ្នករាយការណ៍ពិសេសគាត់មកម្ដងៗ វាជាការចាប់អារម្មណ៍ ទោះបីវាមិនបាន ១០០% ក៏វាអាចជាការយកចិត្តទុកដាក់ គិតគូរក្នុងការដោះស្រាយដែរ»។
ចំណែកមន្ត្រីអង្គការលីកាដូ ដែលធ្វើការលើកស្ទួយផ្នែកសិទ្ធិមនុស្សនៅកម្ពុជា ក៏បានចូលជួបពិភាក្សាជាមួយអ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សនេះដែរ។
លោកស្រី ពុង ឈីវកេក ប្រធានអង្គការលីកាដូ បានថ្លែងថា អង្គការលីកាដូ បានលើកយកបញ្ហាធំចំនួន២ ដែលជាបញ្ហាសំខាន់ និងអាទិភាព គឺបញ្ហាទំនាស់ដីធ្លីដែលកំពុងកើតមានដ៏ក្ដៅក គុក និងសេចក្ដីព្រាងច្បាប់ស្ដីពីការគ្រប់គ្រងអង្គការ និងសមាគម ដែលសង្គមស៊ីវិលយល់ថា ជាការរឹតបន្តឹងសេរីភាពរបស់អង្គការទៅវិញ។ លោកស្រីយល់ថា ប្រទេសកម្ពុជា នៅត្រូវការឲ្យមានអង្គការមិនមែនរដ្ឋាភិបាលនៅឡើយ។
លោកស្រី ពុង ឈីវកេក មានប្រសាសន៍បន្ថែមដូច្នេះ ៖ «យើងចង់ឃើញច្បាប់ដែលរដ្ឋាភិបាលកំពុងព្រាងហ្នឹង កុំឲ្យប៉ះពាល់ដល់កិច្ចការងាររបស់សង្គមស៊ីវិល ផ្ទុយទៅវិញខ្ញុំចង់ឃើញច្បាប់មួយជួយសង្គមស៊ីវិលទៅវិញ ឲ្យសង្គមស៊ីវិលមានពេលមកធ្វើការបម្រើប្រទេសជាតិ ជាជាងងាកសាំញ៉ាំ គ្រាន់តែចុះឈ្មោះក៏ពិបាក ធ្វើនេះក៏ពិបាក ធ្វើនោះក៏ពិបាក។ អ៊ីចឹងយើងក៏ត្រូវតែចូលរួមធ្វើការជាមួយលោក ផ្ដល់អនុសាសន៍ទៅលោក លោកនឹងនាំពាក្យហ្នឹងទៅចរចាជាមួយរដ្ឋាភិបាល ហើយជាមួយសហគមន៍អន្តរជាតិ ជាមួយម្ចាស់ជំនួយ ជាមួយភ្នាក់ងារអង្គការសហប្រជាជាតិផ្សេងៗទៀត»។
លោក សុរិយា ស៊ូប៊ែឌី អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា មានប្រសាសន៍នៅថ្ងៃទី៣១ ឧសភា ថា លោកបានទទួលយកនូវបញ្ហាធំៗមួយចំនួនដែលជាការព្រួយបារម្ភរបស់សង្គមស៊ីវិល។ លោកថា ទស្សនកិច្ចលើកនេះគឺជាការបន្តបេសកកម្មពីទស្សនកិច្ចកាលពីខែកុម្ភៈ កន្លងទៅ។
លោកមានប្រសាសន៍បន្ត ៖ "លើកនេះខ្ញុំនឹងជួបជាមួយមន្ត្រីរដ្ឋាភិបាលថ្មីទៀត ដែលខ្ញុំមិនបានជួបកាលពីទស្សនកិច្ចលើកមុន និងតំណាងរាស្ត្រពីគណបក្សផ្សេងៗគ្នា និងមនុស្សនៅក្នុងសហគមន៍មួយចំនួនទៀត ដើម្បីឱ្យខ្ញុំយល់កាន់តែទូលំទូលាយអំពីស្ថានភាពសិទ្ធិមនុស្សនៅក្នុងប្រទេសនេះសម្រាប់នាំយកទៅប្រាប់សហគមន៍អន្តរជាតិអំពីអ្វីដែលកើតមាននៅក្នុងប្រទេសនេះ"។
លោក សុរិយា ស៊ូប៊ែឌី អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា បានមកបំពេញទស្សនកិច្ចជាផ្លូវការនៅកម្ពុជា នៅថ្ងៃទី៣០ ខែឧសភា ដល់ថ្ងៃទី៣ ខែមិថុនា ឆ្នាំ២០១១។
លោក ស៊ូប៊ែឌី មកកាន់កម្ពុជា ក៏មានគម្រោងសិក្សាលើការងាររដ្ឋសភា និងព្រឹទ្ធសភា ដើម្បីស្វែងរកមធ្យោបាយពង្រឹងតួនាទីលើកស្ទួយ និងការពារសិទ្ធិមនុស្ស ក៏ដូចជាការរីកចម្រើននៃវិស័យសិទ្ធិមនុស្សបច្ចុប្បន្ន និងបន្តតាមដានលើការអនុវត្ត អនុសាសន៍ដែលលោកបានផ្ដល់ជូនរដ្ឋាភិបាលកាលពីឆ្នាំ២០១០ ស្ដីពីការកែទម្រង់ប្រព័ន្ធតុលាការ និងបញ្ហាផ្សេងៗមួយចំនួនទៀតផងដែរ៕