មន្ត្រីជាន់ខ្ពស់គណបក្សហ៊្វុនស៊ិនប៉ិចបានថ្លែងថា គណបក្សហ៊្វុនស៊ិនប៉ិច និងគណបក្សជាតិនិយម បានបញ្ចប់ការពិភាក្សាលើពិធីសារព្រមព្រៀងបង្កើតសម្ព័ន្ធភាពរួមគ្នាមួយដែលមានឈ្មោះថា ហ៊្វុនស៊ិនប៉ិចជាតិនិយម។
លោក កែវ ពុទ្ធរស្មី ប្រធានគណបក្សហ៊្វុនស៊ិនប៉ិច មានប្រសាសន៍ឲ្យដឹងថា ការចងសម្ព័ន្ធភាពជាមួយគ្នានេះ គឺដើម្បីប្រមូលផ្តុំកម្លាំងចូលរួមកសាងប្រទេសជាតិឡើងវិញ។
លោក កែវ ពុទ្ធរស្មី បានបញ្ជាក់ថា ៖ «យើងវាបែកបាក់គ្នា អញ្ចឹងត្រូវតែរួបរួមគ្នាឡើងវិញ ហ្នឹងជាមូលហេតុទី១។ មូលហេតុទី២ គឺគណបក្ស ហ៊្វុនស៊ិនប៉ិច ជាគណបក្សដែលធ្លាប់នាំមកនូវសន្តិភាព ហើយរៀបចំការកសាងជាតិទាំងអស់ ចូលរួមតាំងពីឆ្នាំ១៩៩៣ រហូតមកដល់ពេលនេះ ហើយមានសមិទ្ធផលជាច្រើនក្នុងការធ្វើឲ្យមានការបង្រួបបង្រួមជាតិ ការផ្សះផ្សាជាតិ ការកសាងជាតិ អ៊ីចឹងហើយបានជាយើងយល់ថា គណបក្សហ៊្វុនស៊ិនប៉ិច គឺនៅមានតួនាទីធ្វើយ៉ាងណានៅថ្ងៃមុខឲ្យមានការរៀបចំរចនាសម្ព័ន្ធឡើងវិញ ឲ្យមានប្រសិទ្ធភាពក្នុងការបម្រើប្រទេសជាតិឲ្យដូចពីដើមឡើងវិញ»។
លោក កែវ ពុទ្ធរស្មី មានប្រសាសន៍ទៀតថា ការចងសម្ព័ន្ធរវាងគណបក្សទាំងពីរជាដំណាក់កាលដំបូងនៃការប្រមូលកម្លាំងគាំទ្រ និងរៀបចំប្រព័ន្ធគ្រប់គ្រងតាមមូលដ្ឋាន ដើម្បីឈានដល់ការបញ្ចូលគ្នាជាគណបក្សតែមួយ។
លោក កែវ ពុទ្ធរស្មី បានអះអាងថា ៖ «យើងនឹងអាចច្របាច់ចូលគ្នានៅពេលជិតបោះឆ្នោត។ មែនទែនទៅពេលហ្នឹងវាអត់មានខាតកៅអីនោះទៀតទេ។ អ៊ីចឹងដើម្បីយើងសាកល្បងជឿទុកចិត្តគ្នា និងដើម្បីកុំឲ្យដល់ថ្ងៃហ្នឹងចាំយើងចូលគ្នាតែម្ដងទៅ ឃើញថាវាយូរ អ៊ីចឹងយើងចាប់រៀបចំបណ្ដើរៗ រៀបចំបញ្ចូលជាសម្ពន្ធភាពហ្នឹងទៅ ហើយយើងធ្វើការច្របាច់បញ្ចូលគ្នានៅតាមមូលដ្ឋានហ្នឹង នៅតាមខេត្ត តាមអី បញ្ចូលគ្នាឲ្យហើយទៅ ដើម្បីដល់ឆ្នាំ២០១២ យើងបោះឆ្នោតឃុំសង្កាត់ជាជំហានដំបូងដើម្បីបង្ហាញការយល់ចិត្តគ្នា ហើយដើម្បីឈោងដល់ការបញ្ចូលគ្នាតែមួយតែម្ដង»។
