ការចាប់ខ្លួនត្រូវបានធ្វើឡើងនៅវេលាម៉ោងប្រមាណ ៣រសៀល ខណៈដែលពួកគេកំពុងតវ៉ានៅមុខសាលារាជធានីភ្នំពេញ ទាមទារសំណងចំពោះការរុះរើផ្ទះសម្បែងរបស់ពួកគាត់។
ប៉ូលិសបានចាប់អ្នកភូមិទាំងនោះដាក់ឡានបញ្ជូនទៅមណ្ឌលសង្គមកិច្ចព្រៃស្ពឺ ស្ថិតក្នុងខណ្ឌដង្កោ ជាយរាជធានីភ្នំពេញ។
ស្ត្រីឈ្មោះ ខៀវ ឡៃ អាយុ ៣៨ឆ្នាំ និងអ្នកភូមិបុរីកីឡាខ្លះទៀត បញ្ជាក់ប្រាប់តាមទូរស័ព្ទពីមណ្ឌលសង្គមកិច្ចព្រៃស្ពឺថា ពួកគាត់កំពុងតែព្រួយបារម្ភមិនដឹងថា នឹងត្រូវគេបញ្ជូនទៅទីណាទៀត៖ «ខ្ញុំកំពុងព្រួយបារម្ភ ខ្លាចទៅដល់ព្រៃស។ ខ្ញុំសុំឲ្យអង្គការជួយពួកខ្ញុំឲ្យឆាប់បានចេញ។ កំពុងព្រួយបារម្ភណាស់លោកពូ!។ ក្រុមប៉ូលិសចាប់ពួកខ្ញុំដាក់ឡាន ចាប់បងប្អូនយើងទាំងអស់គ្នា ចាប់ ៣០នាក់ បងជួយពួកខ្ញុំផង! ចាប់បោះពួកខ្ញុំដូចសត្វធាតុ»។
ស្ត្រីម្នាក់ទៀតឈ្មោះ ញឹម ផល្លា ដែលត្រូវប៉ូលិសចាប់ខ្លួនបញ្ជូនទៅមណ្ឌលសង្គមកិច្ចនោះដែរ អះអាងថា គាត់បានបាត់កូនប្រុស ២នាក់ ដែលម្នាក់មានអាយុ ១០ឆ្នាំ និងម្នាក់ទៀត អាយុ ១២ឆ្នាំ បន្ទាប់ពីប៉ូលិសចាប់ខ្លួនពួកគាត៖ «វាបាត់អស់រលីងហើយឥឡូវហ្នឹង។ ខ្ញុំធ្វើការទៀត អត់មានផ្ទះមានសម្បែងទៀតពូ។ រួចកូនខ្ញុំតូចមួយហើយវាកើតជំងឺរបេងទៀតពូ របេងសួតណា៎ ហើយតែយប់ឡើងវាស្ទះហើយ។ តែមិនបានទៅមន្ទីរពេទ្យគន្ធបុប្ផាទាន់យ៉ាប់ហើយពូ!»។
ទាក់ទិននឹងបញ្ហានេះ លោក អំ សំអាត ប្រធានបច្ចេកទេសការិយាល័យស៊ើបអង្កេត នៃការអង្គការសិទ្ធិមនុស្សលីកាដូ មានប្រសាសន៍ថា កន្លងទៅ មណ្ឌលសង្គមកិច្ចព្រៃស្ពឺ ជាមណ្ឌលសម្រាប់ដាក់អ្នកសុំទាន និងក្មេងអនាថាទេ តែពេលនេះ អ្នកបុរីកីឡាក៏ត្រូវបានគេបញ្ជូនទៅដាក់នៅទីនោះដែរ។
លោក អំ សំអាត បន្ថែមថា ចំណាត់ការរបស់អាជ្ញាធរមិនមែនជាដំណោះស្រាយ ហើយក៏មិនឆ្លើយទៅនឹងការទាមទាររបស់ក្រុមអ្នកតវ៉ាដែរ៖ «មិនព្យាយាមដោះស្រាយបញ្ហា បែរជាចាត់ទុកថាអនាថាហើយយកមកមណ្ឌលនេះគឺសម្រាប់ថា បង្រៀនវិជ្ជាជីវៈហើយនិងមានគោលនយោបាយក្រោយ។ អ៊ីចឹងបានន័យថាគ្មានការដោះស្រាយបញ្ហាដីធ្លីផ្ទះសម្បែងសម្រាប់ពួកគាត់ហ្នឹងទេ។ គេចាត់ទុកគាត់ជាជនអនាថា ហើយចាប់យកមកដាក់មណ្ឌលសង្គមកិច្ចរាជធានីភ្នំពេញ ហើយប្រវត្តិសាស្ត្រទើបតែមានមួយហ្នឹងទេ»។
កាលពីថ្ងៃទី៣ ខែមករា ឆ្នាំ២០១២ ក្រុមហ៊ុន ផាន អ៊ីម៉ិក រួមនឹងកងកម្លាំងអាជ្ញាធរ បានប្រើគ្រឿងចក្រឈូសកម្ទេចផ្ទះរបស់អ្នកបុរីកីឡា ជាង ២០០ខ្នង។ ប្រជាពលរដ្ឋប្រមាណ ២០០គ្រួសារ ត្រូវបានគេបញ្ជូនឲ្យទៅរស់នៅឯទួលសំបូរ ក្នុងសង្កាត់ព្រៃវែង ខណ្ឌដង្កោ រាជធានីភ្នំពេញ និងទៅនៅឯភ្នំបាត ក្នុងស្រុកពញាឮ ខេត្តកណ្ដាល។ រីឯប្រជាពលរដ្ឋមួយចំនួនទៀត មិនសុខចិត្តទៅរស់នៅតំបន់ទាំងនោះទេ ដោយពួកគាត់នៅបន្តការតវ៉ាក្នុងរាជធានីភ្នំពេញ ទាមទាររកយុត្តិធម៌ និងសំណងចំពោះការបណ្ដេញចេញនេះ៕