ប្រភពពីប្រជាពលរដ្ឋនិងសកម្មជនការពារសិទ្ធិមនុស្សនៅខេត្តកំពតបានឲ្យដឹងថា មានក្រុមយោធាចំនួន ៤នាក់មកពីកងពលអន្តរាគមន៍លេខ១១ នៅថៃ្ង៤ កុម្ភៈ បានមកកាប់បំផ្លាញដើមឈើហូបផ្លែជាច្រើនដើម និងបានប្រើអំពើហិង្សាលើស្រ្តីម្នាក់ ព្រមទាំងបានគំរាមរឹបអូសយកដីធ្លីចំនួន ២ហិកតារបស់គាត់ទៀត។
ជាមួយគ្នានេះសកម្មជនការពារសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជាបានរងការដេញកាប់និងគំរាមសម្លាប់ នៅគ្រាដែលសកម្មជនរូបនោះបានទៅតាមដាន និងថតយករូបភាពអំពីសកម្មភាពប្រើអំពើហិង្សានោះ។
នេះជាលើកទីពីរហើយ ក្រោយពីអំពើហិង្សាលើកដំបូងបានកើតមានទ្បើងកាលពីពេលថ្មីៗនេះ។ យោធាចំនួន ៤នាក់នោះមានឈ្មោះ ង៉ែត វ៉ន ហៅ អឿន, សុខ កុសល, នៅ ជឿន និង ព្រំ ឈាន ដែលបានរងការចោទប្រកាន់ពីប្រជាពលរដ្ឋនោះ។
ប្រជាពលរដ្ឋរងគ្រោះដោយអំពើហិង្សាឈ្មោះ មាណ ណាំង អាយុ ៣៩ឆ្នាំ នៅក្នុងភូមិត្រពាំងឈើទាល ឃុំច្រេស ស្រុកជុំគិរី ខេត្តកំពត បានថ្លែងប្រាប់វិទ្យុអាស៊ីសេរីនៅថ្ងៃព្រហស្បតិ៍នេះ ថា ៖ «វាអត់មានថាអីទេ វាមកដល់កាប់ផូងៗតែម្ដង! ស្វាយអស់ ១៧(ដើម) ដូង ២ដើម ខ្នុរ ៣ដើម ហើយទៀប ៣ដើម។ វាគំរាមខ្ញុំ ហើយធាក់ខ្ញុំមួយជើង ហើយកាច់ដៃខ្ញុំទៀត! គោលបំណងវាចង់បានដី ២ហិកតា។ ព្រួយ ភ័យ ញ័រអស់ហើយ!»។
លោក ព្រំ ពិសិទ្ធិ ជាសកម្មជននៃមជ្ឈមណ្ឌលសិទ្ធិមនុស្សកម្ពុជានៅក្នុងខេត្តកំពត ដែលបានតាមដាននិងថតរូបភាពអំពីអំពើហិង្សាលើស្រ្តីនោះ ក៏រងទទួលរងការគំរាមពីក្រុមយោធានោះផងដែរ។ លោកបានអះអាងថា យោធាឈ្មោះ ង៉ែត វ៉ន ហៅ អឿន បានប្រើកាំបិតដេញកាប់លោក។
លោក ព្រំ ពិសិទ្ធិ បានបញ្ជាក់ថា ៖ «ខ្ញុំមានការព្រួយបារម្ភពីសុវត្ថិភាពរបស់ខ្ញុំ ព្រោះថា វាដេញសម្លាប់ខ្ញុំអត់បាន ហើយវាថា មិនឲ្យរួចខ្លួនទៀត!»។
សុខ សេរី ៖ គេគំរាមថាម៉េច? ព្រំ ពិសិទ្ធិ ៖ វាដេញកាប់ខ្ញុំតែម្ដង ដេញ ខ្ញុំរត់តែម្ដង ហើយដល់ពេលខ្ញុំរត់រួច វាថា "អ្ហែងរត់រួចក៏អត់ឲ្យរួចខ្លួនដែរ អញសម្លាប់អ្ហែងឲ្យបាន"។
វិទ្យុអាស៊ីសេរីនៅមិនទាន់អាចទាក់ទងបាននៅឡើយទេពីក្រុមយោធាចំនួន ៤នាក់នោះ ដើម្បីសុំការបញ្ជាក់អំពីការអះអាងរបស់ជនរងគ្រោះខាងលើបាននៅទ្បើយទេនៅថ្ងៃទី៤ កុម្ភៈនេះ។
មេឃុំច្រេស នៅក្នុងស្រុកជុំគិរី ខេត្តកំពត លោក អ៊ូ យឿន ដែលកំពុងតែចុះទៅដោះស្រាយផ្ទាល់ជាមួយនឹងអាជ្ញាធរស្រុក បានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទមកថា ៖ «ខ្ញុំមកដល់កន្លែងកើតហេតុហើយ មកទាំងពីចៅហ្វាយស្រុកអី»។
សុខ សេរី ៖ បំណងនៃយោធា ៤នាក់ហ្នឹងគឺចង់បានអ្វី? អ៊ូ យឿន ៖ ចង់បានដីហ្នឹង។ សុខ សេរី ៖ តើជាដីស្របច្បាប់របស់គាត់ ៤នាក់ហ្នឹង ឬក៏ជាដីស្របច្បាប់របស់ប្រជាពលរដ្ឋ? អ៊ូ យឿន ៖ អត់ស្របច្បាប់ទេ អាហ្នឹងវាបំពានលើគ្នាអ៊ីចឹង បំពានលើអាធ្វើមុន។
សុខ សេរី ៖ លោកពូមានគម្រោងការអន្តរាគមន៍ទៅមេបញ្ជាការដើម្បីបញ្ឈប់សកម្មភាពយោធា ៤នាក់ហ្នឹងទេ? អ៊ូ យឿន ៖ ចៅហ្វាយស្រុកគាត់បានតេទៅឲ្យបញ្ឈប់សកម្មភាពហ្នឹង។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានមានប្រសាសន៍ថា ការដេញតាមកាប់សកម្មជនសិទ្ធិមនុស្សគឺជាការប៉ុនប៉ងធ្វើឃាតដោយចេតនា គួរឲ្យព្រួយបារម្ភ។
លោក អ៊ូ វីរៈ បានមានប្រសាសន៍ថា ៖ «ករណីនេះបើសិនជាមានការរារាំងមិនឲ្យថតមិនឲ្យអីអ៊ីចឹង ហើយប្រឹងប្រែងលាក់បាំងនូវព័ត៌មាន គឺយើងមានការព្រួយបារម្ភជាខ្លាំង!»។
ទំនាស់ដីធ្លីរវាងយោធាជាមួយនឹងគ្រួសារខាងលើនេះបានបន្តសេសសល់ក្រោយពីរឿងវិវាទដីធ្លីធំមួយរវាងគ្រួសារប្រជាពលរដ្ឋចំនួនជាង ៣០០គ្រួសារ ជាមួយនឹងកងយោធាអន្តរាគមន៍លេខ១១ នៅក្នុងឃុំច្រេស ស្រុកជុំគិរី ខេត្តកំពត ដែលបានចាប់ផ្តើមតាំងពីឆ្នាំ២០០១ ក្នុងការដណ្តើមដីធ្លីជាច្រើនរយហិកតា បានញ៉ាំងឲ្យមានអំពើហិង្សាជាច្រើនលើកកន្លងមក៕