តួលេខនេះនៅមិនទាន់គិតដល់ការស្លាប់របស់ប្រជាពលរដ្ឋជាច្រើននាក់ទៀតដែលត្រូវបានរន្ទះបាញ់សំលាប់នៅខែឧសភាថ្មីៗនេះទេ។
មន្ត្រីជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយនៅកម្ពុជា នៅថ្ងៃទី៩ ខែឧសភា ឆ្នាំ២០១២ សំដែងការព្រួយបារម្ភអំពីសុវត្ថិភាពរបស់ប្រជាពលរដ្ឋនៅរដូវភ្លៀងធ្លាក់ ដោយសារមានប្រជាពលរដ្ឋជាង ៣០នាក់ហើយបានស្លាប់ដោយសារខ្យល់ព្យុះ និងរន្ទះបាញ់ នៅក្នុងរយៈពេល ៤ខែកន្លងមកនេះ។
មន្ត្រីជាន់ខ្ពស់រូបនេះបានសុំឲ្យប្រជាពលរដ្ឋ និងកសិករនានា ប្រុងប្រយ័ត្ននៅពេលភ្លៀងធ្លាក់ម្តងៗ។ ប្រជាពលរដ្ឋដែលបានស្លាប់ចំនួនជាង ៣០នាក់នោះ គឺស្ថិតនៅខេត្ត-ក្រុង ចំនួន ១៧ នៅប្រទេសកម្ពុជា ក្នុងនោះមានខេត្តបន្ទាយមានជ័យ ខេត្តបាត់ដំបង ខេត្តប៉ៃលិន និងខេត្តមួយចំនួនទៀត។
អនុប្រធាននាយកដ្ឋានព័ត៌មាននៃគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បានមានប្រសាសន៍ថា គណៈកម្មាធិការនេះកំពុងតែដំណើរការកម្មវិធីអប់រំប្រជាពលរដ្ឋនៅមូលដ្ឋានឲ្យចេះការពារខ្លួនពីរន្ទះបាញ់។
លោក កែវ វី៖ «ព្រោះថា មិនមែនតែគ្រោះមហន្តរាយទេ គឺថា យើងមិនអាចហៅថា បញ្ចៀសបាន គឺថា បើសិនយើងយល់ដឹងអំពីបញ្ហាហ្នឹងបាន យើងអាចកាត់បន្ថយបាន ដូចជាយើងបានផ្សព្វផ្សាយអំពីប័ណ្ណផ្សព្វផ្សាយរបស់ក្រសួងធនធានទឹកស្ដីអំពីវិធីបង្ការ និងការពារពីរន្ទះបាញ់ហ្នឹង។ សំខាន់ឲ្យគាត់វិលត្រឡប់ទៅផ្ទះ កុំឲ្យធ្វើការនៅទីវាលកុំឲ្យគាត់ជ្រកនៅក្រោមដើមឈើ បិទទូរស័ព្ទ»។
លោកបានបន្ទោសថា ការប្រែប្រួលអាកាសធាតុបានបង្កឲ្យមានបាតុភូតរន្ទះបាញ់ និងខ្យល់ព្យុះ និងទឹកជំនន់កន្លងមក។
ប្រជាពលរដ្ឋឈ្មោះ លឹម កាំង អាយុ ៥១ឆ្នាំ នៅភូមិគូលែន ឃុំគូលែន ស្រុកគូលែន ខាងជើង ខេត្តព្រះវិហារ បាននិយាយថា ប្រជាពលរដ្ឋមិនហ៊ានចេញក្រៅផ្ទះទេ នៅពេលភ្លៀងធ្លាក់មកម្តងៗ៖ «រំលងបាន ៣ថ្ងៃហើយហ្នឹង គ្នាទើបបានរៀបការ ហើយបានមួយសប្ដាហ៍ហើយបាញ់ស្លាប់ទាំងប្ដីទាំងប្រពន្ធ ជិះម៉ូតូ នៅភូមិឈូក ខេត្តព្រះវិហារ នេះឯង។ បារម្ភមែនទែនហ្នឹងហើយ ជាពិសេសឲ្យតែឃើញពេលភ្លៀង និងផ្លេកបន្ទោរ មិនដឹងជារត់ពួនទៅណាទេ។ បើប្រពន្ធខ្ញុំផង រុំភួយ... មិនដឹងធ្វើម៉េចទេ ហ្នឹងជាព្រហ្មលិខិតហ្នឹងឯង បើរន្ទះបាញ់ស្លាប់ទៅឯណាក៏មិនផុត»។
នៅក្នុងរយៈពេល ៤ខែដើមឆ្នាំ២០១២ កន្លងទៅនេះ ខ្យល់ព្យុះធ្វើឲ្យរំលំផ្ទះទាំងស្រុង ១៤២ខ្នង និងប៉ើងដំបូល និងជញ្ជាំងចំនួន ១៨២ខ្នង។ ខ្យល់ព្យុះមិនបានធ្វើឲ្យប្រជាពលរដ្ឋស្លាប់ទេ ប៉ុន្តែមានប្រជាពលរដ្ឋចំនួន ១២នាក់ បានរងរបួសដោយសារផ្ទះរំលំលើ។
ដោយឡែកនៅក្នុងរយៈពេល ៤ខែ ដើមឆ្នាំ២០១១ កន្លងទៅនេះ រន្ទះបាញ់បានសំលាប់ប្រជាពលរដ្ឋចំនួន ៣៧នាក់ និងរងរបួសចំនួន ៣៨នាក់។ លើសពីនេះទៀត គោ និងក្របីចំនួន ៣៤ក្បាលបានងាប់ដោយសាររន្ទះបាញ់។
នៅឆ្នាំ២០១១ កន្លងទៅនេះ បាតុភូតរន្ទះបាញ់បានសំលាប់ប្រជាពលរដ្ឋសរុបចំនួន ១៦៥នាក់នៅប្រទេសកម្ពុជា ដែលជាចំនួនមួយខ្ពស់គួរឲ្យព្រួយបារម្ភ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។