តំណាងរបស់ប្រជាពលរដ្ឋ លោក លីម លីគាន បានមានប្រសាសន៍ថា ប្រជាជនចំនួន៨៨គ្រួសារនៃសហគមន៍ក្រុម៧៨ពុំបានយល់ព្រមចំពោះការផ្ដល់សំណងជាទឹកប្រាក់ចំនួន៥០០០ដុល្លារសហរដ្ឋអាមេរិកនិងដីមួយឡូត៍ទំហំ៥គុណ១២ម៉ែត្រស្ថិតនៅភូមិត្រពាំងអញ្ចាញ ខណ្ឌដង្កោ ចម្ងាយប្រមាណ២០គីឡូម៉ែត្រពីទីក្រុងដែលផ្ដល់ដោយអាជ្ញាធរក្រុងភ្នំពេញឡើយ ហើយទាមទារឲ្យក្រុមហ៊ុនដែលអាជ្ញាធរក្រុងប្រគល់ដីដើម្បីអភិវឌ្ឍផ្ដល់សំណងដល់ពួកគាត់ឲ្យបានសមរម្យតាមតម្លៃទីផ្សារ។
លោកបានបន្តថា ប្រជាពលរដ្ឋខ្លះបានទាមទារសំណងជាទឹកប្រាក់ចំនួន២៥០០ដុល្លារសហរដ្ឋអាមេរិកសម្រាប់ដីក្នុងមួយម៉ែត្រការ៉េ។
លោក លីម លីគាន បានបញ្ជាក់ថា ៖ «សព្វថ្ងៃហ្នឹងខ្ញុំទាំងអស់គ្នាដែលទាមទារ ចង់បានឲ្យខាងសាលាក្រុង ខាងរដ្ឋាភិបាលហ្នឹង សុំឲ្យដោះដូរនិងទិញតាមទីផ្សារសេរី»។
អភិបាលរងខណ្ឌចម្ការមន លោក ម៉ា សុភាព បានមានប្រសាសន៍ទទួលស្គាល់ថា បន្ទាប់ពីបានជួបជាមួយក្រុមប្រជាពលរដ្ឋចំនួន៦៤គ្រួសារដែលរស់នៅក្នុងក្រុម៧៨នោះគ្មាននរណាម្នាក់ព្រមទទួលយកសំណងពីអាជ្ញាធរក្រុងនោះឡើយ។
លោក ម៉ា សុភាព បានមានប្រសាសន៍ថា ៖ «គាត់មិនព្រមទទួលទេ គាត់ទាមទារតាមទីផ្សារសេរី ប៉ុន្តែការរស់នៅរបស់គាត់នៅលើគម្រោងអភិវឌ្ឍន៍ផ្លូវហ្នឹង គឺវាជាយូរណាស់មកហើយ»។
លោក ម៉ា សុភាព បានមានប្រសាសន៍ថា នេះជាសកម្មភាពចុងក្រោយរបស់អាជ្ញាធរក្នុងការចរចាជាមួយនឹងប្រជាពលរដ្ឋ ប៉ុន្តែលោកមិនបានបញ្ជាក់ថាតើអាចនឹងមានការប្រើប្រាស់កម្លាំងដើម្បីរុះរើប្រជាពលរដ្ឋឬយ៉ាងណានោះទេ។
មន្ត្រីសម្របសម្រួលនៃមជ្ឈមណ្ឌលអប់រំច្បាប់សម្រាប់សហគមន៍ លោក ម៉ន វុទ្ធី បានឲ្យដឹងថាការប្រើប្រាស់កម្លាំងដើម្បីជម្លៀសប្រជាពលរដ្ឋចេញពីលំនៅឋានគឺជាការរំលោភធ្ងន់ធ្ងរលើសិទ្ធិមនុស្ស។
លោក ម៉ន វុទ្ធី បានឲ្យដឹងថា ៖ «ការប្រើប្រាស់កម្លាំងនេះមានតែសុំដីកាពីតុលាការដើម្បីកាត់សេចក្ដីថាដីនេះជាដីអ្នកណាសិន បានគាត់អាចប្រើជាអំណាចសាលក្រមដើម្បីប្រើប្រាស់កម្លាំងដើម្បីចេញ។ រហូតមកដល់ពេលនេះមិនទាន់ឃើញម្ចាស់ដី ហើយមិនទាន់ឃើញសេចក្ដីសម្រេចណាថាជាកម្មសិទ្ធិរបស់អ្នកណានៅឡើយទេ»។
គួរជម្រាបថា ប្រជាពលរដ្ឋក្រុម៧៨ប្រមាណ១៣០០គ្រួសារត្រូវអាជ្ញាធរក្រុងភ្នំពេញចេញបញ្ជាឲ្យចាកចេញពីលំនៅឋានរបស់ពួកគាត់ដើម្បីយកដីប្រគល់ឲ្យក្រុមហ៊ុនឯកជនយកទៅអភិវឌ្ឍតាំងពីថ្ងៃទី២២ ខែមិថុនា ឆ្នាំ២០០៦មកម៉្លេះ ហើយសព្វថ្ងៃមានប្រជាពលរដ្ឋចំនួន៨៨គ្រួសារបន្តរស់នៅលើដីនោះតទៅទៀត។
កាលពីដើមសប្ដាហ៍នេះប្រជាពលរដ្ឋនៃសហគមន៍ក្រុម៧៨ក៏បានដាក់ញត្តិជូនរដ្ឋសភាស្នើសុំឲ្យធ្វើកិច្ចអន្តរាគមន៍ក្នុងការចេញប័ណ្ណកម្មសិទ្ធិដីធ្លីដល់ពួកគាត់ចំនួន៨៨គ្រួសារដែលបានមករស់នៅលើដីនោះតាំងពីឆ្នាំ១៩៨៣មកម៉្លេះ៕