ការដោះលែងនោះបានធ្វើទ្បើងកាលពីថៃ្ងច័ន្ទកន្លងទៅថ្មីៗនេះ ដោយមិនទាន់មានមេធាវីការពារក្តីនៅទ្បើយទេ។ យោធិនពិការទាំងបីនាក់នោះ មានឈ្មោះ ថាច់ សារិន ឈ្មោះ ប៉ូ គីន និងឈ្មោះ ម៉ាត់ ម៉ារ៉េត។
លោក ថាច់ សារិន អាយុ ៤០ឆ្នាំ មានស្រុកកំណើតក្នុងខេត្តកណ្តាល ជាយោធិនពិការនៃសមាគមអភិវឌ្ឍន៍យោធិនពិការនៅក្នុងខេត្តកំពង់ធំ បានមានប្រសាសន៍ប្រាប់វិទ្យុអាស៊ីសេរី នៅថ្ងៃអង្គារនេះថា ៖ «ខ្ញុំមានសេចក្ដីរីករាយខ្លាំងណាស់ ដែលច្បាប់ស្រុកយើងបានគាំទ្រមនុស្សដែលធ្វើអ្វីដែលអត់មានខុសអីសោះ ហើយគេធ្វើទៅតាមលក្ខណៈច្បាប់គ្រប់គ្រាន់ត្រឹមត្រូវ។ ខ្ញុំទៅបម្រើការងារនៅកន្លែងតំបន់អភិវឌ្ឍន៍យោធិនពិការវិញដដែលទេ»។
លោក ម៉ាត់ ម៉ារ៉េត យោធិនពិការម្នាក់ទៀតបានមានប្រសាសន៍ផងដែរថា ៖ «ត្រេកអរខ្លះដែរ ហើយចំពោះការដែលខំតស៊ូទឹកដីនេះ ដើម្បីយោធិនពិការ ប្រជាពលរដ្ឋក្រីក្រទាំងអស់ហ្នឹង។ ឥឡូវគេដោះលែង ខ្ញុំអត់មានទោសពៃរ៍អីទេ។ ខ្ញុំនឹងប្រឹងអភិវឌ្ឍនៅទឹកដីហ្នឹងបន្តទៅទៀត»។
កាលពីថៃ្ងទី២២ ខែតុលានេះ យោធិនពិការ ៣នាក់ ត្រូវបានកងកម្លាំងនគរបាលចម្រុះនិងមន្រ្តីរដ្ឋបាលព្រៃឈើក្នុងខេត្តកំពង់ធំ ចាប់នាំខ្លួនពីសមាគមអភិវឌ្ឍន៍យោធិនពិការក្នុងខេត្តកំពង់ធំ ប្រគល់ឲ្យតុលាការខេត្តដើម្បីសាកសួរចម្លើយក្រោមបទសង្ស័យថា បានកាប់ព្រៃឈើខុសច្បាប់នៅក្នុងតំបន់បន្ទាយរងៀង ស្រុកសន្ទុក ខេត្តកំពងធំ។
មិនអាចទាក់ទងបានភ្លាមៗនៅឡើយទេចំពោះមន្រ្តីតុលាការខេត្តកំពង់ធំនិងមន្រ្តីរដ្ឋបាលព្រៃឈើក្នុងខេត្តនេះ ដើម្បីសុំសេចក្តីពន្យល់និងប្រតិកម្មជុំវិញការដោះលែងយោធិនពិការទាំង ៣នាក់ខាងលើនេះឲ្យមានសេរីភាពវិញនោះ។
លោក អ៊ុន ថាណន់ មន្រ្តីស៊ើបអង្កេតរបស់អង្គការសិទ្ធិមនុស្ស អាដហុក នៅក្នុងខេត្តកំពង់ធំ បានមានប្រសាសន៍ប្រាប់វិទ្យុអាស៊ីសេរីថា តុលាការខេត្តបានដោះលែងមនុស្ស ៣នាក់នោះឲ្យមានសេរីភាពជាស្ថាពរ ប៉ុន្តែយោធិនពិការចំនួន ៣នាក់ទៀតត្រូវបានតុលាការដោះលែងឲ្យនៅក្រៅឃុំជាបណ្តោះអាសន្នប៉ុណ្ណោះ។
លោក អ៊ុន ថាណន់ មានប្រសាសន៍ដូច្នេះថា ៖ «សមាគមគាត់មានការអន្តរាគមន៍មកពីលើ មិនដឹងមកពីណាខ្លះទេ អ៊ីចឹងទៅខាងតុលាការ គាត់ធ្វើដីកាមួយឲ្យដោះលែងនៅក្រៅឃុំ មិនមែនថា ដោះលែងទាំងអស់គ្នាទេ ៦នាក់ហ្នឹង គឺ ៣នាក់ ដោះលែងជាស្ថាពរ ហើយ ៣នាក់ទៀត ក្រៅឃុំបណ្ដោះអាសន្ន»។
លោកបានឲ្យដឹងថា តាមការស្រាវជ្រាវរបស់លោក សមាគមអភិវឌ្ឍន៍យោធិនពិការនោះ ត្រូវបានទទួលស្គាល់និងអនុញ្ញាតជាផ្លូវការរួចហើយដោយក្រសួងមហាផ្ទៃ ប៉ុនែ្តគេនៅមិនទាន់បានទទួលស្គាល់ជាផ្លូវការនៅឡើយ ចំពោះទីតាំងនៃសមាគមនេះ ទើបមានការចាប់ឃាត់ខ្លួនសមាជិកមួយចំនួននៃសមាគមនេះក្រោមបទចោទថា បានកាប់ទន្រ្ទានព្រៃឈើខុសច្បាប់ដើម្បីធ្វើទីតាំងនៃសមាគមនោះ៕