ការបញ្ជូនក្រុមគ្រូពេទ្យជំនាញទៅធ្វើការស្រាវជ្រាវនោះ បន្ទាប់ពីមានប្រជាពលរដ្ឋ ២នាក់ បានស្លាប់ ដែលក្រុមគ្រួសាររបស់គេអះអាងថា បន្ទាប់ពីបានលេបថ្នាំគ្រាប់ដែលគ្លីនិកឯកជនចិនមួយ ឈ្មោះរស្មី អង្គរ បានចែកឱ្យ។
មន្ត្រីសុខាភិបាលខេត្តសៀមរាប បានព្រមានថា គេនឹងចាត់វិធានការតាមផ្លូវច្បាប់ទៅលើអ្នកគ្រប់គ្រងគ្លីនិកឯកជនចិន មួយឈ្មោះ រស្មី អង្គរ អតីតឈ្មោះគ្លីនិក ជិន ហួរ ប្រសិនបើគេរកឃើញថា កន្លងទៅបានធ្វើសកម្មភាពពិនិត្យជំងឺ និងចែកថ្នាំពេទ្យមិនត្រឹមត្រូវទៅឱ្យអ្នកភូមិជាច្រើននាក់យកទៅប្រើប្រាស់បណ្ដាលឱ្យមានមនុស្សស្លាប់នោះ។
លោកវេជ្ជបណ្ឌិត ក្រូស សារ៉ាត់ ជាប្រធានមន្ទីរសុខាភិបាលខេត្តសៀមរាប។ លោកបានមានប្រសាសន៍ថា គ្លីនិកឯកជនចិន រស្មី អង្គរ គឺបានចុះធ្វើសកម្មភាពពិនិត្យ និងចែកថ្នាំទៅឱ្យប្រជាពលរដ្ឋនៅភូមិបន្ទាយឈើ សង្កាត់ទឹកវិលនោះ មិនបានសុំការអនុញ្ញាត និងសហការជាមួយមន្ត្រីមន្ទីរសុខាភិបាលខេត្តទេ។
វេជ្ជបណ្ឌិត ក្រូស សារ៉ាត់៖ «ឥឡូវនេះខ្ញុំកំពុងតែធ្វើលិខិតកោះអញ្ជើញមក ដើម្បីឆ្លើយបំភ្លឺជាមួយនឹងខ្ញុំ ព្រោះខ្ញុំមិនអាចនឹងអធ្យាស្រ័យបានទេ។ ព្រោះនៅតាមគ្លីនិកឯកជនអ៊ីចឹងត្រូវមានវេជ្ជបណ្ឌិតអ្នកឈរឈ្មោះទទួលខុសត្រូវ ហើយបើសិនណាគាត់ចុះទៅធ្វើការងារចែកចាយថ្នាំអ្វី គាត់ត្រូវតែដាក់សំណើមកមន្ទីរ ឆ្លងមន្ទីរសុខាភិបាល ដើម្បីពិនិត្យមើលថា តើគាត់ទៅធ្វើហ្នឹង វេជ្ជបណ្ឌិតគាត់ ពេទ្យគាត់ ត្រឹមត្រូវ ឬអត់? ហើយគាត់ប្រើប្រាស់ថ្នាំអ្វី ដោយសហការជាមួយនឹងខាងខ្ញុំ ប៉ុន្តែគាត់អត់មានសុំអត់មានអីទាំងអស់»។
លោក ក្រូស សារ៉ាត់ បានមានប្រសាសន៍ថា លោកមានការសោកស្ដាយនៅពេលដែលមានរឿងកើតឡើងចំពេលដែលលោកមិនបាននៅក្នុងខេត្តសៀមរាប ដោយទើបតែវិលត្រឡប់មកពីប្រទេសអូស្ត្រាលី។
