ការដោះលែងនេះគឺផ្អែកតាមលក្ខខណ្ឌ ៣ចំណុច។ ទី១ គឺអ្នកទាំង២ ត្រូវបង្ហាញខ្លួននៅមុខតុលាការសាលាដំបូងរាជធានីភ្នំពេញ តាមការកោះហៅរៀងរាល់ ៣សប្ដាហ៍ម្ដង ទី២ មិនត្រូវផ្លាស់ប្ដូរលំនៅឋាន និងទី៣ ត្រូវមកបង្ហាញខ្លួននៅមុខប៉ុស្តិ៍រដ្ឋបាលស្រះចក ខណ្ឌដូនពេញ។
មេធាវីរបស់មជ្ឈមណ្ឌលអប់រំច្បាប់សម្រាប់សហគមន៍ លោក យឹម សាវ៉ាត បានបញ្ជាក់ថា ការដោះលែងនេះមិនមែនជាស្ថាពរនៅឡើយទេ។ ការដោះលែងនេះ គឺតាមដីកាសម្រេចរបស់ចៅក្រមស៊ើបអង្កេតសាលាដំបូងរាជធានីភ្នំពេញ លោក សែម សក្ដិកូឡា ចុះថ្ងៃ១៥ ខែមិថុនា ឆ្នាំ២០១២។
លោកស្រី លី ចាន់ណារី មានប្រសាសន៍យ៉ាងខ្លីនៅពេលចាកចេញពីពន្ធនាគារព្រៃសថា អ្នកស្រីត្រេកអរដែលត្រូវបានដោះលែងមកវិញ។
លោក សៅ សារឿន និងអ្នកស្រី លី ចាន់ណារី ត្រូវអាជ្ញាធរចាប់ និងនាំទៅឃុំខ្លួននៅពន្ធនាគារព្រៃស កាលពីថ្ងៃទី២៤ ខែឧសភា នៅពេលដែលពួកគាត់រៀបចំឯកសារចូលទៅធ្វើជាសាក្សីអោយតំណាងអ្នកបឹងកក់ចំនួន ១៣នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។