លោក អំ សំអាត ប្រធានការិយាល័យស៊ើបអង្កេតអង្គការលីកាដូ បានមានប្រសាសន៍នៅថ្ងៃអាទិត្យ ទី៦ ខែកុម្ភៈ ថា លោក ជា វណ្ណៈ អាយុ ២៧ឆ្នាំ, លោក វិត ប្រាក់ អាយុ ៣២ឆ្នាំ ត្រូវបានគេឃុំខ្លួនកាលពីថ្ងៃទី៣ ខែកក្កដា ឆ្នាំ២០០៧ ទាក់ទិនទៅនឹងករណីថ្នាំញៀន និងលោក កាន់ ផាត អាយុ ៥០ឆ្នាំ ត្រូវគេឃុំខ្លួនកាលពីថ្ងៃទី១៣ ខែកក្កដា ឆ្នាំ២០០៧ ដូចគ្នា ទាក់ទិនទៅនឹងករណីចោរកម្ម។
លោក អំ សំអាត បានបញ្ជាក់ថា ៖ «អ៊ីចឹងការឃុំខ្លួន បើសិនតុលាការរកអីមិនទាន់ឃើញទេត្រូវតែដោះលែងជនជាប់ចោទឲ្យនៅក្រៅឃុំជាបណ្តោះអាសន្នសិន ពីព្រោះមិនអាចឃុំគេខុសទៅនឹងនីតិវិធីទេ»។
លោកបន្តថា ជនសង្ស័យ ៣នាក់ត្រូវបានតុលាការឃុំខ្លួនអស់រយៈពេលជិត ៣ឆ្នាំមិនបាននាំមកជំនុំជម្រះឡើយ។
លោកបានមានប្រសាសន៍បន្តថា តាមអំណាចច្បាប់បទឧក្រិដ្ឋអនុញ្ញាតឲ្យឃុំខ្លួនរយៈពេល ១៨ខែ ប៉ុន្តែលើសពី ១៨ខែ ការឃុំខ្លួននោះគឺជារឿងខុសច្បាប់។
លោក អាំង មាលតី ប្រធានតុលាការខេត្តបន្ទាយមានជ័យ មិនអាចទាក់ទងសុំការបញ្ជាក់បាននៅថ្ងៃអាទិត្យនេះទេ ប៉ុន្តែលោក សូ វ៉ាត ជាព្រះរាជអាជ្ញា បានមានប្រសាសន៍ថា មិនទាន់ដឹងពីករណីនេះទេ។
លោក អាំង មាលតី បានមានប្រសាសន៍ថា ៖ «រឿងហ្នឹងខ្ញុំអត់ទាន់ដឹងយ៉ាងម៉េចទេ ទាល់តែខ្ញុំនៅកន្លែងធ្វើការ អាហ្នឹងខ្ញុំស្រួលត្រួតពិនិត្យ»។
លោក ជួប ម៉ៅ ឪពុកជនសង្ស័យឈ្មោះ ជា វណ្ណៈ រស់នៅឃុំគោករមៀត ស្រុកថ្មពួក ខេត្តបន្ទាយមានជ័យ បានមានប្រសាសន៍ថា កូនគាត់ និងមិត្តភ័កិ្តកូនឈ្មោះ វ៉ិត ប្រាក់ ត្រូវគេឃុំច្រើនឆ្នាំដោយពុំមានការជំនុំជម្រះឡើយ ៖ «ចាប់ទៅគេអត់ព្រមកាត់ទោស គេអត់ព្រមអីទេ! បើថា កាត់ទោសថា តើវាអាចជាប់យូរប៉ុណ្ណា អានោះស្រណុកដឹងឮ!»។
ចំណែកឯលោកស្រី ជា សុខងីម ត្រូវជាប្អូនលោក កាន់ ផាត បានមានប្រសាសន៍ថា គាត់ចំណាយលុយជាង ១ពាន់ដុល្លារឲ្យទៅមន្ត្រីតុលាការដើម្បីពន្លឿនរឿងក្តីបងប្រុសគាត់ តែមិនត្រូវបានគេនាំយកមកជំនុំជម្រះក្តីឡើយ។
លោកស្រី ជា សុខងីម បានអះអាងថា ៖ «គេនិយាយឡើង និយាយតែរឿងលុយ ទោះបីដាក់លុយក៏មិនបានផង។ ទៅព្រះរាជអាជ្ញាអស់ ៣៥០ដុល្លារ ប្រគល់លុយឲ្យលោក ហង់ សាមឿន តែម្តង។ អស់សាក្រោយគិតថាឲ្យគាត់នៅក្រៅឃុំ អស់ជាង ៣០០(ដុលា្លរ)ទៀត អស់ជាង ១ពាន់»។
ជនសង្ស័យទាំង ៣នាក់ខាងលើបច្ចុប្បន្នត្រូវគេឃុំខ្លួននៅពន្ធនាគារខេត្តបន្ទាយមានជ័យអស់រយៈពេលជិត ៣ឆ្នាំ គឺចាប់ពីខែកក្កដា ឆ្នាំ២០០៧ រហូតដល់ខែកុម្ភៈ ឆ្នាំ២០១០ ដោយពុំមានបើកការជំនុំជម្រះក្តី។
អង្គការសិទ្ធិមនុស្ស លីកាដូ បានជំរុញឲ្យក្រុមគ្រួសារជនសង្ស័យដាក់ពាក្យប្តឹងតាមផ្លូវច្បាប់ទៅឧត្តមក្រុមប្រឹក្សានៃអង្គចៅក្រមពិនិត្យមើលនីតិវិធីរបស់ចៅក្រមនីមួយៗ ដើម្បីដាក់ពិន័យចំពោះករណីដែលតុលាការឃុំខ្លួនមនុស្សខុសច្បាប់៕