ប្រធានមន្ទីរធនធានទឹកនិងឧតុនិយមខេត្តព្រះវិហារ លោក ជា មុនីវិសិដ្ឋ បានមានប្រសាសន៍ឲ្យដឹងកាលពីថ្ងៃព្រឹកថ្ងៃពុធ ទី២៤ ខែកញ្ញា ថា កម្ពស់ទឹកជំនន់នៅតាមតំបន់ដងស្ទឹង អាចនឹងឡើងថែមទៀតនៅប៉ុន្មានថ្ងៃខាងមុខ ដោយសារតែនឹងមានខ្យល់ព្យុះ ហើយលោកសុំឲ្យប្រជាពលរដ្ឋប្រុងប្រយ័ត្ន។
លោក ជា មុនីវិសិដ្ឋ មានប្រសាសន៍ថា ៖ «យើងបានប្រកាសអាសន្នជូនគាត់ហើយ ឲ្យគាត់មានការប្រុងប្រយ័ត្ន ព្រោះស្ថានភាពទឹកដែលឡើង ពីព្រោះនឹងមានព្យុះមួយ ធ្វើឲ្យកម្ពស់ទឹកឡើងលឿនបាន។ ថ្ងៃនេះចាប់ផ្ដើមស្រកវិញ ស្រកបាន ៥សង្ទីម៉ែត្រហើយ»។
លោក ជា មុនីវិសិដ្ឋ បានឲ្យដឹងថា ទឹកជំនន់បណ្ដាលពីភ្លៀង បានលិចស្រុកចំនួន ៤ នៃខេត្តព្រះវិហារ គឺស្រុកជាំក្សាន្ត ស្រុកគូលែន ស្រុកត្បែងមានជ័យ និងស្រុកជ័យសែន។ ហើយមកទល់ថ្ងៃពុធ បើទោះបីជាទឹកបានស្រកចុះ ៥សង្ទីម៉ែត្រក៏ដោយ ក៏កម្ពស់ទឹកជំនន់នៅតាមមាត់ស្ទឹង នៅមានកម្ពស់ ១,៧០ម៉ែត្រ នៅឡើយ។
មន្រ្តីអាជ្ញាធរបាននិយាយថា ទឹកជំនន់ដែលកំពុងជន់លិចស្រុកចំនួន ៤នេះ បានប៉ះពាល់ដល់សត្វពាហនៈ ដំណាំចម្ការ និងស្រូវសន្ទូងខ្លះ ក៏ប៉ុន្តែគេមិនទាន់បានដឹងស្ថិតិច្បាស់លាស់នៅឡើយទេ។
ប្រធានមន្ទីរកសិកម្មខេត្តព្រះវិហារ លោក ពឹង ទ្រីដា បានមានប្រសាសន៍ថា តាមតួលេខបណ្ដោះអាសន្ន លោកដឹងថា សន្ទូងកសិករប្រមាណ ១ពាន់ហិកតារកំពុងត្រូវទឹកជន់លិច ហើយផលដំណាំមួយចំនួនត្រូវខូចខាត ៖ «ល្ងាចមិញនេះ ផលប៉ះពាល់ ៤ស្រុក វាអស់ជាង ១ពាន់ហិកតារ។ អត់ទាន់រលួយខូចទេ ព្រោះទឹកវាឡើងខ្លាំងចាប់ពីថ្ងៃ១៧ មក ប៉ុន្តែនៅតំបន់ខ្ពង់រាបយើងហ្នឹង ទឹកវាមានចលនា ដូច្នេះការលិចស្រូវហ្នឹង រយៈពេលមួយអាទិត្យ ទៅ ១០ថ្ងៃហ្នឹង អត់អីទេ ប៉ុន្តែបើវាយូរជាងនេះ វាគ្រាន់តែប៉ះពាល់ទិន្នផលធ្លាក់ចុះ ក្នុងកម្រិតណាមួយទេ បើថាឲ្យខូចទាំងស្រុងតែម្ដងអត់ទេ»។
មន្រ្តីដដែលបានមានប្រសាសន៍ថា មន្ទីរកសិកម្មកំពុងត្រៀមពូជស្រូវសម្រាប់ផ្ដល់ឲ្យកិសករដែលប៉ះពាល់ដោយសារទឹកជំនន់ ឲ្យត្រៀមធ្វើស្រែឡើងវិញ និងត្រៀមវ៉ាក់សាំងសម្រាប់ចាក់ការពារសត្វគោ ក្របី នៅក្រោយទឹកជំនន់ផង។
ក្រុមប្រជាពលរដ្ឋនៅភូមិដំណាក់ ឃុំកំពង់ប្រណាក ស្រុកត្បែងមានជ័យ បានឲ្យដឹងថា ពេលនេះ ទឹកជំនន់កំពុងលិចភូមិនិងវាលស្រែរបស់ពួកគេ ហើយអ្នកភូមិជាច្រើនកំពុងចាកចោលផ្ទះ ទៅរកទីទួល ៖ «លិចច្រើនដែរ ១២៧ខ្នងផ្ទះ គ្រាន់លិច។ ទឹកល្ហល្ហាច។ ប្រជាជននៅផ្ទះធ្វើទ្រនើរឡើងខ្លះ ឡើងគោកខ្លះ រកទួល នៅផ្ទះបងប្អូន។ សត្វអីសែងមកលើអស់ហើយ ងាប់អស់ហើយដំណាំអី គ្មានសល់ទេ»។
សូមរំឭកថា កាលពីអំឡុងខែសីហា ឆ្នាំ២០០៧ កន្លងមក ទឹកជំនន់បានលិចស្រុកទាំង៧ នៃខេត្តព្រះវិហារ ដែលបណ្ដាលឲ្យស្រ្តីម្នាក់និងកុមារម្នាក់បានស្លាប់ ផ្ទះចំនួនជាង ២២៩០ខ្នង ត្រូវទឹកលិចនិងសត្វគោក្របី ប្រមាណ ៨០ក្បាល បានងាប់និងបាត់ខ្លួន៕