ប្រតិកម្មរបស់ប្រធានមន្ទីរសុខាភិបាលនេះ កើតឡើងបន្ទាប់ពីកាលពីថ្ងៃទី២០ ខែឧសភា កន្លងទៅ ក្រុមគ្រូពេទ្យរបស់គ្លីនិកឯកជនចិនឈ្មោះ រស្មី អង្គរ បានចុះពិនិត្យជំងឺ និងចែកថ្នាំទៅឱ្យប្រជាពលរដ្ឋប្រមាណ ២០០នាក់នៅភូមិបន្ទាយឈើ ហើយកាលពីថ្ងៃទី២១ និងទី២២ ខែឧសភា ឆ្នាំ២០១២ គឺមានស្រ្តីចំណាស់ម្នាក់ឈ្មោះ អ៊ាន ចៀច អាយុ ៦៣ឆ្នាំ និងបុរសម្នាក់ឈ្មោះ សុខ សុំ ហៅ សេះ អាយុ ៥៣ឆ្នាំ បានស្លាប់ ដោយក្រុមគ្រួសារអះអាងថា បន្ទាប់ពីបានលេបថ្នាំដែលគ្លីនិកឯកជនចិន នោះចែកឱ្យ។
លោកអនុសេនីយ៍ឯក ជិន សឿត ជានាយផ្នែកឧក្រិដ្ឋកម្ម១ របស់ការិយាល័យព្រហ្មទណ្ឌនៃស្នងការនគរបាលខេត្តសៀមរាប។ លោកបានមានប្រសាសន៍ថា ចាប់តាំងពីមានអ្នកភូមិស្លាប់ដែលគេអះអាងថា បន្ទាប់ពីលេបថ្នាំរបស់គ្លីនិកចិននោះ គឺសមត្ថកិច្ចបានហៅគ្រូពេទ្យក្នុងគ្លីនិកនោះខ្លះៗមកសាកសួរ ដើម្បីធ្វើកំណត់ហេតុ ក៏ប៉ុន្តែចំណាត់ការបន្តទៅទៀត គឺនៅរង់ចាំលទ្ធផលធ្វើកោសល្យវិច័យពីវេជ្ជបណ្ឌិតរួចរាល់សិន។
លោកអនុសេនីយ៍ឯក ជិន សឿត៖ «មិនទាន់ថាយ៉ាងម៉េចទេ ព្រោះនៅពេទ្យនោះ គាត់យកថ្នាំទៅធ្វើកោសល្យវិច័យ»។
ក៏ប៉ុន្តែតំណាងគ្លីនិកឯកជនចិននោះ បានព្យាយាមបដិសេធថា ការស្លាប់របស់អ្នកភូមិបន្ទាយឈើ ២នាក់ គឺមិនពាក់ព័ន្ធនឹងការលេបថ្នាំដែលក្រុមរបស់គេចែកឱ្យនោះទេ។
ស្ត្រីម្នាក់ដែលអះអាងថា ជាបុគ្គលិកផ្នែករដ្ឋបាលរបស់គ្លីនិកឯកជន រស្មី អង្គរ តែព្យាយាមលាក់ឈ្មោះ បានមានប្រសាសន៍ថា ការស្លាប់មនុស្ស ២នាក់នៅភូមិបន្ទាយឈើ សង្កាត់ទឹកវិល ចម្ងាយប្រមាណ ១៦គីឡូម៉ែត្រ ភាគខាងជើងឆៀងខាងលិចពីក្រុងសៀមរាប នោះ គឺដោយសារតែជំងឺរ៉ាំរ៉ៃ ជាយូរមកហើយ។
ស្រីដដែលអះអាងដូច្នេះ៖ «ថ្នាំដែលពួកខ្ញុំចែកឱ្យ គ្រាន់តែជាប្រភេទថ្នាំផ្ដាសាយ វីតាមីនសេ ហើយនិងពពួកថ្នាំផ្សះបន្តិចបន្តួច។ ថ្នាំហ្នឹងពួកខ្ញុំក៏ប្រើប្រាស់នៅតាមគ្លីនិកជារៀងរាល់ថ្ងៃ ហើយក៏មានឱ្យទៅអ្នកជំងឺផ្សេងៗទៀត មានគេលេបច្រើនដូចគាត់ដែរ គេអត់អី។ និយាយទៅប៉ូលិសអីក៏គាត់បានធ្វើកោសល្យវិច័យដែរ។ តាមពិតទៅគឺគាត់មានបញ្ហាដោយជំងឺខ្លួនគាត់ផ្ទាល់ មិនមែនមកពីលេបថ្នាំ ដែលខាងខ្ញុំចែកឱ្យទេ»។
ទោះយ៉ាងណា ការអះអាងបែបនោះ គឺគ្លីនិកមិនមានឯកសារនៃប្រវត្តិអ្នកជំងឺទាំងនោះនៅក្នុងដៃរបស់គេឱ្យបានច្បាស់លាស់នៅឡើយទេ។ រហូតមកដល់ថ្ងៃទី២៦ ខែឧសភា ក្រុមអ្នកភូមិបន្ទាយឈើខ្លះ នៅតែអះអាងថា ពួកគេបានកើតមានបញ្ហាសុខភាពបន្ទាប់ពីបានលេបថ្នាំគ្រាប់ដែលគ្រូពេទ្យចិន ចែកឱ្យនោះ។
ស្ត្រីឈ្មោះ សោម ហៀត បានមានប្រសាសន៍ថា នៅពេលដែលក្រុមគ្រូពេទ្យគ្លីនិក រស្មី អង្គរ បានទៅពិនិត្យ និងចែកថ្នាំនោះ គឺរូបគាត់ក៏បានទៅឱ្យគេស្ទង់ឈាម បន្ទាប់មកពេទ្យគ្លីនិក បានឱ្យថ្នាំគ្រាប់មកគាត់លេប។ ក្រោយពីលេបរួចមក គឺគាត់មានបញ្ហាសុខភាព ដោយញ័រទ្រូង និងក្ដៅខ្លួន ទាល់តែបន្តោងសេរ៉ូមអស់ ២កំប្លោកទើបស្វាង។
ស្ត្រីម្នាក់ទៀតឈ្មោះ ជឿន ណា អាយុ ៤០ឆ្នាំ នៅភូមិបន្ទាយឈើ ដែរ បានបន្តោងសេរ៉ូមនៅឡើយ កាលពីថ្ងៃទី២៦ ខែឧសភា។ គាត់បានមានប្រសាសន៍ថា គាត់បានលេបថ្នាំដែលគ្លីនិក រស្មី អង្គរ ចែកឱ្យនោះអស់ ៤ដង ក៏ធ្វើឱ្យគាត់មានបញ្ហាសុខភាព៖ «គេសួរខ្ញុំថា ខ្ញុំឈឺអី? ខ្ញុំថា ខ្ញុំវាក្ដៅចង្កេះ។ ពេទ្យគេបើកឱ្យ មិនដឹងថា ចិន ឬមិនដឹងជាស្អីទេ ក៏ប៉ុន្តែគេនោះមិនចេះខ្មែរទេ មានអ្នកខ្មែរ គេសម្រាប់បកប្រែសួរយើង។ ឱ្យថ្នាំខ្ញុំ ៦ពេល ហើយខ្ញុំទើបនឹងលេបបាន ៤ពេល។ ពេលដែលខ្ញុំលេប ខ្ញុំញ័រ ហើយវិលមុខ ដូចយើងទទាក់ ដើរទៅធេងធោងៗ ខ្ញុំដាក់សេរ៉ូមទៅ»។
លោក អ៊ាម ប៊ុនលឿន ជាអនុប្រធានមន្ទីរសុខាភិបាល ខេត្តសៀមរាប។ លោកបានមានប្រសាសន៍ថា៖នៅរសៀលថ្ងៃទី២៩ខែ ឧសភា លោកនឹងដឹកនាំក្រុមគ្រូពេទ្យជំនាញ ចុះទៅស្រាវជ្រាវនៅភូមិបន្ទាយឈើនោះ ដើម្បីស្វែងរកឈ្មោះ គ្រូពេទ្យ របស់គ្លីនិករស្មី អង្គរ ដែលចុះចែកថ្នាំនោះ ហើយនិងស្វែងរកថ្នាំពេទ្យ ដែលចែកនៅសេសសល់ ដើម្បីយកផ្ញើទៅក្រសួង សុខាភិបាលឱ្យធ្វើការពិនិត្យថា៖តើថ្នាំដែលចែកជូន អ្នកភូមិប្រមាណ២០០នាក់ នោះ វាមានបញ្ហាឬក៏យ៉ាងណា?៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។