គណបក្ស ហ៊្វុនស៊ិនប៉ិច ដែលដឹកនាំដោយសម្ដេចក្រុមព្រះ នរោត្តម រណឫទ្ធិ បានបែកខ្ញែកគ្នា តាំងពីឆ្នាំ២០០៦។ បន្ទាប់ពីនោះសម្ដេចក្រុមព្រះ ទ្រង់បានបង្កើតគណបក្សថ្មីមួយផ្សេងទៀតដោយដាក់ឈ្មោះថា គណបក្ស នរោត្តម រណឫទ្ធិ។
គណបក្ស នរោត្តម រណឫទ្ធិ បានចូលរួមការបោះឆ្នោតជ្រើសរើសក្រុមប្រឹក្សាឃុំសង្កាត់ នៅឆ្នាំ២០០៧ និងការបោះឆ្នោតជាតិនៅឆ្នាំ២០០៨។ ជាលទ្ធផល គណបក្សដែលអះអាងថា មាននិន្នាការរាជានិយមទាំងពីរទទួលបានអាសនៈចំនួន ២ រៀងៗខ្លួន នៅក្នុងសភា ក្នុងពេលបោះឆ្នោតជាតិកាលពីខែកក្កដា ឆ្នាំ២០០៨។
គណបក្ស នរោត្តម រណឫទ្ធិ បានប្ដូរឈ្មោះជាថ្មីម្ដងទៀតទៅជាគណបក្សជាតិនិយម នៅឆ្នាំ២០០៩ ដែលមានលោក ឈឹម សៀកឡេង ជាប្រធាន។ ករណីបែកបាក់កម្លាំងផ្ទៃក្នុងរបស់គណបក្ស ហ៊្វុនស៊ិនប៉ិច ទៅជាពីរក្រុមនេះ បានធ្វើឲ្យកម្លាំងគាំទ្ររបស់គណបក្សនេះកាន់តែថយចុះ។
មន្ត្រីជាន់ខ្ពស់គណបក្ស ហ៊្វុនស៊ិនប៉ិច បានរំពឹងថា ការរួមបញ្ចូលគ្នារវាងគណបក្សទាំងពីរ នឹងធ្វើឲ្យសំឡេងគាំទ្របានច្រើនឡើងវិញ នៅក្នុងពេលបោះឆ្នោតសភាជាតិក្នុងឆ្នាំ២០១៣ខាងមុខ។
លោកបណ្ឌិត ពុទ្ធា ហង្ស អតីតប្រធានអង្គការនិចហ្វិក ដែលធ្លាប់អង្កេតមើលការបោះឆ្នោត បានមានប្រសាសន៍ឲ្យដឹងថា ការវិលមករួបរួមគ្នារបស់គណបក្សទាំងពីរ គឺជាជម្រើសដ៏ល្អបំផុត។
លោកបណ្ឌិត ពុទ្ធា ហង្ស បានមានប្រសាសន៍ថា ៖ «យើងឃើញថា គណបក្សទាំងនេះមានការប្រឹងប្រែងរៀបចំឲ្យមានការសហការគ្នា ឆ្ពោះទៅរកការពង្រឹងនូវការដណ្ដើមតួនាទីដឹកនាំរដ្ឋ។ ការពង្រឹងនេះបើប្រៀបទៅនឹងសុភាសិតរបស់ខ្មែរ គឺចង្កឹះមួយបាច់ច្រើន វាប្រសើរជាងចង្កឹះមួយដើម។ អ៊ីចឹងខ្ញុំគិតថា ជាយុទ្ធសាស្ត្រមួយ នៃក្រុមគណបក្ស ដែលមានអាសនៈតិចនៅក្នុងសភា ក្នុងការដណ្ដើមតួនាទីដឹកនាំរដ្ឋ»។
សម្ពន្ធ័ភាព ហ៊្វុនស៊ិនប៉ិច ជាតិនិយម នឹងមានសហប្រធានជាអ្នកដឹកនាំ៕