ប៉េអឹមខែត្រស្ទឹងត្រែង២រូបរងការចោទថាជំរិតទារប្រាក់ពលរដ្ឋ
ដោយ រដ្ឋា វិសាល
2009-07-04
មន្ត្រីអាវុធហត្ថខេត្តស្ទឹងត្រែងចំនួនពីរនាក់រងការចោទប្រកាន់ពីប្រជាពលរដ្ឋម្នាក់ពីបទជំរិតទារប្រាក់១០លានរៀលនិងគំរាមកំហែងចាប់ចងទៀតផង។
ស្ត្រីឈ្មោះ ផា សារុំ ទីលំនៅភូមិព្រែក សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង កាលពីថ្ងៃព្រហស្បតិ៍ ទី២ កក្កដា ឆ្នាំ២០០៩ បានមកដល់ការិយាល័យសមាគមអាដហុក ខេត្តស្ទឹងត្រែង ប្រយោជន៍សុំឲ្យស្ថាប័នការពារសិទ្ធិមនុស្សមួយនេះជួយអន្តរាគមន៍ពាក្យបណ្តឹងចោទប្រកាន់មន្ត្រីអាវុធហត្ថទាំងពីរទៅស្ថាប័នពាក់ព័ន្ធដើម្បីជួយស្វែងរកយុត្តិធម៌។
ស្រ្តីឈ្មោះ ផា សារុំ មានប្រសាសន៍បញ្ជាក់ថា កាលពីថ្ងៃទី២៩ មិថុនាកន្លងទៅ កូនប្រុសគាត់បានដឹកជញ្ជូនសាច់ក្របីពីស្រុកថាឡាបរិវ៉ាត់មកទីរួមខេត្តដើម្បីលក់។ លុះមកដល់ចំណុចស្ពានដែក ផ្សារលើ ជិតទីរួមខេត្ត ក៏ត្រូវអាវុធហត្ថពីរនាក់ស្ទាក់ឃាត់រកលិខិតស្នាមក្នុងការដឹកជញ្ជូនសាច់ក្របីនោះ តែកូនប្រុសគាត់បញ្ជាក់ថាជាក្របីអ្នកភូមិងាប់ ហើយមេភូមិ មេឃុំបានដឹងឮនិងអនុញ្ញាតក្នុងការកាប់សាច់លក់នោះទៀតផង។
យ៉ាងនេះក្តីមន្ត្រីអាវុធហត្ថមិនយល់ព្រម កូនគាត់ក៏ទូរស័ព្ទហៅគាត់និងប្តីមកដើម្បីដោះស្រាយបញ្ហា។ ក៏ប៉ុន្តែពេលគាត់និងប្តីមកដល់ក៏មិនអាចដោះស្រាយបញ្ហាបាន ហើយគាត់ក៏លើកសាច់ក្របីដាក់ឡាន ក៏កើតមានការប្រទាញប្រទង់គ្នាជាមួយមន្ត្រីអាវុធហត្ថធ្វើឲ្យទូរស័ព្ទមន្ត្រីអាវុធហត្ថជ្រុះ ហើយត្រូវឡានបើកតាមផ្លូវកិនបែក។ បន្ទាប់មកមន្ត្រីអាវុធហត្ថបានទារសំណងតែគាត់មិនយល់ព្រមក៏ចាកចេញ ហើយរហូតមកដល់ថ្ងៃព្រហស្បតិ៍ ទី២ កក្កដា ឆ្នាំ២០០៩ ទើបមន្ត្រីអាវុធហត្ថកោះហៅគាត់ទៅបញ្ជាការដ្ឋាន ហើយធ្វើការគំរាមកំហែងចាប់ដាក់ខ្នោះនិងទារឲ្យបង់ប្រាក់១០លានរៀលនោះ។
អ្នកស្រី ផា សារុំ បានឲ្យដឹងថា ៖ «សាច់ប្រើសលក់ពេញផ្សារ សាច់ជ្រូកព្រៃនោះ ហេតុអីបានជាគេមិនទៅចាប់ ខ្ញុំអត់យល់សោះ ហើយមកជំរិតខ្ញុំយក១០លាន(រៀល)»។
