បច្ចុប្បន្នក្រុមប្រជាពលរដ្ឋរាប់រយនាក់ បានប្រមូលផ្តុំគ្នាបិទផ្លូវជាតិលេខ ៧៦អា ពីស្រុកស្នួល ខេត្តក្រចេះ ទៅស្រុកកែវសីមា ខេត្តមណ្ឌលគិរី មិនឲ្យយានយន្តឆ្លងកាត់ ដើម្បីឲ្យអាជ្ញាធរជួយរកដំណោះស្រាយ។
តំណាងប្រជាពលរដ្ឋរស់នៅតំបន់កាបី ឬវាលបី ស្ថិតក្នុងឃុំពីរធ្នូ ស្រុកស្នួល ខេត្តក្រចេះ នៅព្រឹកថ្ងៃទី១៨ ខែមករា ឆ្នាំ២០១២ បានអះអាងថា នេះជាអំពើហិង្សាដែលត្រូវតែមានការដោះស្រាយសងដល់ប្រជាពលរដ្ឋដែលរងគ្រោះ។
លោក អ៊ុច អូន ជាតំណាងប្រជាពលរដ្ឋឃុំពីរធ្នូ បានឲ្យដឹងថា ការបាញ់រះរបស់កម្លាំងចំរុះការពារក្រុមហ៊ុន ធីធីវ៉ាយ បានបណ្តាលឲ្យពលរដ្ឋចំនួន ៤នាក់របួសធ្ងន់។
លោកបញ្ជាក់ថា ផ្តើមពីអំពើហិង្សានេះ ពលរដ្ឋរាប់រយនាក់បានប្រមូលផ្តុំគ្នាបិទផ្លូវជាតិលេខ ៧៦អា ពីស្រុកស្នួល ខេត្តក្រចេះ ទៅស្រុកកែវសីមា ខេត្តមណ្ឌលគិរី មិនឲ្យយានយន្តគ្រប់ប្រភេទធ្វើចរាចរណ៍ឆ្លងកាត់នោះទេ ដើម្បីទាមទារឲ្យមន្ត្រីពាក់ព័ន្ធជួយរកដំណោះស្រាយ។
តំណាងពលរដ្ឋបានសំណូមពរទៅលោកនាយករដ្ឋមន្ត្រី ហ៊ុន សែន ស្នើឲ្យដកសិទ្ធិក្រុមហ៊ុន ធីធីវ៉ាយ បញ្ឈប់មិនឲ្យធ្វើសកម្មភាពនាមូលដ្ឋាននេះតទៅទៀត។
ចំណែកក្រុមប្រជាពលរដ្ឋផ្សេងទៀត ក៏បានស្នើកិច្ចអន្តរាគមន៍ពីលោកនាយករដ្ឋមន្ត្រី ឲ្យជួយរកយុត្តិធម៌ជូនប្រជាពលរដ្ឋចំពោះសកម្មភាពបាញ់រះរបស់ទាហានការពារក្រុមហ៊ុន ធីធីវ៉ាយ ឲ្យបានឆាប់ និងត្រូវនាំជនល្មើសទៅផ្ដន្ទាទោសតាមច្បាប់។
ពលរដ្ឋឲ្យដឹងថា ពួកគាត់បានមករស់នៅ និងបង្កបង្កើនផលដូចជាដាំដំឡូងមី និងដាំស្វាយ នៅលើដីនេះតាំងពីឆ្នាំ២០០៦ មកម្ល៉េះ ប៉ុន្តែក្រោយពេលមានវត្តមានក្រុមហ៊ុន ធីធីវ៉ាយ មកបោះទីតាំងនៅមូលដ្ឋាននេះ គឺបានបង្កឲ្យមានវិវាទរំលោភយកដីធ្លីពលរដ្ឋជាបន្តបន្ទាប់ ដោយអាងអំណាចមន្ត្រីមានអំណាច។
