ជនសង្ស័យទាំងពីរនាក់នេះនឹងត្រូវជាប់ពន្ធនាគារអស់មួយជីវិត ប្រសិនបើតុលាការរកឃើញកំហុសពិតមែនថា បានរត់ពន្ធគ្រឿងញៀនហេរ៉ូអ៊ីន។
ការបើកសវនាការកាត់ទោសនេះ បានធ្វើឡើងបន្ទាប់ពីមន្ត្រីប៉ូលិសសហព័ន្ធ និងគយអូស្រ្តាលី បានរកឃើញគ្រឿងញៀនហេរ៉ូអ៊ីន ចំនួនប្រមាណ ១៣គីឡូក្រាម បង្កប់ក្នុងកញ្ចប់ជាច្រើននៃថ្នាំរុក្ខជាតិម្យ៉ាងសំរាប់លាបសក់ ដែលមានទម្ងន់ប្រមាណជា ៦៥គីឡូក្រាម ផ្ញើតាមប៉ុស្តិ៍ចេញពីប្រទេសកម្ពុជា មកកាន់ក្រុងម៉ែលប៊ន (Melbourne) នៃប្រទេសអូស្ត្រាលី។
កាសែតអូស្ត្រាលី ឈ្មោះ Herald Sun បានឲ្យដឹងថា ជនជាប់សង្ស័យទាំងពីរនាក់នោះ អាយុប្រមាណជា ៣០ឆ្នាំ មានឈ្មោះ សុខ សម្បតិ្ត និង កែវ ឈូដាភា រស់នៅក្រុងម៉ែលប៊ន និងស៊ីដនី (Sydney)។ បុរសខ្មែរ ២នាក់នោះ ត្រូវបានអាជ្ញាធរអូស្ត្រាលី ចាប់ឃាត់ខ្លួនកាលពីថ្ងៃសុក្រ ទី១៣ ខែមេសា ក្រោយដែលបានឆែកឆេរក្នុងផ្ទះហើយរកឃើញកញ្ចប់ជាច្រើនដែលមានបង្កប់ហេរ៉ូអ៊ីន។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានមានប្រសាសន៍ប្រាប់វិទ្យុអាស៊ីសេរីថា កម្ពុជាសូមសំដែងការកោតសរសើរចំពោះកិច្ចប្រឹងប្រែងរបស់អាជ្ញាធរអូស្ត្រាលី ក្នុងការបង្ក្រាបការរត់ពន្ធគ្រឿងញៀន។ លោកថា អាជ្ញាធរខ្មែរត្រៀមខ្លួនជាស្រេចដើម្បីសហប្រតិបត្តិការក្នុងការស្វែងរកបណ្ដាញក្រុមជនល្មើសពាក់ព័ន្ធការរត់ពន្ធគ្រឿងញៀននៅកម្ពុជា។
ជនសង្ស័យដែលជាជនជាតិខ្មែរទាំងពីរនាក់នេះ ពុំបានស្នើសុំនៅក្រៅឃុំ ដោយដាក់ប្រាក់ធានានោះទេ។ តុលាការនឹងបើកសវនាការម្ដងទៀតនៅថ្ងៃទី៦ ខែកក្កដា ឆ្នាំ២០១២។
ទាក់ទងនឹងបញ្ហារត់ពន្ធគ្រឿងញៀនពីប្រទេសកម្ពុជា ចូលទៅក្នុងប្រទេសអូស្ត្រាលី ថ្មីៗនេះ អាជ្ញាធរមានសមត្ថកិច្ចអូស្ត្រាលី មានគំរោងចាប់ឃាត់ខ្លួនក្មួយប្រុសលោកនាយករដ្ឋមន្ត្រី ហ៊ុន សែន គឺឧកញ៉ា ហ៊ុន តូ នៅទីក្រុងម៉ែលប៊ន ប៉ុន្តែអាក់ខានមិនបានធ្វើទៅវិញ បន្ទាប់ពីស្ថានទូតអូស្ត្រាលីប្រចាំនៅកម្ពុជា មិនព្រមចេញទិដ្ឋាការ ឬ វីសា ឲ្យលោក ហ៊ុន តូ ធ្វើដំណើរទៅអូស្ត្រាលី ព្រោះរដ្ឋការក្រុងកង់ប៊ែរ៉ា មិនចង់ឃើញមានវិវាទផ្លូវទូត។
អាជ្ញាធរផ្នែកបង្ក្រាបឧក្រិដ្ឋកម្មអូស្ត្រាលី បានតាមដានលោក ហ៊ុន តូ ពីឆ្នាំ២០០២ ដល់ឆ្នាំ២០០៤ ហើយមន្ទិលសង្ស័យថា ហ៊ុន តូ មានបណ្ដាញជាប់ទាក់ទងនឹងការរត់ពន្ធគ្រឿងញៀន និងការលាងលុយកខ្វក់ សំដៅលើប្រទេសអូស្ត្រាលី។
យោងតាមការចុះផ្សាយក្នុងកាសែត The Sydney Morning Herald នៅថ្ងៃចន្ទ ២៦ មីនា ដែលស្រង់ការស៊ើបអង្កេតពីគណៈកម្មការឧក្រិដ្ឋកម្មអូស្ត្រាលី អាជ្ញាធរអូស្ត្រាលីបានតាមដានការផ្ទេរលុយសង្ស័យថា ជាលុយបានពីការរត់ពន្ធគ្រឿងញៀនចេញពីបនល្បែងកាស៊ីណូ ម្កុដ (Crown Casino) នៅទីក្រុងម៉ែលប៊ន ដែលគេថា ស្ថិតក្រោមការត្រួតពិនិត្យរបស់ ហ៊ុន តូ យកទៅក្នុងតំបន់អាស៊ី។
ប្រតិបត្តិការតាមដានសំដៅលើ ហ៊ុន តូ គេដាក់ឈ្មោះថា ប្រតិបត្តិការអ៊ីលីប៉ានហ្គោ (Operation Illipango) ស៊ើបអង្កេតការដឹកគ្រឿងញៀនហេរ៉ូអ៊ីន ចូលប្រទេសអូស្ត្រាលី ដោយបង្កប់ក្នុងឈើអាររួច។ គ្រឿងញៀនដឹកចូលអូស្ត្រាលី មានទឹកប្រាក់ប្រមាណ ១ពាន់លានដុល្លារក្នុងមួយឆ្នាំៗ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។