តំណាងប្រជាពលរដ្ឋស្រុកកណ្ដាលស្ទឹង លោក ជា ហ៊ី ដែលមានដីកាកោះហៅទៅបំភ្លឺនៅតុលាការខេត្តកណ្ដាល បានឲ្យដឹងថា មេធាវីសមាគមអាដហុកបានសុំពន្យារពេលកោះហៅនោះ ប៉ុន្តែស្រាប់តែនៅម៉ោងជិត ២រសៀល លោក វ៉ន វ៉ុន អាយុ៤៥ឆ្នាំ ត្រូវមន្ត្រីអាវុធហត្ថក្រុមហ៊ុនហេងអភិវឌ្ឍន៍បានមកចាប់ខ្លួននៅក្នុងហាងកាហ្វេមួយ។
លោកបានឲ្យដឹងថា ក្នុងដីកាចោទនោះ មិនត្រឹមត្រូវតាមសាច់រឿងទំនាស់ដីធ្លីនោះទេ ក្នុងដីកា គេដាក់ទីតាំងដីទំនាស់នៅលើផ្លូវជាតិលេខ២ ដែលមិនមែនជាកន្លែងដីមានទំនាស់នៅក្នុងឃុំជើងកើប ឃុំព្រែកហូរ និងឃុំកណ្ដោក ដែលប្រជាពលរដ្ឋបានតវ៉ានោះទេ។
វិទ្យុអាស៊ីសេរី មិនទាន់អាចសុំការបំភ្លឺពីអាជ្ញាធរខេត្តកណ្ដាល ជុំវិញការចាប់ខ្លួនប្រជាពលរដ្ឋខាងលើនេះបាននៅឡើយទេ នៅថ្ងៃទី៤ សីហា។
លោក ជា ហ៊ី បានឲ្យដឹងថា ប្រជាពលរដ្ឋកំពុងប្រមូលផ្តុំគ្នា ដើម្បីធ្វើការតវ៉ាពីករណីចាប់ខ្លួនតំណាងរបស់ពួកគេដាក់គុកនេះ៕