អ្នកភូមិពូរពេត ឃុំក្រុងតេស ស្រុកពេជ្រាដា ខេត្តមណ្ឌលគិរី កំពុងមានការភ័យបារម្ភក្រោយពីមានកុមារចំនួន ២នាក់ និងមនុស្សចាស់ម្នាក់បានឈឺស្លាប់ភ្លាមៗ ដោយមិនដឹងមូលហេតុ កាលពីថ្ងៃទី១៩ និងល្ងាចថ្ងៃទី២០ មីនាកន្លងមកនេះ ដោយមិនអាចបញ្ជូនទៅរកការសង្រ្គោះនៅមន្ទីរពេទ្យ ឬមណ្ឌលសុខភាពទាន់ឡើយ។
មេឃុំក្រុងតេស លោក ត្រេក សុផុន ដែលកំពុងជួយធ្វើក្តារមឈូសឲ្យសពអ្នកភូមិ មានប្រសាសន៍ឲ្យដឹងថា ក្នុងរយៈពេល ២ថ្ងៃ គឺនៅព្រឹកថ្ងៃទី១៩ មីនា មានកុមារីម្នាក់ឈ្មោះ រិន វ៉ាន់ឌីស អាយុ ៦ឆ្នាំ បានស្លាប់ ហើយនៅព្រឹកថ្ងៃទី២០ មីនា បុរសអាយុ ៤៩ឆ្នាំម្នាក់ ឈ្មោះ ប្រែ តេន ក៏បានឈឺស្លាប់ភ្លាមដែរ បន្ទាប់មកកុមារាម្នាក់ទៀតអាយុ ៨ឆ្នាំ ឈ្មោះ ពេជ ភារិទ្ធ បានឈឺស្លាប់ភ្លាមៗដែរនៅល្ងាចថ្ងៃដដែល។
លោក ត្រេក សុផុន បានឲ្យដឹងថា ៖ «ឥឡូវស្លាប់អស់ ៣នាក់ហើយ។ ម្សិលមិញស្លាប់មួយ យប់មិញម៉ោង១០ ស្លាប់មួយហើយ ល្ងាចមិញស្លាប់មួយទៀត។ ឥឡូវកំពុងធ្វើក្ដារមឈូស រវល់បន្តិច!»។
លោក ត្រេក សុផុន បញ្ជាក់ថា ស្ថានភាពអ្នកស្លាប់ទាំងនោះមិនមានឈឺពីមុនមកសោះ ប៉ុន្តែថ្ងៃកើតហេតុគ្រាន់តែចាប់ឈឺភ្លាមក៏ស្លាប់ភ្លាម មិនដឹងថាជាជំងឺអ្វី។
លោក ត្រេក សុផុន បញ្ជាក់ថា ៖ «អង្គុយសុខទៅៗ ស្រាប់តែឆួលមក ត្រជាក់ជុំវិញក្បាលពោះ ស្រាប់តែរមួលៗពោះទៅ ហើយចាប់ផ្ដើមចង់ក្អួត ស្រាប់តែព្រឺខ្លួនទាំងអស់ ត្រជាក់ជើង ត្រជាក់ដៃទាំងអស់អ៊ីចឹង! អត់មានក្ដៅ អត់មានអីទេ ប៉ុន្តែខ្ញុំពិបាកដែរ អាហ្នឹងយើងមើលពីក្រៅណា៎!»។
គ្រូបង្រៀនម្នាក់រស់នៅភូមិពូរពេត គឺលោក រឿន សារួន មានប្រសាសន៍ថា ថ្ងៃនេះអ្នកភូមិកំពុងរៀបចំធ្វើបុណ្យបញ្ចុះសពអ្នកទាំងនោះ។ ក្រោយចប់បុណ្យ ចាស់ទុំភូមិនឹងប្រជុំអំពីគម្រោងរើភូមិ ថាតើនឹងត្រូវរើភូមិចេញ ឬក៏យ៉ាងណា ព្រោះអ្នកភូមិមានការភ័យខ្លាចចំពោះការស្លាប់ផ្ទួនៗបែបនេះ។
លោកបានបន្តទៀតថា អ្នកភូមិមានកំហឹង និងចោទក្រុមហ៊ុន ខូវជីនី ដែលមកវិនិយោគនៅក្នុងតំបន់នេះថា បានឈូសឆាយប៉ះពាល់ដីព្រៃកប់ខ្មោច និងដីព្រៃអារ័ក្សរបស់ពួកគាត់ប្រមាណ ៥ហិកតា ជាហេតុធ្វើឲ្យអ្នកភូមិមានគ្រោះថ្នាក់កើតឡើង។
លោក រឿន សារួន បានមានប្រសាសន៍ថា ៖ «ឥឡូវគាត់ពិភាក្សាគ្នាថា នាំគ្នាចាកចេញពីភូមិនេះ បើស្លាប់នោះស្លាប់! តាមស្ថានភាពចាស់ៗគាត់និយាយ គាត់ថា ក្រុមហ៊ុនហ្នឹងកាប់ដើមឈើធំៗ មនុស្សដែលស្លាប់ដូចដើមឈើដែលគេកាប់អ៊ីចឹង!»។
ការឈឺស្លាប់ដោយមិនដឹងមូលហេតុជំងឺពិតប្រាកដនេះ មន្រ្តីសម្របសម្រួលអង្គការសិទ្ធិមនុស្ស អាដហុក ខេត្តមណ្ឌលគិរី លោក សម សារិន បានអំពាវនាវថា សូមឲ្យខាងសុខាភិបាលជួយចុះទៅពិនិត្យសាកសពជាបន្ទាន់។
លោក សម សារិន បានថ្លែងថា ៖ «ប្រាប់ពេទ្យ ត្រូវតែពិនិត្យទៅលើសាកសព ថាតើស្លាប់ដោយសារអី? ហើយតាមមូលហេតុអី? អាហ្នឹងសំខាន់ ដើម្បីធ្វើការវិនិច្ឆ័យ»។
ប្រធានប្រយុទ្ធនឹងជំងឺឆ្លងនៃមន្ទីរសុខាភិបាលខេត្តមណ្ឌលគិរី លោក ឡេក សុវណ្ណារ័ត្ន មានប្រសាសន៍ថា តំបន់នោះសំបូរគ្រុនចាញ់នាពេលកន្លងមក ដោយឡែកចំពោះករណីស្លាប់មនុស្ស ៣នាក់ចុងក្រោយនេះ លោកមិនទាន់បានដំណឹងនៅឡើយទេ ប៉ុន្តែលោកនឹងឲ្យខាងសុខាភិបាលចុះទៅពិនិត្យស្ថានភាពជំងឺ និងការស្លាប់ ក្រោយពីទទួលដំណឹងបែបនេះ។
ភូមិពូរពេត កាលពីខែធ្នូ ឆ្នាំ២០០៩កន្លងមក មានអ្នកភូមិចំនួន ៤នាក់បានស្លាប់ភ្លាមៗបន្តបន្ទាប់គ្នា ស្រដៀងនឹងករណីដែលកើតឡើងនេះដែរ ហើយការស្លាប់ទាំងនោះមិនត្រូវបានខាងសុខាភិបាលស្រាវជ្រាវបញ្ជាក់មូលហេតុនោះទេ៕