អ្នកភូមិនៃសហគមន៍ជនជាតិដើមភាគតិចរស់នៅភូមិប៉ាតាង ឃុំប៉ាតាង ស្រុកលំផាត់ ខេត្តរតនគិរី ចោទប្រកាន់មេឃុំ និងមេភូមិរបស់ខ្លួនថា បានលួងលោមពួកគាត់ឲ្យឆ្លើយទម្លាក់កំហុសទៅលើសមាជិកសហគមន៍ចំនួនពីរនាក់ថា បានញុះញង់ឲ្យគាត់ផ្ដិតមេដៃតវ៉ាទាមទារដីសហគមន៍ជាង ២០០ហិកតា ដែលក្រុមហ៊ុន ឌី.អឹម ហ្រ្គូប កំពុងគ្រប់គ្រង ឬកុំឲ្យចូលខ្លួនទៅតុលាការតាមដីកាកោះហៅក្នុងរឿងតវ៉ានោះ។
អ្នកភូមិឈ្មោះ ណិត ផាន មានប្រសាសន៍បញ្ជាក់នៅឯការិយាល័យសមាគមអាដហុក ខេត្តរតនគិរី នៅថ្ងៃអង្គារ ទី៧ ខែកញ្ញា ឆ្នាំ២០១០ ពីការចោទប្រកាន់ខាងលើថា ៖ «បង្ខំឲ្យខ្ញុំប្រាប់ថា បងថន បងវ៉េវ អូសទាញខ្ញុំ។ ហាមដែរ ហាមអូនឯងកុំទៅតុលាការ អូនឯងល្ងង់និយាយផ្ដេសផ្ដាសហ្នឹង»។
វិទ្យុអាស៊ីសេរីមិនអាចទាក់ទងមេភូមិប៉ាតាង លោក ថែង ម៉ាំង ដើម្បីបំភ្លឺសេចក្ដីចោទរបស់អ្នកភូមិបានទេ ក៏ប៉ុន្តែមេឃុំប៉ាតាង លោក គឹត ចេន បានបដិសេធសេចក្ដីចោទនោះ ៖ «វាចេះតែនិយាយៗទៅ ខ្ញុំអត់បញ្ហាទេ»។
មេធាវីការពារក្ដីសមាគមអាដហុក លោក ឡុង លន់ មានប្រសាសន៍បញ្ជាក់ថា អ្នកភូមិ ៤នាក់ ដែលតុលាការចេញដីកាកោះហៅមានឈ្មោះ ស្វិន វ៉េវ, យ៉ាង ថន, យ៉ា ខាំនា អ្នកទាំងបីជាកូនក្ដីរបស់លោកដែលក្រុមហ៊ុន ឌី.អឹម ហ្គ្រូប ប្តឹងចោទពីបទរំលោភដី និងបំផ្លាញដើមកៅស៊ូក្រុមហ៊ុន ហើយត្រូវតុលាការចេញដីកាដាក់ឲ្យស្ថិតក្រោមការត្រួតពិនិត្យរបស់តុលាការ។ លោកបន្តថា ការកោះហៅលើកនេះ គឺដើម្បីមកឆ្លើយបំភ្លឺពីករណីមិនគោរពការសន្យានេះ ហើយលោកក៏នឹងទទួលការពារក្ដីឲ្យអ្នកភូមិឈ្មោះ ណិត ផាន ដែលត្រូវកោះហៅពីបទជាប់ពាក់ព័ន្ធករណីនេះដែរ។
ចៅក្រមស៊ើបសួរតុលាការខេត្តរតនគិរី លោក ថោ សារ៉ន កាលពីខែកញ្ញា ឆ្នាំ២០១០ បានចេញដីកាកោះហៅអ្នកភូមិប៉ាតាងជំនូន ៤នាក់ ឲ្យចូលខ្លួនទៅតុលាការ បន្ទាប់ពីអ្នកភូមិប៉ាតាងប្រមាណ ៥០នាក់ បានផ្ដិតមេដៃជាតវ៉ាសុំឲ្យតុលាការដោះស្រាយរឿងដីធ្លី ដែលអ្នកភូមិអះអាងថា ត្រូវក្រុមហ៊ុនរំលោភយកដោយខុសច្បាប់តាំងពីឆ្នាំ២០០៧មក ហើយពុំមានការដោះស្រាយ។ ចំណែកអ្នកភូមិជាង ១០នាក់ត្រូវក្រុមហ៊ុនប្ដឹងចោទប្រកាន់វិញថា រំលោភដី និងបំផ្លាញដើមកៅស៊ូក្រុមហ៊ុន។ ក្នុងនោះអ្នកភូមិជាង ១០នាក់បានប្រឈមមុខនឹងការចោទតាមផ្លូវតុលាការកាលពីឆ្នាំ២០០៩។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តរតនគិរី លោក ប៉ែន ប៊ុណ្ណារ៍ មានប្រសាសន៍បញ្ជាក់ថា អ្នកភូមិខាងលើបានមកដល់ការិយាល័យរបស់លោក ដើម្បីសុំកិច្ចអន្តរាគមន៍ពីសេចក្ដីរាយការណ៍ខាងលើ ៖ «បើសិនអ្នកភូមិត្រូវវិញ មេឃុំហ្នឹងចូលបទញុះញង់ហើយ»។
ចៅក្រមតុលាការខេត្តរតនគិរី លោក ថោ សារ៉ន មានប្រសាសន៍បញ្ជាក់ថា ការចោទប្រកាន់របស់អ្នកភូមិ វាជាបញ្ហារវាងអ្នកភូមិ និងមន្ត្រីមូលដ្ឋាន ៖ «ក្រែងតែហៅមកសួរអង្កេតឃើញថា ពិតជាបង្ខំអ៊ីចឹងមែន មានភស្តុតាងគ្រប់គ្រាន់ អាហ្នឹងវាខុសហើយ»។
អ្នកភូមិប៉ាតាងជាង ១០០គ្រួសារ កាលពីឆ្នាំ២០០៥ បានប្ដឹងទាមទារដីជាង ២០០ហិកតា ដែលអ្នកភូមិគ្រប់គ្រងដាំដុះតាំងពីឆ្នាំ១៩៧៩ ប៉ុន្តែអ្នកភូមិសាយ៉ោះ ឃុំកាឡែង មានព្រំប្រទល់ជាប់គ្នា បាននាំគ្នាផ្ដិតមេដៃលក់ដីនោះ និងមានការចូលរួមចុះហត្ថលេខាដោយមន្ត្រីមូលដ្ឋានឃុំកាឡែង និងស្រុកលំផាត់ ដោយសំអាងថា ដីនោះជាដីអតីតដូនតារបស់អ្នកភូមិជនជាតិដើមភូមិសាយ៉ោះគ្រប់គ្រងពីសម័យមុនឆ្នាំ១៩៧៩ ហើយបន្ទាប់មកដីត្រូវបានគេលក់បន្តទៅឲ្យក្រុមហ៊ុន ឌី.អឹម ហ្គ្រូប ធ្វើការឈូសឆាយដាំកៅស៊ូតាំងពីឆ្នាំ២០០៧ រហូតមក៕