អភិបាលរងខេត្តឧត្តរមានជ័យ លោក អ៊ឹង វ៉ន បានមានប្រសាសន៍កាលពីព្រឹកថ្ងៃអាទិត្យ ទី២២ ខែកុម្ភៈ ថា បុរស២នាក់ដែលជាប្រជាពលរដ្ឋនៅភូមិរំដួល ឃុំអំពិល ស្រុកបន្ទាយអំពិល ត្រូវបានអាជ្ញាធរខ្មែរទៅទទួលយកពីមន្ត្រីថៃនៅឯច្រកអូរស្មាច់ កាលពី២ថ្ងៃមុន បន្ទាប់ពីអាជ្ញាធរថៃសុខចិត្តដោះលែងជាថ្នូរនឹងការសុំឲ្យអាជ្ញាធរខ្មែរដោះលែងជនជាតិថៃពីរនាក់ដែលសមត្ថកិច្ចខ្មែរបានចាប់ខ្លួនពីបទឆ្លងដែនខុសច្បាប់ដែរ។
លោក អ៊ឹង វ៉ន មានប្រសាសន៍ដូច្នេះថា ៖ «ដូរគ្នាមកវិញអស់ហើយ តាំងពីម្សិលម្ង៉ៃ មកតាមច្រកអូរស្មាច់។ យើងចាប់គេបាន ២នាក់ដែរ យើងឯកភាពគ្នាដោះដូរគ្នាទៅវិញទៅមកបានហើយ។ រាយការណ៍ទៅអស់ហើយ ការបរទេសអី មហាផ្ទៃអី...រាយការណ៍អស់ហើយ»។
ទោះយ៉ាងណា មន្រ្តីខេត្តឧត្ដរមានជ័យ មិនបានបញ្ជាក់ឲ្យច្បាស់លាស់ទេថា ការចាប់ខ្លួនជនជាតិថៃ ២នាក់នោះ ទាក់ទិននឹងបទអ្វី ហើយធ្វើឡើងកាលពីពេលណា និងនៅទីណានោះទេ?
បុរសឈ្មោះ ស៊ឹប ឆឹង អាយុ២៥ឆ្នាំ រស់នៅភូមិរំដួល ឃុំអំពិល ស្រុកបន្ទាយអំពិល បានមានប្រសាសន៍ថា គាត់និងបុរសម្នាក់ទៀតឈ្មោះ មន ចូន ជាអ្នកភូមិជិតគ្នា ត្រូវបានទាហានឈុតខ្មៅទាហានប៉ារ៉ានិងមេព្រៃរបស់ថៃបាញ់រះជាច្រើនគ្រាប់រួចចូលមកចាប់ខ្លួន ខណៈដែលគាត់និងអ្នកភូមិប្រមាណ ៦នាក់ផ្សេងទៀត បាននាំគ្នាចូលព្រៃដើរបោចវល្លិនិងរើសជ័រចុងនៅខាងជើងភូមិរំដួល ជាប់ព្រំដែនខ្មែរ-ថៃ។
បុរសដដែលបានមានប្រសាសន៍ថា អាជ្ញាធរថៃបានយកគាត់ទៅដាក់គុកបណ្តោះអាសន្នមួយយប់នៅភូមិណងង៉ាម រួចបញ្ជូនទៅតុលាការឯខេត្តបូរីរ៉ាំ។
លោក ស៊ឹប ឆឹង រៀបរាប់ដូច្នេះថា ៖ «កំពុងតែដើរបោចវល្លិ ដើររកជ័រចុង។ ភូមិរំដួល ជាដីខ្មែរ បានខ្ញុំហ៊ានដើរ។ ទាហានខ្មៅលាយគ្នា ប៉ារ៉ាផង។ បាញ់ផ្ទុះឡើងចូល ២០គ្រាប់ជាងឯណោះ។ យកខ្ញុំទៅដាក់គុកបណ្ដោះអាសន្ននៅណងង៉ាម បាន២យប់ រួចនាំខ្ញុំទៅគុកធំគេកន្លែងតុលាការនៅខេត្តបូរីរ៉ាំ»។
តាមអង្គការការពារសិទ្ធិមនុស្សក្រៅរដ្ឋាភិបាលប្រចាំខេត្តឧត្តរមានជ័យ ឲ្យដឹងថា អាជ្ញាធរថៃបានចាប់ខ្លួនអ្នកភូមិខ្មែរ២នាក់នោះ តាំងតែពីថ្ងៃទី១៤ ខែកុម្ភៈ មកម្ល៉េះ។
សូមរំឭកថា កាលពីអំឡុងខែធ្នូ ឆ្នាំ២០០៧ កន្លងមក បុរសជនជាតិខ្មែរចំនួន ៥នាក់ នៅស្រុកសំរោង និងស្រុកបន្ទាយអំពិល ខេត្តឧត្តរមានជ័យ ត្រូវបានអាជ្ញាធរស្រុកកាប់ជើង ខេត្តសុរិន្ទរបស់ថៃចាប់ខ្លួនយកទៅដាក់ពន្ធនាគារជាច្រើនថ្ងៃ ដោយចោទប្រកាន់ថា ប្រជាពលរដ្ឋខ្មែរទាំង៥ បានលបចូលទៅកាប់ឈើខុសច្បាប់នៃតំបន់ថុងនីវក្នុងទឹកដីថៃ៕