ការសង្គ្រោះកន្លងមកបានធ្វើឡើងដោយមានកិច្ចសហប្រតិបត្តិការរវាងមជ្ឈមណ្ឌលអប់រំច្បាប់សម្រាប់សហគមន៍ ស្ថានទូតកម្ពុជា នៅប្រទេសម៉ាឡេស៊ី អង្គការជាដៃគូ និងអាជ្ញាធរនគរបាលប្រទេសម៉ាឡេស៊ី។ ចំណែកឯការដឹកជញ្ជូនពលករទាំងនេះមកកម្ពុជាវិញ គឺមានកិច្ចសហការពីអង្គការ អាយ.អូ.អឹម. (IOM) ជាមួយស្ថានទូតកម្ពុជា នៅប្រទេសម៉ាឡេស៊ី។
ពលករចំណាកស្រុកឈ្មោះ ស៊ុន បារាំង អាយុ ៤៧ឆ្នាំ នៅខេត្តបន្ទាយមានជ័យ ដែលទើបមកដល់ប្រទេសកម្ពុជាវិញ បានថ្លែងប្រាប់អ្នកកាសែតនៅឯអាកាសយានដ្ឋានអន្តរជាតិភ្នំពេញថា លោកសប្បាយរីករាយដូចបានកើតម្ដងទៀត ៖ «ខ្ញុំបានរត់គេចចេញពីទូកហ្នឹង ហើយពីសមុទ្រដ៏ធំល្វឹងល្វើយហ្នឹង។ គេចខ្លួនទៅដើម្បីសុំពួកម៉ាឡេស៊ី ធ្វើការនៅរោងចក្រឈើ។ មកដល់កម្ពុជា មិនដឹងគិតថា ធ្វើអ្វីដើម្បីឲ្យបានរស់នៅក្នុងសង្គមគ្រួសារ»។
ពលករចំណាកស្រុកម្នាក់ទៀតមកពីខេត្តកំពត បានថ្លែងថា រូបលោក និងពលករដទៃទៀតបានរងគ្រោះនៃការជួញដូរមនុស្ស និងកម្លាំងពលកម្មដោយថៅកែថៃ និងម៉ាឡេស៊ី គឺបង្ខំឲ្យធ្វើការងារធ្ងន់ធ្ងរជាអ្នកនេសាទយ៉ាងវេទនាកន្លងមក ៖ «បងប្អូនខ្មែរយើងជាច្រើនដែលបានស្លាប់ និងរងគ្រោះនៅក្នុងទឹកសមុទ្រម៉ាឡេស៊ី មានស្លាប់ជាច្រើន។ ពួកនោះវាយស្លាប់ទម្លាក់ទឹកជាច្រើន ប៉ុន្តែប្អូនមិនដឹងជួយម៉េច។ ឃើញមានតែស្រក់ទឹកភ្នែក អត់មានសមត្ថភាពជួយ ព្រោះមួយទូកៗមានចំនួនប្រហែលជាតិចបំផុត ៥នាក់។ ប្អូនសម្រេចចិត្តថា បើសិនជាអាយុប្អូនថ្លៃ គឺប្អូនរស់។ ប្អូនហក់ទឹកហែលដើម្បីទៅរកឲ្យគេជួយ»។
អ្នកស៊ើបអង្កេតនៃមជ្ឈមណ្ឌលអប់រំច្បាប់សម្រាប់សហគមន៍នៅកម្ពុជា លោក ហ៊ុយ ពេជ្រសុវណ្ណ ដែលបានចូលរួមសង្គ្រោះពលករទាំងនេះនៅប្រទេសម៉ាឡេស៊ី កន្លងមក បានមានប្រសាសន៍ថា៖ «បើសិនជាប៉ូលិសអន្តោប្រវេសន៍គេចាប់បាន គាត់អាចប្រឈមមុខនឹងការដាក់ទោសពីបទចូលក្នុងទឹកដីគេខុសច្បាប់ ក៏ប៉ុន្តែដោយសារតែយើងបានទៅធ្វើការជាមួយប្រទេសម៉ាឡេស៊ី ប៉ូលិសអន្តោប្រវេសន៍ពួកគេមិនចោទប្រកាន់គាត់ជាអ្នកចូលក្នុងទឹកដីគេខុសច្បាប់ទេ»។
លោកបានមានប្រសាសន៍ថា លោកនឹងនាំពលករទាំងនេះទៅជួបមន្ត្រីនាយកដ្ឋានប្រឆាំងការជួញដូរមនុស្ស និងការពារអនីតិជននៃក្រសួងមហាផ្ទៃ នៅថ្ងៃទី២៩ ខែកក្កដា ឆ្នាំ២០១១ ដើម្បីធ្វើកំណត់ហេតុសម្រាប់ការស្រាវជ្រាវបន្តទៀត។
តាមស៊ើបអង្កេតរបស់មជ្ឈមណ្ឌលអប់រំច្បាប់សម្រាប់សហគមន៍កន្លងមកបានឲ្យដឹងថា ពលករចំណាកស្រុកចំនួន ៧នាក់នេះ បានចូលក្នុងទឹកដីថៃ ដោយខុសច្បាប់ កាលពីឆ្នាំ២០១០ និងឆ្នាំ២០១១ តាមរយៈមេខ្យល់ជនជាតិខ្មែរទៅធ្វើការងារនៅក្នុងប្រទេសថៃ ប៉ុន្តែថៅកែថៃ បានលក់កម្លាំងពលកម្មបន្តឲ្យថៅកែជនជាតិម៉ាឡេស៊ី ធ្វើការងារជាអ្នកនេសាទនៅសមុទ្រ។
ក្រៅពីពលករ ៧នាក់ដែលមកប្រទេសវិញនេះ នៅមានពលករខ្មែរចំនួន ៥នាក់ទៀត អាជ្ញាធរកំពុងតែបន្តស្វែងរកដើម្បីសង្គ្រោះនៅប្រទេសម៉ាឡេស៊ី៕