ប្រតិកម្មនេះបានកើតមានឡើងបន្ទាប់ពីតុលាការខេត្តក្រចេះ បានកោះអញ្ជើញប្រជាពលរដ្ឋ៤នាក់មកសាកសួរបំភ្លឺកាលពីថ្ងៃទី១៧ វិច្ឆិកា អំពីករណីដែលថា បានបំផ្លិចបំផ្លាញទ្រព្យសម្បត្តិនិងប្លន់តាមពាក្យបណ្ដឹងចោទប្រកាន់របស់ក្រុមហ៊ុន ស៊ីអាយវី។
ប្រជាពលរដ្ឋនៅភូមិមានជ័យនិងនៅឃុំ២ធ្នូ ប្រមាណ ៣៥០នាក់ បាននាំគ្នាមកពាសពេញមុខតុលាការខេត្តដែរ កាលពីថ្ងៃទី១៧ វិច្ឆិកា ដោយអះអាងថា ខ្លាចការកោះអញ្ជើញរបស់តុលាការក្លាយជាការចាប់ខ្លួន។
តំណាងប្រជាពលរដ្ឋនៅឃុំ ២ធ្នូ គឺលោក វ៉ាន់ ចាន់ បានផ្ដល់សម្ភាសន៍ថា ជនជាតិស្ទៀង មិនឲ្យតំណាងរបស់ខ្លួនឲ្យគេចាប់ដោយសារតែការពារដីធ្លីឲ្យពួកគេនោះឡើយ ៖ «គេថា ឲ្យតែតុលាការហៅគឺត្រូវតែឃាត់ខ្លួនសិនហើយដើម្បីរកដំណោះស្រាយ បានជាខ្ញុំខ្លាច។ ដូចប្រជាជនខ្ញុំជនជាតិស្ទៀងអ៊ីចឹង គាត់ថា បើយើងអត់គិតមុន បើជាប់យើងបាននរណាទៅជួយ អ៊ីចឹងគាត់មកទាំងអស់គ្នាទៅដើម្បីបានឃើញនឹងភ្នែក បើថាគេចាប់ម៉េចៗ បងប្អូនគិតថា ធ្វើយ៉ាងម៉េច គឺគាត់នាំគ្នាធ្វើតែម្ដង»។
សូមជម្រាបថា ការកោះអញ្ជើញតំណាងប្រជាពលរដ្ឋ ៥នាក់ តែមកបានតែ ៤នាក់ ដោយខុសឈ្មោះម្នាក់នេះ បានកើតមានឡើងបន្ទាប់ពីប្រជាពលរដ្ឋ ៤ភូមិ នៅក្នុងឃុំស្រែចា និងឃុំ២ ធ្នូ ព្យាយាមរារាំងទប់ស្កាត់មិនឲ្យក្រុមហ៊ុន ស៊ីអាយវី ឈូសឆាយប៉ះពាល់លើដីចម្ការចាស់របស់ពួកគេ ដែលជនជាតិទាំងនោះអះអាងថា បានមករស់នៅតាំងពីសង្គមចាស់មកម្ល៉េះ តែរាល់ការរារាំងនោះ ក៏ត្រូវបានប្ដឹងចោទប្រកាន់ពីក្រុមហ៊ុន ស៊ីអាវវី ថា អ្នកស្រុកបានបំផ្លិចបំផ្លាញទ្រព្យសម្បត្តិនិងប្លន់ទៅវិញ ដែលស្រុកថា ជាអំពើអយុត្តិធម៌ ហើយផ្ដាច់ការដូចជំនាន់ប៉ុលពត។
ក្រុមហ៊ុនស៊ីអាយវី មិនអាចទំនាក់ទំនងសុំការបំភ្លឺបានទេ ពីរថ្ងៃមកនេះ ដោយទូរស័ព្ទបិទរហូត។ ប៉ុន្តែអភិបាលស្រុកស្នួល គឺលោក អ៊ីវ សោភុម បានអះអាងថា ការបំផ្លិចបំផ្លាញនោះ លោកដឹងតែមួយចំណែកតូច។
លោក អ៊ីវ សោភុម មានប្រសាសន៍ថា ៖ «មានថ្ងៃមួយនោះ មានមួយក្រុមបានទៅរើបំផ្លិចបំផ្លាញជម្រករបស់គាត់ ពីបញ្ហាពាក់ដែលពាក់ព័ន្ធជាមួយនឹងផលប៉ះពាល់របស់ប្រជាពលរដ្ឋនិងក្រុមហ៊ុននេះ ខ្ញុំបានព្យាយាមចុះទៅសម្របសម្រួលជាមួយនឹងបងប្អូន ក៏ដូចជាមិនមានបញ្ហាអីទេ»។
ប៉ុន្តែតាមស៊ីឌីវីដេអូរបស់អង្គការមួយ ដែលតាមឃ្លាំមើលសកម្មភាពរបស់ប្រជាពលរដ្ឋ ដោយខ្លាចមានប្រើអំពើហិង្សានោះបានបង្ហាញរូបភាពនៅពេលដែលប្រជាពលរដ្ឋទៅដល់ជំរំនោះ កងសន្តិសុខក្រុមហ៊ុនបានប្រាប់អ្នកស្រុកថា ពួកគេនឹងរុះរើជំរំតង់នោះចេញ ហើយក៏ឃើញសកម្មភាពស្រាយអង្រឹង បត់តង់ដាក់លើម៉ាស៊ីនត្រាក់ទ័រដែលឈូសឆាយដី បើកចេញទៅដោយមានប្រជាពលរដ្ឋជាច្រើនតាមឃ្លាំមើលដំណើរនោះរហូតផុតព្រំដីទំនាស់៕