លោក ប៉ុល សារឿន ដែលជាអគ្គមេបញ្ជាការនៃកងយោពលខេមរភូមិន្ទ និងជាតំណាងរបស់លោកនាយករដ្ឋមន្រ្តី ហ៊ុន សែន នៃប្រទេសកម្ពុជា បានមានប្រសាសន៍នៅក្នុងពិធីជូនដំណើរនៅឯព្រលានយន្តហោះយោធាជាមួយនឹងការផ្តាំផ្ញើថា ៖ «ត្រូវគោរពឯករាជ្យនិងអធិតេយ្យនៃប្រទេសដែលខ្លួនទៅបំពេញភារកិច្ច។ អស់លោកចេញទៅប្រតិបត្តិការលើកនេះ មិនមែនជាកងទ័ពឈ្លានពាន ហើយក៏មិនមែនជាកងទ័ពត្រួតត្រាទៅលើភារកិច្ច។ ក្នុងនាមមនុស្សធម៌ជាកងទ័ពថែរក្សាសន្តិភាព តម្លៃរបស់អស់លោកនៃការគោរពនូវឯករាជ្យ អធិបតេយ្យនៃប្រទេសស៊ូដង់នោះ ក៏មានតម្លៃស្មើនឹងការគោរពឯករាជ្យ អធិបតេយ្យរបស់ប្រទេសកម្ពុជាខ្លួនឯងផងដែរ»។
នៅមុនពេលនៃការចេញដំណើររបស់កងកម្លាំងដោះមីន ៥២នាក់ខាងលើនេះ កងកម្លាំងដោះមីនទាំង៥២នាក់នោះ ត្រូវបានព្រះសង្ឃជាច្រើនអង្គបានសូត្រធម៌ប្រោះព្រំ ជូនពរឲ្យមានសេចក្តីសុខ ហើយបន្ទាប់មក ពួកគេបានធ្វើសច្ចាប្រណិធានរួមគ្នាដូច្នេះថា ៖ «ស្មោះត្រង់ដាច់ខាតចំពោះជាតិ សាសនា ព្រះមហាក្សត្រជារៀងរហូត។ សូមសច្ចា ស្មោះត្រង់នឹងជាតិ មិនក្បត់មិត្តរួមអាវុធ»។
ផ្អែកតាមប្រភពបានឲ្យដឹងថា កងកម្លាំងដោះមីនចំនួន ៥២នាក់នៃកងពលលេខ៤០៥នេះ នឹងចាកចេញដំណើរតាមជើងយន្តហោះនៅវេលាម៉ោង១១យប់នៃថ្ងៃពុធដដែលនេះ ដើម្បីទៅប្តូរវេន ឬជំនួសកងកម្លាំងដោះមីនកងពលលេខ១៣៥ ដែលនឹងវិលត្រទ្បប់មកប្រទេសកម្ពុជាវិញ ពីប្រទេសស៊ូដង់នៅថៃ្ងសុក្រសប្តាហ៍នេះ។
លោកស្រី ប៉ែន ង៉ែត មកពីខេត្តតាកែវ មកជូនដំណើរកូនប្រុសឈ្មោះ យុទ្ធ ចាន់ណា នៅក្នុងចំណោមកងកម្លាំងដោះមីន ៥២នាក់នោះ បានថែ្លងប្រាប់វិទ្យុអាស៊ីសេរីថា ៖ «សប្បាយចិត្តណាស់ដោយកូនបានទៅបំពេញភារកិច្ចនៅប្រទេសគេនេះ»។
លោកស្រី ស៊ី ជនទ្បា នៅក្នុងទីក្រុងភ្នំពេញ ដែលមកជូនដំណើរកូនប្រុសឈ្មោះ ចេនទ្បា រដ្ឋា ទៅកាន់ប្រទេសស៊ូដង់ផងដែរនោះ បានថែ្លងថា ៖ «ខ្ញុំមានអារម្មណ៍សប្បាយរីករាយណាស់ដោយសារកូនខ្ញុំបានទៅបំពេញកាតព្វកិច្ចក្នុងអង្គការសហប្រជាជាតិ ដែលតំណាងឲ្យខ្មែរ។ បេះដូងពុះកញ្រ្ជោលរកនិយាយមិនត្រូវ»។
ការចាកចេញដំណើរនៃកងកម្លាំងដោះមីនចំនួន ៥២នាក់នៃកងពល៤០៥ នៅថៃ្ងពុធនេះ ជាលើកទី៤ហើយរបស់ប្រទេសកម្ពុជា ក្រោយពីប្រទេសកម្ពុជាបានបញ្ជូនកងកម្លាំងដោះមីនជាលើកដំបូង កាលពីឆ្នាំ២០០៦ គឺមកពីកងពល១៣៥ បន្ទាប់មក កងពល ២២៥ កងពល ៣១៥ និងលើកទី៤នេះ កងពល ៤០៥ សម្រាប់រយៈពេលមួយឆ្នាំនៃបេសកកម្មផ្នែកមនុស្សធម៌ដោះមីននៅក្នុងប្រទេសស៊ូដង់នោះ៕