មនុស្សប្រមាណ ១៥០នាក់ ជាតំណាងសហគមន៍ជនជាតិដើមភាគតិចនៅខេត្តរតនគិរី បានមកប្រមូលផ្តុំគ្នានៅមុខបរិវេណតុលាការខេត្ត ដើម្បីគាំទ្រ និងផ្ដល់កម្លាំងចិត្តសកម្មជនការពារសិទ្ធិមនុស្ស គឺលោក ប៉ែន ប៊ុណ្ណារ៍ និងលោក ឆាយ ធី ខណៈពេលដែលលោកបានចូលទៅបំភ្លឺតាមការកោះហៅរបស់តុលាការ។
វិទ្យុអាស៊ីសេរី សង្កេតឃើញអ្នកយកព័ត៌មានវិទ្យុ ទូរទស្សន៍ និងអង្គការសង្គមស៊ីវិលជាតិ អន្តរជាតិ បានមកយកព័ត៌មាន និងសង្កេតការណ៍ពីករណីនេះ និងជាពិសេសប្រធានសមាគមអាដហុក លោក ធន សារាយ ក៏មានវត្តមាននៅឱកាសនោះដែរ។
អ្នកសម្របសម្រួលសមាគមអាដហុក ខេត្តរតនគិរី លោក ប៉ែន ប៊ុណ្ណារ៍ និងមន្ត្រីផ្នែកអង្កេត លោក ឆាយ ធី បានចូលទៅឆ្លើយបំភ្លឺនៅការិយាល័យព្រះរាជអាជ្ញារង លោក ជា សុភ័ក្ត្រ ម្ដងម្នាក់ៗអស់រយៈពេលប្រមាណ ២០ ទៅ ៣០នាទី ទើបបានចេញមកវិញដោយមិនមានការឃាត់ខ្លួនអ្នកណាម្នាក់ឡើយ។
លោក ប៉ែន ប៊ុណ្ណារ៍ មានប្រសាសន៍ដោយមោទកភាពថា លោកមិនបានធ្វើអ្វីខុសដូចការចោទនោះទេ។ លោកកត់សំគាល់ថា ប្រជាពលរដ្ឋសហគមន៍ជនជាតិដើមភាគតិចជាច្រើនដែលអញ្ជើញមកលើកទឹកចិត្តលោកនៅថ្ងៃនេះ គឺជាសាក្សីបញ្ជាក់ថា លោកមិនបានញុះញង់ប្រជាពលរដ្ឋឲ្យប្រព្រឹត្តបទល្មើសអ្វីនោះឡើយ។
លោកស្នើសុំឲ្យព្រះរាជអាជ្ញារងលើកលែងមិនចាត់ការក្នុងរឿងក្ដីនេះ៖ «ជាទូទៅគាត់ហើយជាអ្នកនៅជាមួយយើង ដែលយើងចុះទៅមូលដ្ឋាន។ យើងបាននិយាយប្រឹក្សាយោបល់ បើកវគ្គបណ្ដុះបណ្ដាលជាដើម។ នៅពេលពួកគាត់ទទួលដំណឹងថា ការប្ដឹងផ្ដល់យើង ថាយើងញុះញង់គាត់មិនពេញចិត្ត គាត់ប្រឆាំងនឹងអ្វីជាការចោទប្រកាន់មកលើយើង ថាយើងញុះញង់ហ្នឹង។ អ៊ីចឹងគាត់មកនេះ គឺមកបង្ហាញថា យើងទាំងអស់មិនបានញុះញង់គាត់ទេ»។
វិទ្យុអាស៊ីសេរី នៅថ្ងៃពុធ ទី១០ ខែតុលា មិនអាចសុំការអធិប្បាយពីព្រះរាជអាជ្ញារង លោក ជា សុភ័ក្ត្រ ជុំវិញការបំភ្លឺរបស់លោក ប៉ែន ប៊ណ្ណារ៍ និងលោក ឆាយ ធី បានទេ ប៉ុន្តែកន្លងទៅលោកធ្លាប់បានបញ្ជាក់ប្រាប់វិទ្យុអាស៊ីសេរីថា ការកោះហៅសកម្មជនសិទ្ធិមនុស្សក្នុងរឿងក្តីនេះ គឺដើម្បីបំពេញនីតិវិធីរបស់តុលាការ។