ទាក់ទងបញ្ហានេះ លោក អ៊ីវ សាភុំ ជាអភិបាលស្រុកស្នួល ខេត្តក្រចេះ ដែលបានចុះដល់ទីតាំងកើតហេតុ បានឲ្យដឹងថា ទាំងថ្នាក់ដឹកនាំខេត្ត និងមន្ត្រីមូលដ្ឋាន កំពុងជួបចរចាជាមួយប្រជាពលរដ្ឋឲ្យបើកផ្លូវបានធ្វើចរាចរណ៍ឡើងវិញ និងរង់ចាំរកដំណោះស្រាយពេលក្រោយ។ ក្រៅពីនេះ លោកថា ជនរងគ្រោះពីការបាញ់រះ អាជ្ញាធរជាអ្នកចេញថ្លៃព្យាបាលជូនប្រជាពលរដ្ឋ។
លោក សំរិទ្ធ វណ្ណា ជាមន្ត្រីស៊ើបអង្កេតសមាគមអាដហុក ប្រចាំខេត្តក្រចេះ។ លោកបានសំណូមពរទៅសមត្ថកិច្ចរដ្ឋាភិបាល ត្រូវរកដំណោះស្រាយជូនពលរដ្ឋឲ្យបានឆាប់ ជាពិសេសត្រូវតាមចាប់ជនដៃដល់ប្រើអាវុធបាញ់រះយកមកផ្ដន្ទាទោសឲ្យបានឆាប់។
ចំណែកលោក អំ សំអាត ជាមន្ត្រីស៊ើបអង្កេតជាន់ខ្ពស់អង្គការលីកាដូ ដែលបានចុះអង្កេតដល់ទីកន្លែងកើតហេតុ។ លោកបានថ្កោលទោសចំពោះទង្វើរបស់ទាហានការពារក្រុមហ៊ុន ធីធីវ៉ាយ ដែលបានបាញ់ឲ្យពលរដ្ឋចំនួន ៤នាក់ រងរបួសធ្ងន់។ លោកបានអំពាវនាវទៅប្រមុខដឹកនាំរដ្ឋាភិបាល ជួយមានវិធានការដោះស្រាយឲ្យបានទាន់ពេលវេលា និងត្រូវពិនិត្យទៅលើការគ្រប់គ្រងកម្លាំងប្រដាប់អាវុធ និងអាវុធជាតិផ្ទុះសាឡើងវិញ។
ទាក់ទងអំពើហិង្សានេះ លោក អន ឆេងអ៊ន ជាសមាជិកក្រុមប្រឹក្សាស្រុកស្នួល ខេត្តក្រចេះ បានស្នើទៅរដ្ឋាភិបាល ត្រូវស្វែងរកជនដៃដល់ជាកម្លាំងការពារក្រុមហ៊ុន ធីធីវ៉ាយ ដែលបាញ់ពលរដ្ឋឲ្យរងរបួសយកមកផ្ដន្ទាទោសឲ្យបានឆាប់។
វិទ្យុអាស៊ីសេរីមិនអាចទាក់ទងលោកឧត្ដមសេនីយ៍ទោ អ៊ឹត សារិន ជាទីប្រឹក្សាអគ្គមេបញ្ជាការកងយោធពលខេមរភូមិន្ទ ក្រសួងការពារជាតិ ជាតំណាងក្រុមហ៊ុន ធីធីវ៉ាយ ដើម្បីបំភ្លឺបានទេ នៅរសៀលថ្ងៃទី១៨ ខែមករា ឆ្នាំ២០១២។
ទោះជាយ៉ាងណា ក្រុមប្រជាពលរដ្ឋបានអះអាងថា ពួកគេនឹងមិនបើកផ្លូវជាតិលេខ ៧៦អា ឲ្យរថយន្តបើកឆ្លងកាត់ទេ ដរាបណាអាជ្ញាធរមិនរកដំណោះស្រាយចំពោះការដែលកម្លាំងប្រដាប់អាវុធការពារក្រុមហ៊ុន ធីធីវ៉ាយ របស់លោកឧកញ៉ា ណា ម៉ារ៉ាឌី បាញ់ពលរដ្ឋឲ្យរងរបួសធ្ងន់ និងត្រូវបញ្ឈប់គ្រឿងចក្រក្រុមហ៊ុននេះ កុំឲ្យឈូសរំលោភយកដីចំការប្រជាពលរដ្ឋតទៅទៀតទេនោះ៕