ប្រធានការិយាល័យព្រហ្មទណ្ឌកម្រិតធ្ងន់នៃស្នងការនគរបាលខេត្តសៀមរាប លោក អ៊ូ ឯម បានប្រសាសន៍កាលពីព្រឹកថ្ងៃច័ន្ទ ទី២៩ ខែមិថុនា ថា ប៉ូលិសពិតជាចាប់ខ្លួនបុរសឈ្មោះ ស៊ឹម លាភ និង ច័ន្ទ លាភ ទៅតាមដីកាបញ្ជាឲ្យចាប់ខ្លួនពីចៅក្រមសាលាដំបូងខេត្តសៀមរាបនៅពេលដែលអ្នកទាំងពីរចូលមកបង្ហាញខ្លួនចំពោះសមត្ថកិច្ច ប៉ុន្តែលោកពុំអាចអធិប្បាយអំពីមូលហេតុនៃការចាប់ខ្លួននោះបានទេ។
លោក អ៊ូ អែម ថ្លែងដូច្នេះថា ៖ «ចាប់មែន បញ្ជូនទៅហើយព្រឹកមិញ។ ដីកាចាប់ខ្លួនរបស់លោកចៅក្រម ប៉ុន្តែអត់បានចាំឈ្មោះគាត់ថាលោកចៅក្រមណាមួយ»។
តំណាងប្រជាពលរដ្ឋម្នាក់ក្នុងចំណោម២នាក់ដែលប៉ូលិសចាប់ខ្លួនគឺលោក ស៊ឹម លាភ អាយុ ៥៩ឆ្នាំ បានមានប្រសាសន៍កាលពីព្រឹកថ្ងៃអាទិត្យថា គាត់និងបុរសឈ្មោះ ច័ន្ទ លាភ ត្រូវប៉ូលិសស្រុកជីក្រែង ចាប់ខ្លួននៅពេលចូលទៅបង្ហាញខ្លួនចំពោះសមត្ថកិច្ច រួចក៏បានបញ្ជូនមកស្នងការនគរបាលខេត្តកាលពីវេលាម៉ោងជាង៩ព្រឹក ៖ «សូមលោកជួយខ្ញុំផង នគរបាលស្រុកយកមកពីរនាក់»។
អនុប្រធានផ្នែកស៊ើបអង្កតរបស់សមាគមការពារសិទ្ធិមនុស្ស អាដហុក លោក ច័ន្ទ សាវ៉េត បានមានប្រសាសន៍ថា ក្រុមរបស់លោកបានស្រាវជ្រាវរកមូលហេតុនៃការចាប់ខ្លួននោះដោយបានដឹងថា ដីកាចាប់ខ្លួនបានចេញដោយចៅក្រមស៊ើបអង្កេតលោក ឃន សុកល។
ដីកាចាប់ខ្លួននោះបានចោទតំណាងទាំងបីរូបថា បានបង្ខាំងមនុស្សខុសច្បាប់កាលពីថ្ងៃទី២៩ ខែវិច្ឆិកា ឆ្នាំ២០០៨ កន្លងមកក្នុងរឿងទំនាស់ដីធ្លី។
លោក ច័ន្ទ សាវ៉េត ថ្លែងដូច្នេះថា ៖ «ចៅក្រម ឃន សុកល ហ្នឹង គាត់ជាអ្នកចេញដីកាកោះឲ្យចាប់ខ្លួនហ្នឹងឯង»។
ក៏ប៉ុន្តែចៅក្រមស៊ើបអង្កេតរបស់សាលាដំបូងខេត្តសៀមរាប លោក ឃន សុកល បានមានប្រសាសន៍កាលពីព្រឹកថ្ងៃច័ន្ទថា លោកពុំទាន់បានទទួលព័ត៌មានស្តីការចាប់ខ្លួននោះទេ ៖ «ចាំមើលក្រែងលោថ្ងៃ ល្ងាចអី គេឲ្យដំណឹងមកខ្ញុំ»។
សូមរំឭកថា តំណាងប្រជាពលរដ្ឋឃុំជីក្រែង ៣រូប ឈ្មោះ ស៊ិញ សំឡី, ស៊ឹម លាភ និង ច័ន្ទ លាភ ត្រូវបានសមត្ថកិច្ចចាប់ឃុំខ្លួនម្តងមកហើយកាលពីថ្ងៃទី២៦ ខែធ្នូ ឆ្នាំ២០០៨ បន្ទាប់ពីដឹកនាំការតវ៉ារឿងទំនាស់ដីស្រែប្រាំងតំបន់ទំនប់សួង ជាង ៩០ហិកតា។
កាលនោះ តុលាការបានចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋ ប្រើអំពើហិង្សាលើម្ចាស់កម្មសិទ្ធិនិងពីបទក្លែងបន្លំលិខិត ប៉ុន្តែក្រោយមកក៏ដោះលែងឲ្យនៅក្រៅឃុំវិញកាលពីថ្ងៃទី២៩ ខែមករា ឆ្នាំ២០០៩ បន្ទាប់ពីក្រុមប្រជាពលរដ្ឋបានលើកគ្នាមកតវ៉ាយ៉ាងខ្លាំងក្លានៅមុខតុលាការ។ ប៉ុន្តែបញ្ហាទំនាស់ដីធ្លីនៅតែបន្ត ដោយកាលពីថ្ងៃទី២២ ខែមីនា កន្លងមក សមត្ថកិច្ចបានបាញ់រះទៅលើក្រុមអ្នកតវ៉ាបណ្តាលឲ្យរងរបួស ៣នាក់ និងចាប់ខ្លួនមនុស្ស ៩នាក់។
សកម្មជនសិទ្ធិមនុស្សក្រៅរដ្ឋាភិបាលបានហៅការចាប់ខ្លួនតំណាងពលរដ្ឋជាថ្មីម្តងទៀតនេះថាគឺជាការអនុវត្តខុសនីតិវិធីច្បាប់ដោយការអនុវត្តរឿងព្រហ្មទណ្ឌដំណើរការលឿនជាងការដោះស្រាយវិវាទដីធ្លី ដែលវាមិនត្រឹមតែធ្វើឲ្យស្មុគស្មាញខាងផ្លូវច្បាប់ប៉ុណ្ណោះទេ វាថែមទាំងជាការគំរាមកំហែងដល់សកម្មជនអ្នកតវ៉ារឿងដីធ្លីរបស់ប្រជាពលរដ្ឋផង៕