អតីតមេដឹកនាំខ្មែរក្រហម៣រូបនឹងត្រូវឃុំខ្លួនបន្តទៅទៀត

ដោយ ម៉ៅ សុធានី

2008-11-19

អតីតមេដឹកនាំខ្មែរក្រហមបីរូបនឹងត្រូវតុលាការខ្មែរក្រហមបន្តការឃុំឃាំងយ៉ាងតិចមួយឆ្នាំតទៅទៀតទម្រាំដល់ពេលកាត់សេចក្តីពីការចោទប្រកាន់ក្នុងបទឧក្រិដ្ឋប្រឆាំងមនុស្សជាតិនិងឧក្រិដ្ឋកម្មសង្គ្រាមនៅក្នុងរបបខ្មែរក្រហម។

ប្រភពព័ត៌មាន AFP រាយការណ៍ពីម្សិលមិញដោយដកស្រង់ប្រសាសន៍លោក យូ ប៊ុនឡេង ចៅក្រមស៊ើបអង្កេតនៃតុលាការខ្មែរក្រហមបានឲ្យដឹងថា ការសម្រេចបន្តឃុំខ្លួន លោក ខៀវ សំផន អាយុ៧៧ឆ្នាំ អតីតប្រធានគណៈប្រធានរដ្ឋនៃរបបកម្ពុជាប្រជាធិបតេយ្យដែលត្រូវផុតកំណត់នៅថ្ងៃពុធនេះ ពីព្រោះមានការភ័យខ្លាច លោក ខៀវ សំផន រត់គេចខ្លួននិងបារម្ភពីសុវត្ថិភាពរបស់លោកផងដែរ។

លោក សរ សូវាន មេធាវីរបស់ ខៀវ សំផន បានថ្លែងថា លោកនឹងប្តឹងចំពោះការសម្រេចបន្តឃុំខ្លួនកូនក្តីរបស់លោក។

ប្រភពដដែលបន្តថា ចៅក្រមតុលាការខ្មែរក្រហមកាលពីថ្ងៃ១០ វិច្ឆិកា ឆ្នាំ២០០៨កន្លងមកនេះ ក៏បានសម្រេចបន្តឃុំឃាំងខ្លួនលោក អៀង សារី អាយុ៨៣ឆ្នាំ អតីតរដ្ឋមន្ត្រីក្រសួងការបរទេសនិងភរិយា គឺអ្នកស្រី អៀង ធីរិទ្ធ អាយុ៧៦ឆ្នាំ អតីតរដ្ឋមន្ត្រីក្រសួងសង្គមកិច្ចផងដែរ ប៉ុន្តែលិខិតសម្រេចនេះទើបបានផ្សាយឲ្យដឹងក្នុងទំព័រវ៉ឹបសាយថ៍នៃតុលាការខ្មែរក្រហម កាលពីថ្ងៃច័ន្ទដើមសប្តាហ៍នេះ។

ចៅក្រមស៊ើបអង្កេត Marcel Lemonde និងលោក យូ ប៊ុនឡេង បានឲ្យដឹងថា ទាំង អៀង សារី និង អៀង ធីរិទ្ធ បានបដិសេធពុំព្រមនិយាយជាមួយចៅក្រមស៊ើបអង្កេតទេ ហើយដែលនេះជាសិទ្ធិរបស់គេ ក៏ប៉ុន្តែទង្វើនេះនឹងនាំឲ្យមានការយឺតយ៉ាវចំពោះដំណើរការកាត់សេចក្តីនៃតុលាការខ្មែរក្រហម៕

បោះពុម្ព អ៊ីម៉េល