ប៉េអឹមខេត្តកំពង់ធំ៣រូបរងការចោទថាគំរាមប្រជាសហគមន៍

ដោយ ច័ន្ទថុនា

2008-07-03

មន្ត្រីសិទ្ធិមនុស្សប្រចាំខេត្តកំពង់ធំបានមានប្រសាសន៍នៅថ្ងៃព្រហស្បតិ៍នេះថា កងរាជអាវុធហត្ថខេត្តកំពង់ធំចំនួនបីរូបបានធ្វើការគំរាមកំហែងមកលើប្រជាសហគមន៍នៅភូមិជាំស្វាយ ឃុំមានរិទ្ធ ស្រុកសណ្ដាន់ ដោយសារតែរឿងពាក់ព័ន្ធនឹងករណីកាប់ព្រៃឈើ ។

មន្ត្រីស៊ើបអង្កេតរបស់អង្គការលីកាដូប្រចាំខេត្តកំពង់ធំ លោក ឯក សុធា បានឲ្យដឹងថាប្រជាពលរដ្ឋសហគមន៍ភូមិជាំស្វាយបានដាក់ពាក្យបណ្ដឹងមកការិយាល័យរបស់លោកចោទថា កាលពីថ្ងៃទី២៩ មិថុនា មន្ត្រីកងរាជអាវុធហត្ថម្នាក់ ឈ្មោះ សាត់ សារិទ្ធ ដែលជាមន្ត្រីកងរាជអាវុធហត្ថស្រុកសណ្ដាន់ បានគំរាមកំហែងប្រុងបាញ់សម្លាប់មកលើប្រជាពលរដ្ឋម្នាក់នៃសហគមន៍ភូមិជាំស្វាយ ។

លោកបានបន្តទៀតថានៅថ្ងៃដដែលមានកងរាជអាវុធហត្ថពីរនាក់ផ្សេងទៀត ឈ្មោះ សូ យ៉ូ និង នួន សុខគីម ជាមន្ត្រីកងរាជអាវុធហត្ថខេត្តកំពង់ធំ ដែលចុះធ្វើបេសកកម្មនៅស្រុកសណ្ដាន់ បានធ្វើការប្រមាថនិងគំរាមកំហែងលើមេភូមិជាំស្វាយ លោក ម៉ៅ ធា ប្រធានសហគមន៍ព្រៃឡង់ ឈ្មោះ សៅ គឿន និងប្រធានសហគមន៍ភូមិជាំស្វាយ ឈ្មោះ ព្រំ ស៊ុយ ។

លោកថាប្រជាសហគមន៍ភូមិជាំស្វាយបានរាយការណ៍មកការិយាល័យរបស់លោកថា មន្ត្រីកងរាជអាវុធហត្ថទាំងពីរបានគំរាមរឹបអូសយកម៉ាស៊ីនអារឈើពីប្រជាពលរដ្ឋដែលបានកាប់ឈើដើម្បីយកទៅសាងសង់កុដិលោកក្នុងវត្តរបស់សហគមន៍ ។

លោក ឯក សុធា បានឲ្យដឹងថា ៖ «ចង់ទៅរឹបអូសទាក់ទងនឹងម៉ាស៊ីនអារឈើពីប្រជាពលរដ្ឋនិងសហគមន៍ដែលបានកាប់ឈើ ហើយសកម្មភាពអស់ហ្នឹងគឺសហគមន៍មេភូមិអីគាត់ឯកភាពគ្នាជាមួយចៅអធិការវត្ត ហើយចៅអធិការវត្តគាត់បានដាក់សំណើសុំតាមរយៈភូមិ ឃុំ ដើម្បីសុំឈើទៅខាងរដ្ឋបាលព្រៃឈើ ប៉ុន្តែអត់ទាន់បានច្បាប់ពីព្រៃឈើ... ។ ហើយខាងអភិបាលស្រុក បើតាមសម្ដីរបស់លោកមេភូមិថា គាត់បានឯកភាពឲ្យកាប់ហើយ កាប់ឈើដើម្បីធ្វើកុដិលោក ព្រោះកុដិលោកអត់មានទេ» ។

លោក ឯក សុធា បានឲ្យដឹងថាប្រជាពលរដ្ឋបានឲ្យដឹងថាមន្ត្រីកងរាជអាវុធហត្ថបានធ្វើការទារលុយពីប្រជាពលរដ្ឋដែលកាប់ឈើនោះ ។ មិនអាចទាក់ទងសុំការបំភ្លឺពីមន្ត្រីកងរាជអាវុធហត្ថទាំងបីនាក់នោះឡើយ ។

មន្ត្រីសិទ្ធិមនុស្សលីកាដូ លោក ឯក សុធា ក៏បានមានប្រសាសន៍ទៀតថា អភិបាលស្រុកសណ្ដាន់ លោក ផាន សុខផេង បានផ្ញើលិខិតមួយទៅមេបញ្ជាការកងរាជអាវុធហត្ថខេត្តកំពង់ធំ លោក ហង្ស ថុល ឲ្យធ្វើការអប់រំមន្ត្រីកងរាជអាវុធហត្ថទាំងបីរូប ឲ្យបញ្ឈប់សកម្មភាពគំរាមកំហែងមកលើប្រជាសហគមន៍ព្រៃឈើទៀត ។

មេបញ្ជាការកងរាជអាវុធហត្ថខេត្តកំពង់ធំ លោក ហង្ស ថុល បានមានប្រសាសន៍ថាលោកបានហៅមន្ត្រីកងរាជអាវុធហត្ថទាំងបីរូបឲ្យមកបំភ្លឺនៅបញ្ជាការខេត្តនៅថ្ងៃសុក្រ ទី៤ មិថុនានេះ ។

លោក ហង្ស ថុល បានបញ្ជាក់ថា ៖ «អ៊ីចឹងបានយើងធ្វើការស្រាវជ្រាវទាំងសងខាង ដើម្បីផ្ដល់យុត្តិធម៌ឲ្យទាំងសងខាង អ្នកខាងណោះក៏ត្រូវទទួលយុត្តិធម៌ ហើយខាងណេះក៏ត្រូវទទួលបានយុត្តិធម៌ដែរ» ។

លោក ហង្ស ថុល បានបញ្ជាក់ថាគេកំពុងស្រាវជ្រាវលើករណីគំរាមកំហែងនោះហើយ ហើយថាបើសិនជារកឃើញថាមានការគំរាមកំហែងនោះមែន លោកនឹងចាត់វិធានការតាមវិន័យកងទ័ពដោយធ្វើការអប់រំនិងព្រមាន ៕

បោះពុម្ព អ៊ីម៉េល