ក្រុមអ្នកផ្ទុកមេរោគអេដស៍ទាំងនោះបានទទូចសុំឲ្យលោក ហ៊ុន សែន ប្រមុខរដ្ឋាភិបាលកម្ពុជា និងសាលាក្រុងភ្នំពេញ រកទីតាំងថ្មីនៅជិតមណ្ឌលសុខភាពជំនួសឲ្យការជម្លៀសចេញឲ្យទៅរស់នៅខាងឆ្ងាយពីទីក្រុងភ្នំពេញ។
លោក ឈៀង តូមា អាយុ៤០ឆ្នាំ រស់នៅក្នុងបុរីកីទ្បា ក្រុងភ្នំពេញ ដែលផ្ទុកមេរោគអេដស៍ចាប់តាំងពីឆ្នាំ១៩៩៨មក បានថែ្លងប្រាប់វិទ្យុអាស៊ីសេរីអំពីការព្រួយបារម្ភថា ៖ «គោលការណ៍គេ គេថាថ្ងៃព្រហស្បតិ៍ហ្នឹងគេនឹងដាក់កម្លាំងចុះមករុះរើ។ កូនចៅ៦នាក់ ទាំងម៉ែទាំងឪ ៨នាក់ហើយ ដល់ពេលអ៊ីចឹងទៅខ្ញុំពិបាកណាស់សព្វថ្ងៃហ្នឹង»។
លោកស្រី ប្រាក់ សុភាព អាយុ៤៨ឆ្នាំ រស់នៅក្នុងបុរីកីទ្បាផងដែរ ដែលផ្ទុកមេរោគអេដស៍តាំងពីឆ្នាំ១៩៩៨មកម៉្លេះ បានថែ្លងដែរថា ៖ «សោហ៊ុយទៅមកពីរបីម៉ឺនមិនគ្រប់ទេ ហើយកម្រៃខ្ញុំរកបានសព្វថ្ងៃតែ៥ពាន់រៀលទេក្នុងមួយថ្ងៃ។ មណ្ឌលសុខភាពក៏វាឆ្ងាយដែរ។ សូមឲ្យអាជ្ញាធរដែនដី រាជរដ្ឋាភិបាល ហើយជាពិសេសគឺសម្ដេច ហ៊ុន សែន និងលោកជំទាវ ប៊ុន រ៉ានី ហ៊ុន សែន សូមជួយពួកខ្ញុំជនក្រីក្រហើយថែមទាំងមានផ្ទុកមេរោគអេដស៍ទៀត»។
ទាក់ទងនឹងការព្រួយបារម្ភខាងលើនេះ លោក ម៉ាន់ ឈឿន អភិបាលរងក្រុងភ្នំពេញ បានមានប្រសាសន៍បំភ្លឺថា គ្មានគម្រោងការជម្លៀសនោះទេ ប៉ុន្តែសាលាក្រុងភ្នំពេញបានស្នើសុំឲ្យមានការចាកចេញដោយស្ម័គ្រចិត្ត ហើយសាលាក្រុងភ្នំពេញមានគម្រោងការជួយឧបត្ថម្ភជាមធ្យោបាយដូចជាទ្បាំប៊្រឺតាសម្រាប់ពួកគាត់ធ្វើដំណើរនិងប្រកបមុខរបរចិញ្ចឹមជីវិតនៅទីតាំងថ្មីនោះ។
លោក ម៉ាន់ ឈឿន បានមានប្រសាសន៍ថា ៖ «និយាយឲ្យឃើញទៅ នេះជាព្រហ្មវិហារធម៌មួយកាន់តែធំទៀតហើយរបស់សាលាក្រុង។ អ្នកដែលនិយាយរើសអើង អ្នកដែលនិយាយថាបណ្ដេញចេញហ្នឹង អាហ្នឹងបាបធ្ងន់ណាស់ ទាំងខ្មែរ ទាំងបរទេស បើសិនជាមានគំនិតថាជាការបណ្ដេញ បាបធ្ងន់ណាស់»។
លោក អំ សំអាត ប្រធានផែ្នកស៊ើបអង្កេតនៃអង្គការសិទ្ធិមនុស្សលីកាដូដែលបានតាមដានរឿងនេះកន្លងមក បានថែ្លងថា ៖ «កាលណាជម្លៀសគាត់ចេញទៅឆ្ងាយគឺធ្វើឲ្យមធ្យោបាយនៃការផ្ដល់សេវាសុខភាពសម្រាប់គាត់នេះគឺយ៉ាប់យ៉ឺនសម្រាប់ពួកគាត់»។
កាលពីខែមេសាកន្លងទៅសាលាក្រុងភ្នំពេញមានផែនការជម្លៀសប្រជាពលរដ្ឋចំនួន៣២គ្រួសាររួចម្តងទៅហើយ ប៉ុន្តែត្រូវបានពន្យារដោយសារមានការទទូចស្នើសុំពីប្រជាពលរដ្ឋចំនួន៣២គ្រួសារនោះសុំរស់នៅជាបន្ត។
កាលពីថៃ្ងទី៩ ខែមេសាកន្លងទៅនេះ អង្គការលើកលែងទោសអន្តរជាតិ (Amnesty International) បានចេញសេចក្តីថែ្លងការណ៍មួយទទូចសុំឲ្យរដ្ឋាភិបាលកម្ពុជានិងសាលាក្រុងភ្នំពេញបញ្ឈប់ផែនការនៃការជម្លៀសក្រុមគ្រួសារអ្នកផ្ទុកមេរោគអេដស៍ចំនួន៣២គ្រួសារនោះឲ្យទៅរស់នៅខាងក្រៅទីក្រុងភ្នំពេញ នៅភូមិទួលសំបួរ សង្កាត់ព្រៃវែង ខណ្ឌដង្កោ ចម្ងាយប្រមាណ២០គីឡូម៉ែត្រខាងលិចជាយទីក្រុងភ្នំពេញ ដោយសារទីន្លែងនោះគេសង្កេតឃើញថា គ្មានភ្លើងអគ្គិសនីប្រើប្រាស់ គ្មានអនាម័យ គ្មានទឹកស្អាតប្រើប្រាស់ និងឆ្ងាយពីមណ្ឌលថែទាំសុខភាពសម្រាប់ព្យាបាលជំងឺរបស់ពួកគាត់៕