ជនជាតិព្នង៣នាក់នៅមណ្ឌលគិរីត្រូវបានចាប់ខ្លួនពីបទសង្ស័យថាសម្លាប់មនុស្ស

ដោយ ឱ ភារិទ្ធ

2008-10-09

ប៉ូលិសខេត្តមណ្ឌលគិរីបានចាប់ខ្លួនជនជាតិព្នងបីនាក់បញ្ជូនទៅកាន់ស្នងការដ្ឋានខេត្តកាលពីថ្ងៃទី៨ តុលា ពីបទសង្ស័យថាបានសម្លាប់ជនជាតិខ្មែរម្នាក់ដែលចោទប្រកាន់ថាចេះអំពើធ្មប់អាប។

ស្នងការប៉ូលិសខេត្តគឺលោក ញ៉ែម វណ្ណី បានផ្ដល់សម្ភាសន៍កាលពីថ្ងៃទី៨ តុលា ថា ជនជាតិភាគតិចបីនាក់នៅឃុំរ៉ឺយ៉ ស្រុកកោះញែក ត្រូវបានប៉ូលិសចាប់ខ្លួន និងម្នាក់ទៀតកំពុងស្វែងរកចាប់ខ្លួនពីបទបានធ្វើឃាតទៅលើជនជាតិខ្មែរម្នាក់នៅឃុំស្រែសង្គម ស្រុកកោះញែកដែរ ដោយចោទប្រកាន់ថាមកពីចេះធ្មប់អាប។

លោក ញ៉ែម វណ្ណី បានឲ្យដឹងថា ៖ «ម្សិលមិញហ្នឹងយើងចាប់បាន ២ ស្អែកឡើងយើងដំណើរការសួរ បានឆ្លើយដាក់ម្នាក់ទៀត។ ម្សិលមិញហ្នឹងយើងត្រឡប់ទៅដល់ស្រុកកោះញែក ចាប់បានម្នាក់ទៀត។ តាមចម្លើយរបស់ពីរនាក់ហ្នឹងថានៅមានម្នាក់ទៀត ប៉ុន្តែម្នាក់ហ្នឹងរត់ចូលព្រៃបាត់ហើយ ហើយខ្ញុំកំពុងតែដាក់កម្លាំងតាម»។

ប៉ូលិសប៉ុស្ដិ៍រដ្ឋបាលស្រែសង្គមបានឲ្យដឹងពីអត្តសញ្ញាណជនសង្ស័យដែលត្រូវចាប់ខ្លួនបីនាក់នោះ និងពីសកម្មភាពនៃការសម្លាប់នោះថា ដោយសារតែមានសាក្សីជាជនជាតិខ្មែរនៅទីនោះបានបំភ្លឺទើបចាប់បាន។

លោក ញ៉ែម វណ្ណី បានបញ្ជាក់ថា ៖ «ចាប់បានមុខសញ្ញាបីនាក់ហើយ មួយឈ្មោះ ទុន ញ៉ង អាយុ២១, ជុំ ហត់, គិត ស្លេះក្លែប អាយុ៣១ឆ្នាំ។ លើកទី១ចាប់បានពីរនាក់ ទី៦ ខែ១០ ហើយម្នាក់ទៀតចាប់ពីថ្ងៃ ៧ ម្សិលមិញ វាធ្វើឃាតថ្ងៃទី៥ ខែ៩ ហើយវាទុកលើផ្ទះមួយថ្ងៃ ម៉ោង១០យប់បានវាយកទៅកប់ អ៊ីចឹងប្រជាពលរដ្ឋយើងសង្ស័យការផឹកស៊ី ដល់ពេលវាសែងទៅកប់ មានគ្នាចំនួន៥នាក់។ ឥឡូវយើងតាមរកមុខសញ្ញាពីរនាក់ទៀតហើយ។ ខ្មោចនៅចម្ងាយពីផ្ទះប្រហែលជា៣០០ម៉ែត្រ»។

ឱក ឌឿន អាយុ៣៦ឆ្នាំ បានបាត់ខ្លួនកាលពីថ្ងៃទី៤ កញ្ញា នៅពេលដែលខ្លួនបានធ្វើដំណើរទៅកាន់ឃុំរ៉ឺយ៉កិនស្រូវនិងរកទិញមាន់សម្រាប់ធ្វើម្ហូបដើម្បីពឹងពាក់អ្នកជិតខាងឲ្យជួយស្ទូងស្រូវ ក្រោយមកក៏ឮដំណឹងថាមានគេសម្លាប់តែរកសាកសពមិនឃើញ។

ប៉ុន្តែស្នងការប៉ូលិស ញ៉ែម វណ្ណី បានបញ្ជាក់ថា ជនសង្ស័យទាំងបីនាក់ត្រូវបានគេនាំឲ្យទៅចង្អុលកន្លែងកប់សាកសព ឱក ឌឿន កាលពីព្រឹកថ្ងៃទី៨ តុលា ដើម្បីគាស់ជូនក្រុមគ្រួសារធ្វើបុណ្យបូជានៅទីនោះតែម្ដង។

សូមជម្រាបថា កាលពី៧ឆ្នាំមុនប្អូនប្រុសរបស់ ឱក ឌឿន ក៏ត្រូវបានជនជាតិភាគតិចសម្លាប់នៅឃុំរ៉ឺយ៉នេះដែរដោយចោទពីបទចេះអាបធ្មប់ដូចគ្នា ដែលអធិការស្រុកកោះញែកគឺលោក ម៉ែន សាវន់ បានអះអាងថា ទម្លាប់របស់ជនជាតិតែថាចេះអំពើអាបធ្មប់ហើយតែងតែតាមសម្លាប់ផ្ដាច់ពូជ ដែលបញ្ហានេះមន្រ្តីសិទ្ធិមនុស្សនៃអង្គការវីជីឡែន គឺលោក អែម វាសនា បានអះអាងថា អាបធ្មប់ពុំមានច្បាប់ណាចែងដាក់ជាកម្មវត្ថុសម្រាប់សម្លាប់ឡើយ។

ស្នងការប៉ូលិសខេត្ត លោក ញ៉ែម វណ្ណី បានអះអាងថា ជនសង្ស័យដែលសម្លាប់លោក ឱក ឌឿន នេះ ប្រហែលជាពាក់ព័ន្ធទៅនឹងការសម្លាប់របស់ប្អូនលោក ឱក ឌឿន កាលពី៧ឆ្នាំមុនដែរ ដូច្នេះក្រោយពីការចង្អុលបង្ហាញកន្លែងគាស់សាកសពហើយ ត្រូវបញ្ជូនទៅស្នងការដ្ឋានខេត្តដើម្បីបំពេញសំណុំបែបបទទៅតុលាការដើម្បីធ្វើការចោទប្រកាន់៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព