មនុស្ស២នាក់ស្លាប់នៅខែត្រមណ្ឌលគិរីដោយសារខ្យល់ព្យុះ
ដោយ សុខ សេរី
2009-11-03
មន្រ្តីរដ្ឋាភិបាលជាន់ខ្ពស់និងកាកបាទក្រហមកម្ពុជាបានបញ្ជាក់ថា ខ្យល់ព្យុះថ្មីមួយឈ្មោះ មីរីណេ (Mirinae) បានសម្លាប់មនុស្ស២នាក់និងធ្វើឲ្យរងរបួសធ្ងន់៣នាក់នៅក្នុងខេត្តមណ្ឌលគិរីកាលពីយប់ថៃ្ង៣ តុលានេះ។
លោក អ៊ុយ សំអាត ប្រធានគ្រប់គ្រងគ្រោះមហន្តរាយនៃកាកបាទក្រហមកម្ពុជា បានមានប្រសាសន៍ប្រាប់វិទ្យុអាស៊ីសេរីនៅថៃ្ងអង្គារ ទី៣ ខែវិច្ឆិកា ថា ៖ «ស្លាប់២ ម្ដាយជាមួយកូន ក្រោមឈើដែលរលំលើ ហើយរបួស៣ នៅ(ស្រុក)ពេជ្រាដា ឃុំជីហ្នឹង ហើយខូចផ្ទះ១ខ្នង... ក៏ប៉ុន្តែនៅស្រុកទល់ដែនរលំផ្ទះ៧-៨ខ្នង ហើយនៅរតនគិរីបន្ទាប់ពីលិចស្រូវខូចស្រូវខ្លះ យប់មិញហ្នឹងក៏ដូចគ្នាដែរ ប៉ះពាល់សណ្ដែកសៀងគាត់»។
លោក ញឹម វណ្ណដា ជាអនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ថា ៖ «ចាំមើលខ្ញុំស៊ើបបន្តិចទៅមើល! ឥឡូវកំពុងជាប់នៅបរមរាជវាំងឯណេះ»។
លោកស្រី សិទ្ធ វណ្ណារ៉េត ប្រធាននាយកដ្ឋានឧតុនិយមនៃក្រសួងធនធានទឹកនិងឧតុនិយម បានមានប្រសាសន៍បំភ្លឺថា ខ្យល់ព្យុះថ្មីនេះគ្មានឥទ្ធិពលខ្លាំងក្លាទេមកលើប្រទេសកម្ពុជានោះ។
លោកស្រី សិទ្ធ វណ្ណារ៉េត បានបញ្ជាក់ថា ៖ «មីរីណេក៏វាឆ្លងកាត់ហ្វ៊ីលីពីនដែរ ប៉ុន្តែមិនមានឥទ្ធិពលអីធ្ងន់ធ្ងរមកលើយើងទេ បានន័យថាវារលាយបាត់មិញហើយ ព្រឹកមិញវាជាសម្ពាធទាប តែវារលាយបាត់ហើយ»។
សុខ សេរី ៖ តើវាប៉ះពាល់ខេត្តភាគខាងណានៃប្រទេសកម្ពុជា? សិទ្ធ វណ្ណារ៉េត ៖ ពីម្សិលមិញពីម៉ោង២ វាមានភ្លៀងខ្លះនៅមណ្ឌលគិរី ស្ទឹងត្រែង រតនគិរី។ ភូមិភាគកណ្ដាលយើងមានភ្លៀងដែរតែតិចតួច។
កាលពីចុងខែតុលាថ្មីៗនេះ អង្គការក្រៅរដ្ឋាភិបាលអន្តរជាតិមួយនៅក្នុងប្រទេសកម្ពុជាឈ្មោះ Oxfamបានព្រមានឲ្យដឹងជាមុនអំពីព្យុះថ្មីមួយឈ្មោះ មីរីណេ ដែលបក់បោកមកដល់ប្រទេសកម្ពុជាកាលពីថៃ្ងទី២ ខែវិច្ឆិកាថ្មីៗនេះ។
សេចក្តីរាយការណ៍នានាបានឲ្យដឹងថា ប្រជាពលរដ្ឋខែ្មរចំនួនប្រមាណ៤ម៉ឺនគ្រួសារកំពុងតែត្រូវការស្បៀងអាហារសម្រាប់បរិភោគ ហើយស្រូវចំនួនជាច្រើនម៉ឺនហិកតារកំពុងតែរងគ្រោះដោយសារព្យុះកេសាណា (Ketsana) ដែលបានបោកបក់មកលើប្រទេសកម្ពុជាកាលពីខែតុលាកន្លងទៅនេះ។
អង្គការក្រៅរដ្ឋាភិបាលមួយឈ្មោះ Vision Fund Cambodia បានប្រកាសឲ្យដឹងកាលពីថៃ្ងទី២៤ ខែតុលាថា អង្គការនេះមានគម្រោងការផ្តល់ប្រាក់កម្ចីជាបន្ទាន់មួយដល់គ្រួសារប្រជាពលរដ្ឋខ្មែរនានាដែលរងគ្រោះដោយសារខ្យល់ព្យុះកេតសាណានោះ ដើម្បីរំដោះខ្លួនចេញពីភាពក្រីក្រ។ ទឹកប្រាក់កម្ចីនោះគឺមានចំនួន៣ម៉ឺនដុល្លារអាមេរិកសម្រាប់ខេត្តមួយចំនួន ក្នុងនោះមានខេត្តកំពង់ធំនិងខេត្តសៀមរាបជាដើម៕
ឧបករណ៍រឿង
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
|
ចែករំលែករឿងនេះ |
អត្ថបទដែលទាក់ទង
អតីតប្រធានាធិបតីអាមេរិកសម្ពោធផ្ទះសម្រាប់ជនក្រីក្រនៅខែត្រកណ្ដាល
ទីតាំងផលិតប្រេងម្រះព្រៅភ្នំ២កន្លែងនៅពោធិ៍សាត់ត្រូវបានកម្ទេច
គណៈកម្មការខ្មែរម្ចាស់ស្រុកនឹងរៀបចំកិច្ចប្រជុំស្ដីពីបញ្ហានៅកម្ពុជា
ផ្ទះប្រហែល៣០០ខ្នងត្រូវបំផ្លាញដោយអគ្គិភ័យនៅឫស្សីកែវ
អាជ្ញាធរខេត្តឧត្ដរមានជ័យរារាំងរថយន្តដឹកព្រះពុទ្ធបដិមារបស់ម៉មសូណង់ដូ
ប្រជានេសាទប្រតិកម្មចំពោះការកំណត់ប្រភេទឧបករណ៍នេសាទ
បញ្ហាធូលីហុយនៅតាមផ្លូវជាតិលេខ៣ប៉ះពាល់ដល់សុខភាពអ្នកស្រុក
ពលរដ្ឋនៅព្រៃវែងត្អូញពីបញ្ហាសមត្ថកិច្ចស្ទាក់ទារប្រាក់តាមផ្លូវ
ក្រសួងសុខាភិបាលបារម្ភចំពោះការចរាចរឱសថក្លែងក្លាយ
អ្នកភូមិនៅខេត្តកណ្ដាលនិងកំពង់ស្ពឺបារម្ភពីបញ្ហាសុខភាព
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.