បុគ្គលិកនៃសមាគមឃ្លាំមើលកម្ពុជា ៣រូប ត្រូវបានគេចាប់ដាក់ពន្ធនាគារ កាលពីថ្ងៃទី៣ សីហា និងបាញ់គំរាមឲ្យរបួសដៃម្នាក់ ដោយចោទពីបទថាបានទៅជំរិតទារប្រាក់ពីអ្នកដឹកជ្រូកនៅស្រុកមេមត់ ខេត្តកំពង់ចាម។
លោក នួន សាមិន ស្នងការប៉ូលិសខេត្តកំពង់ចាម បានឲ្យដឹងនៅថ្ងៃទី៥ សីហាថាសមាជិកនៃអង្គការក្រៅរដ្ឋាភិបាលបីនាក់នោះ បានទៅជំរិតទារប្រាក់ពីអ្នកដឹកជ្រូកក្នុងស្រុក ហើយប៉ូលិសគឺដោះស្រាយតាមពាក្យបណ្ដឹងចោទប្រកាន់របស់ប្រជាពលរដ្ឋតែប៉ុណ្ណោះ។
លោក ងួន មឿន បុគ្គលិកសមាគមអ្នកឃ្លាំមើលម្នាក់ បាននិយាយឲ្យដឹងមុនពេលចាប់ខ្លួនថា នៅយប់ទី២ សីហា ពួកខ្លួនបានទៅសាកសួរអ្នកដឹកជ្រូកឆ្លងដែន តាមភូមិខ្នងក្រពើ ស្រុកមេមត់ ចំនួន៨ម៉ូតូ ហើយថា ក៏មានប៉ូលិសបានបើករថយន្តមកដល់ ហើយក៏បាញ់គំរាមតែម្ដង។
លោក នី ចរីយា មន្ត្រីសិទ្ធិមនុស្សនៃសមាគមអាដហុក បានផ្ដល់ទស្សនៈថា ការចាប់មន្ត្រីអ្នកឃ្លាំមើល កម្ពុជាគឺជាការមិនត្រឹមត្រូវ។
មកទល់ពេលនេះ មានតែចៅក្រមតុលាការប៉ុណ្ណោះ បានអាចសាកសួរដឹង និងកាត់សេចក្ដីបានថា តើមនុស្សទាំងបីនាក់នោះខុស ឬមួយប៉ូលិសខុសក្នុងការចាប់អ្នកទាំងបី តាមពាក្យប្តឹងរបស់អ្នកស្រុក និងពាក្យប្ដឹងរបស់ភរិយាជនរងគ្រោះ។
លោក សា វឿន អ្នកចិញ្ចឹមជ្រូកនៅឃុំដា ស្រុកមេមត់បានលើកឡើងថា អាជីពរបស់លោកបានធ្លាក់ចុះនៅពេលដែលឃើញមានជ្រូកនាំចូលពីវៀតណាម តាមច្រកខ្នងក្រពើច្រើន ហើយលក់ក្នុងតម្លៃថោកជាងជ្រូកខ្មែរក្នុងស្រុក។
រដ្ឋមន្ត្រីក្រសួងកសិកម្មនៃប្រទេសកម្ពុជាបានប្រកាសប្រាប់គ្រប់ស្ថាប័នឲ្យទប់ស្កាត់ការនាំចូលជ្រូកពីបរទេស ដើម្បីការពារជំងឺឆ្លងថ្មីពីជ្រូកត្រចៀកខៀវ និងជំងឺប៉េស្តជ្រូកដោយថ្មីៗនេះ គេបានរកឃើញជំងឺនេះកើតមាននៅលើសត្វជ្រូក ពិសេសគឺនៅប្រទេសវៀតណាម៕