ស្នងការនគរបាលរាជធានីភ្នំពេញ លោក ទូច ណារុថ មានប្រសាសន៍ថា លោកបានត្រៀមកម្លាំងសមត្ថកិច្ចចំនួន ៤៦០០នាក់ ដើម្បីការពារសុវត្ថិភាពចរាចរណ៍នៅតាមដងផ្លូវសំខាន់ៗ នៅតាមទីវត្តអារាមក្នុងមូលដ្ឋាន និងនៅតាមរមណីយដ្ឋានផ្សេងៗ ដែលប្រជាពលរដ្ឋតែងតែឆ្លៀតឱកាសទៅកម្សាន្ត នៅពេលចេញពីពិធីដាក់បិណ្ឌ និងបុណ្យភ្ជុំបិណ្ឌ។ លោកថា ការពង្រាយកម្លាំងនេះ ក៏ដើម្បីបង្ក្រាបបទល្មើសនានា ពីសំណាក់ជនខិលខូចមួយចំនួន ដែលឆ្លៀតឱកាសប្រព្រឹត្តល្មើស បង្កឲ្យមានភាពអសន្តិសុខ ៖ «គឺយើងរៀបចំការពារទាំងអស់ យើងយកចិត្តទុកដាក់ព្រោះបុណ្យភ្ជុំបិណ្ឌជាបុណ្យធំណាស់។ បើយើងគិតទៅធំជាងបុណ្យចូលឆ្នាំផង ហើយព្រោះវាពន្យារពេលដល់ទៅ១៥ថ្ងៃឯណោះ ដូច្នេះយើងរៀបចំការពារជូនប្រជាពលរដ្ឋតាមវត្តអារាម តាមដងផ្លូវ ក៏ដូចជាតាមរមណីយដ្ឋាន ជាពិសេសពេលដែលបោះបាយបិណ្ឌទាបភ្លឺហ្នឹង។»
របាយការណ៍ប្រចាំឆ្នាំរបស់ប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ផ្លូវគោកនៅកម្ពុជាបង្ហាញថា ចំនួនអ្នកស្លាប់ដោយគ្រោះថ្នាក់ចរាចរណ៍ក្នុងឱកាសបុណ្យភ្ជុំបិណ្ឌ ខែកញ្ញា ឆ្នាំ២០០៩ មានចំនួន១៣៥នាក់។
ប្រធានកម្មវិធីសុវត្ថិភាពចរាចរណ៍ផ្លូវគោកនៃអង្គការជនពិការអន្តរជាតិបែលហ្សិក កញ្ញា សាន សុជាតា បានថ្លែងថា ជាទូទៅក្នុងរដូវបុណ្យទាន ស្ថានភាពគ្រោះថ្នាក់តែងតែមានការកើនឡើងជាងថ្ងៃធម្មតា ដោយមូលហេតុចម្បងគឺពាក់ព័ន្ធទៅនិងការបើកហួសល្បឿនកំណត់ បើកបរក្នុងល្បឿនមិនសមស្របទៅនិងកាលៈទេសៈ និងការបើកបរក្នុងពេលស្រវឹង ៖ «អ៊ីចឹងទេទើបយើងជំរុញឲ្យពាក់មួកសុវត្ថិភាព ពេលធ្វើដំណើរជាពិសេសក្នុងពេលធ្វើបុណ្យហ្នឹងក៏ដោយ ទោះបីជាគាត់គិតថាគាត់ទៅវត្ត ប៉ុន្តែនៅតែធ្វើដំណើរតាមផ្លូវ អ៊ីចឹងចាំបាច់ដាច់ខាតត្រូវតែពាក់មួយសុវត្ថិភាព ទាំងអ្នកឌុប និងអ្នកជិះពីក្រោយ។ គឺយើងតែងតែជំរុញឲ្យមានការផ្តោតខ្លាំងទៅលើរឿងពាក់មួកសុវត្ថិភាព ព្រោះពាក់មួយសុវត្ថិភាពហ្នឹង គឺអាចកាត់បន្ថយការរបួសក្បាលបានច្រើន។»
មន្ត្រីកម្មវិធីសុវត្ថិភាពចរាចរណ៍ផ្លូវគោក នៃអង្គការជនពិការអន្តរជាតិបែលហ្សិក បានបញ្ជាក់ថា ស្ទើរតែ៧០ភាគរយ នៃអ្នកស្លាប់បានរងគ្រោះដោយបើកបរហួសល្បឿនកំណត់ និងការបើកបរក្នុងពេលស្រវឹង ៧៦ភាគរយ នៃអ្នកជិះម៉ូតូស្លាប់រងរបួសក្បាល។
របាយការណ៍ប្រចាំឆ្នាំរបស់ប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ផ្លូវគោកនៅកម្ពុជាឲ្យដឹងដែរថា ក្នុងឆ្នាំ២០០៩ ជនរងគ្រោះដោយសារគ្រោះថ្នាក់ចរាចរណ៍មានចំនួន២.១៥១៩នាក់ ក្នុងចំនួននេះ មានអ្នកបាត់បង់ជីវិតចំនួន១៧១៧នាក់ ដែលជាលទ្ធផលកើតឡើងពីការប៉ាន់ស្មាន គ្រោះថ្នាក់ចរាចរណ៍ចំនួន១២.៥៣៨ករណី។ ហើយធ្វើឲ្យខាតបង់ផ្នែកសេដ្ឋកិច្ចដោយគ្រោះថ្នាក់ចរាចរណ៍ ក្នុងឆ្នាំ២០០៩ មានតម្លៃប្រហែលជា ២៤៨លានដុល្លារអាមេរិក៕