អ្នកភូមិទាំងពីរមានឈ្មោះ ប៉ង សាម៉ុញ និង កាំង សេងញ៉ិន ជនជាតិដើមគ្រឹង រស់នៅភូមិទូសច្រាច់ ឃុំតាអង ស្រុកកូនមុំ។
តំណាងសហគមន៍ លោក ប៉ង សាម៉ុញ និយាយថា ក្រោយហេតុការណ៍ជនពាក់ព័ន្ធកាប់ឈើបានគំរាមសម្លាប់អ្នកភូមិដែលរាយការណ៍ ហើយកាលពីថ្ងៃអាទិត្យ កម្លាំងប៉ូលិសប៉ុស្ដិ៍ប្រមាណ៥នាក់បានទៅដល់សាលាប្រជុំអ្នកភូមិ ហើយចោទប្រកាន់អ្នកភូមិថា ប្រឌិតរឿងក្លែងរូបថតនិងបានគំរាមចាប់ដាក់ពន្ធនាគារ ៖ «ហើយរឿងខ្ញុំប្ដឹងគេកាប់បំផ្លាញព្រៃឈើ... ខ្ញុំនាំមន្រ្តីហ្នឹង គាត់ទៅថត»។
តំណាងអ្នកភូមិម្នាក់ទៀតឈ្មោះ កាំង សេងញ៉ិន អំពាវនាវឲ្យមានកិច្ចការពារសុវត្ថិភាពពួកគេទាំងពីរ ៖ "បារម្ភពីអ្នកភូមិ ហើយខ្លាច គាត់ក៏បានរត់មកដើម្បីពឹងអង្គការអាដហុក និងសមត្ថកិច្ចជួយការពារគាត់"។
នាយប៉ូលិសប៉ុស្តិ៍តាអង លោក ស៊ឹម ណារ៉ូ មានប្រសាសន៍បដិសេធថាមិនបានគំរាមអ្នកភូមិទេ ៖ «ខ្ញុំគ្រាន់តែសួរថា បងប្អូនយើងមានចោទខ្ញុំទេ? ថាអត់មានទេ ខ្ញុំក៏អរគុណ។ មើល៍ខ្ញុំសួរ ប៉ូលិសខ្ញុំមួយណាទៅនិយាយអ៊ីចឹង?»។
តាមពាក្យបណ្ដឹងរបស់អ្នកភូមិបានចោទទៅលើមនុស្ស៣នាក់មានឈ្មោះ ហ៊ុន សុគង់, ប៊ិន និង ថាន បានកាប់ឈើនិងដឹកជញ្ជូនឈើប្រណីតដែលអ្នកភូមិបានកត់ត្រាចំនួន២១៧ឡានគិតជាឈើប្រមាណ៥០០ម៉ែត្រគូប តាំងពីខែកញ្ញា ឆ្នាំ២០០៧ រហូតបច្ចុប្បន្នធ្វើឲ្យខូចផ្លូវលំក្នុងភូមិ។
ក្នុងបទសម្ភាសន៍ជាមួយវិទ្យុអាស៊ីសេរី មេឃុំតាអង លោក វ៉ាន់ ប៉ាន បានចោទប្រកាន់ប៉ូលិសប៉ុស្ដិ៍ថាជាអ្នកនៅពីក្រោយសកម្មភាពកាប់ឈើ។
អភិបាលរងស្រុកកូនមុំ លោក នូ ថេ មានប្រសាសន៍ថា លោក វ៉ាន់ ប៉ាន កាលពីដើមសប្ដាហ៍បានធ្វើលិខិតបដិសេធមកអាជ្ញាធរស្រុករួចហើយអំពីករណីចោទប្រកាន់មេប៉ុស្ដិ៍ ក៏ប៉ុន្តែលទ្ធផលស៊ើបអង្កេតរបាយការណ៍កាប់ឈើមិនទាន់ទទួលបាននៅឡើយ។ លោកថាមិនមាននរណាម្នាក់មានសិទ្ធិចាប់ខ្លួនអ្នកភូមិដោយគ្មានទោសកំហុសនោះទេ។
លោក នូ ថេ បានឲ្យដឹងថា ៖ «ខ្ញុំឲ្យស្រាវជ្រាវករណីរឿងហ្នឹង រឿងដីកាចាប់ខ្លួនមិនចាប់ខ្លួន។ អាហ្នឹងបើសិនជាមានដីកាពីតុលាការ អាហ្នឹងអាចចាប់ បើថាអត់មានរឿងអីចាប់បាន»។
វិទ្យុអាស៊ីសេរីមិនអាចទាក់ទងមេឃុំតាអង លោក វ៉ាន់ ប៉ាន ដើម្បីអធិប្បាយបញ្ហានេះបានទេ ក៏ប៉ុន្តែមន្រ្តីស៊ើបអង្កេតសមាគមអាដហុក លោក ប៉ែន ប៊ុណ្ណារ៍ មានប្រសាសន៍ថា ៖ «យើងបារម្ភពីសុវត្ថិភាព មិនត្រឹមតែសហគមន៍ទេ មន្រ្តីរបស់យើងអាដហុកហ្នឹងទៀតផង ព្រោះមានការគំរាមនៅពេលដែលគាត់ថត»។
កាលពីថ្ងៃពុធ ទី៨ តុលា អ្នកភូមិជាង១០នាក់រួមទាំងមន្រ្តីសមាគមការពារសិទ្ធិមនុស្សអាដហុកខេត្តរតនគិរីបាននាំគ្នាធ្វើដំណើរទៅកាន់តំបន់ព្រៃអភិរក្សចំណុចព្រៃគ្រុយ ចម្ងាយ៥គីឡូម៉ែត្រខាងលិចភូមិ ហើយបានប្រទះឃើញទីតាំងនិងវត្ថុតាងជនល្មើសពាក់ព័ន្ធមានជម្រកកម្មករកាប់ឈើ២កន្លែង សកម្មភាពជនពាក់ព័ន្ធកំពុងលើកឈើដាក់រថយន្តមួយគ្រឿង រទេះគោក្របីដឹកឈើ ម៉ាស៊ីនកាប់ឈើ និងគំនរឈើបេង នាងនួន ដែលអាររួចជាច្រើនគុម្ពោតនិងស្នាមដំរីអូសឈើទៀតផង៕