មន្ត្រីអាវុធហត្ថរងការចោទប្រកាន់ខាងលើមានឈ្មោះ ហ៊ាន សុវណ្ណារិទ្ធ និង គឹម សាវឿន ជាមន្ត្រីកងរាជអាវុធហត្ថខេត្តស្ទឹងត្រែង។ វិទ្យុអាស៊ីសេរីមិនអាចសុំការអធិប្បាយពីលោក គឹម សាវឿន ជុំវិញសេចក្តីចោទប្រកាន់បានទេ។
ចំណែកលោក ហ៊ាន សុវណ្ណារិទ្ធ បានបដិសេធសេចក្តីចោទប្រកាន់។ លោកទទួលស្គាល់ថា បានទាមទារប្រាក់ពីស្ត្រីខាងលើមែនតែជាប្រាក់ជំងឺចិត្តដែលគាត់បានប្តឹងស្ត្រីនោះក្នុងបទជេរប្រមាថក្រុមសមត្ថកិច្ចតែប៉ុណ្ណោះ។
លោក ហ៊ាន សុវណ្ណារិទ្ទ បានបញ្ជាក់ថា ៖ «ជិះឡានមក ពីលើឡានមកស្រែកថា "ម៉េចអាប៉េអឹមអ្ហែងចង់ប្លន់អញ អ្ហែងចង់មកជំរិតអញ" ភាពមើលងាយសមត្ថកិច្ចពេលដែលយើងចុះធ្វើការ។ ភាសាវ៉ៃខ្នោះ ដាក់ខ្នោះហ្នឹង អត់មានទេ។ ភាសាថាចាប់ជំរិតទារប្រាក់ហ្នឹងមិនមែនទេ ពាក្យសងជំងឺចិត្តផ្សេង ពាក្យជំរិតទារប្រាក់ផ្សេង»។
មន្ត្រីស៊ើបអង្កេតសមាគមអាដហុក ខេត្តស្ទឹងត្រែង លោក ហូ សំអុល មានប្រសាសន៍ថា លោកបានអន្តាគមន៍ពាក្យបណ្តឹងស្រ្តីខាងលើទៅស្ថាប័នអយ្យការតុលាការខេត្តស្ទឹងត្រែងនៅព្រឹកថ្ងៃសុក្រនេះរួចហើយ។
លោក ហូ សំអុល បានមានប្រសាសន៍ថា ៖ «ដែលមានទំនាស់មិនមែនគាត់ហៅទៅគាបសង្កត់យកលុយយកអីអ៊ីចឹងទេ គាត់ត្រូវបង្កសំណុំរឿងបញ្ជូនទៅតុលាការតាមច្បាប់»។
ព្រះរាជអាជ្ញាអមតុលាការខេត្តស្ទឹងត្រែង លោក ម៊ី សាខន ឲ្យដឹងថា ស្ថាប័នលោកទទួលបានពាក្យបណ្តឹងនោះរួចហើយ លោកនឹងធ្វើការស៊ើបអង្កេត៕
អត្ថបទដែលទាក់ទង
អង្គការសេដាក់គ្រោងនាំអង្ករសរីរាង្គទៅទីផ្សារអឺរ៉ុបនិងអាមេរិក
អាជ្ញាធរស្វែងរកការបិទមន្ទីរព្យាបាលជំងឺមួយនៅរតនគិរី
អតីតប្រធានាធិបតីអាមេរិកសម្ពោធផ្ទះសម្រាប់ជនក្រីក្រនៅខែត្រកណ្ដាល
ទីតាំងផលិតប្រេងម្រះព្រៅភ្នំ២កន្លែងនៅពោធិ៍សាត់ត្រូវបានកម្ទេច
គណៈកម្មការខ្មែរម្ចាស់ស្រុកនឹងរៀបចំកិច្ចប្រជុំស្ដីពីបញ្ហានៅកម្ពុជា
អាជ្ញាធរខេត្តឧត្ដរមានជ័យរារាំងរថយន្តដឹកព្រះពុទ្ធបដិមារបស់ម៉មសូណង់ដូ
ប្រជានេសាទប្រតិកម្មចំពោះការកំណត់ប្រភេទឧបករណ៍នេសាទ
បញ្ហាធូលីហុយនៅតាមផ្លូវជាតិលេខ៣ប៉ះពាល់ដល់សុខភាពអ្នកស្រុក
ពលរដ្ឋនៅព្រៃវែងត្អូញពីបញ្ហាសមត្ថកិច្ចស្ទាក់ទារប្រាក់តាមផ្លូវ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.