អ្នកភូមិប៉ាតាង លោក ស្វិន វ៉េវ ដែលបានមកចូលរួមគាំទ្រអះអាងថា សកម្មជនការពារសិទ្ធិមនុស្សទាំងពីរ មិនបានញុះញង់ប្រជាពលរដ្ឋឲ្យប្រព្រឹត្តបទល្មើសអ្វីទេ ហើយការចោទប្រកាន់របស់មេឃុំ ជារឿងមិនត្រឹមត្រូវ៖ «ការពិតពួកខ្ញុំមិនឲ្យគាត់ញុះញង់ទេ គឺពួកខ្ញុំទៅរកគាត់ឲ្យអន្តរាគមន៍រឿងដីគេរំលោភតាំងពីឆ្នាំ២០០៧ មកម្ល៉េះ»។
មេធាវីការពារក្ដីសកម្មជនទាំងពីរ គឺលោក ឡុង លន់ មានប្រសាសន៍បញ្ជាក់ថា រឿងក្ដីនេះគឺពាក់ព័ន្ធពាក្យប្ដឹងរបស់មេឃុំប៉ាតាង លោក កិ ចេន ជាដើមបណ្ដឹងចោទប្រកាន់ ៤ចំណុច រួមមានញុះញង់ប្រជាពលរដ្ឋភូមិប៉ាតាង ឲ្យប្រព្រឹត្តបទល្មើសឧក្រិដ្ឋ។ បរិហារកេរ្តិ៍ផ្សាយព័ត៌មានមិនពិតលើក្រុមប្រឹក្សា និងរដ្ឋអំណាចឃុំប៉ាតាង។ ញុះញង់ឲ្យប្រជាពលរដ្ឋភូមិប៉ាតាង បំផ្លាញទ្រព្យសម្បត្តិក្រុមហ៊ុន ឌីអ៊ឹម ហ្គ្រូប (DM GROUP) និងរំលោភទៅលើអ្នកកាន់កាប់អចលនទ្រព្យស្របច្បាប់។
ប្រធានសមាគមអាដហុក លោក ធន សារាយ មានប្រសាសន៍ថា គោលការណ៍របស់សមាគម គឺការពារសិទ្ធិមនុស្ស និងអប់រំផ្សព្វផ្សាយប្រឹក្សាផ្លូវច្បាប់ជូនប្រជាពលរដ្ឋក្រីក្រនៅគ្រប់តំបន់ជនបទ។
លោករំពឹងថា តុលាការនឹងផ្ដល់យុត្តិធម៌ដល់មន្ត្រីការពារសិទ្ធិមនុស្ស៖ «យើងគោរពតាមនីតិវិធីរបស់តុលាការយើងមក ព្រោះយើងខាងនេះចង់តែរឿងបញ្ហាអហិង្សា ដោះស្រាយតាមផ្លូវច្បាប់។ យើងមិនដែលធ្វើកិច្ចការអ្វីដែលហួសពីកម្រិតហ្នឹងទេ»។
កាលពីថ្ងៃទី៨ ខែតុលា កន្លងទៅ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានចូលទៅបំភ្លឺនៅស្ថាប័នអយ្យការក្នុងដំណើររឿងក្ដីដូចគ្នានេះរួចហើយ។ ចំណែកអ្នកយកព័ត៌មានវិទ្យុអាស៊ីសេរី នឹងចូលទៅបំភ្លឺនៅក្រោយពិធីបុណ្យភ្ជុំបិណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។