ក្រុមហ៊ុនរបស់ចិននោះមានឈ្មោះ ម៉េង កេត មានផែនការដាំដើមប្រេងខ្យល់នៅលើផៃ្ទដីកសិកម្មចំនួន២២៣ហិកតា ដែលពលរដ្ឋអះអាងថា នឹងប៉ះពាល់ដីធ្លីកសិកម្មចំនួន៦៥ហិកតារបស់គ្រួសាររបស់ប្រជាពលរដ្ឋចំនួន៨៨គ្រួសារ។
ប្រជាពលរដ្ឋចំនួន៥ភូមិដែលកំពុងតែមានការព្រួយបារម្ភអំពីការរឹបយកដីធ្លីសប្តាហ៍ក្រោយនេះ មានភូមិអង្គតាសិត ភូមិទួលសេរី ភូមិគោល នៅក្នុងខេត្តកណ្តាល និងភូមិពោធិ៍ ភូមិភ្នំតូច នៅក្នុងស្រុកឧត្តុង្គ ខេត្តកំពង់ស្ពឺ។
ប្រជាពលរដ្ឋតំណាងឲ្យ៨៨គ្រួសាររស់នៅក្នុងភូមិអង្គតាសិត ឃុំទួលព្រេច ស្រុកអង្គស្នួល ខេត្តកណ្តាល កំពុងតែតវ៉ានៅលើដីធ្លីកសិកម្ម បានថែ្លងប្រាប់វិទ្យុអាស៊ីសេរីតាមទូរស័ព្ទមកថា ៖ «សុំតវ៉ារឿងសាលដីការបស់តុលាការកំពូលដែលកាត់ឲ្យគាត់ចាញ់ក្ដីដោយអយុត្តិធម៌ ដែលជនជាតិចិនធ្វើប្លង់រំលោភយកដែលគាត់មិនបានលក់នេះ ហើយដែលគេកាត់ឲ្យប្រជាពលរដ្ឋចាញ់ទៅវិញ។ គេកាត់ក្ដីឲ្យចាញ់នៅថ្ងៃទី៣១ ខែធ្នូ ឆ្នាំ២០០៩»។
សុខ សេរី ៖ តើភាគីខាងណាដែលជាអ្នករឹបយកដី? តំណាងពលរដ្ឋ ៖ ក្រុមហ៊ុនជនជាតិចិនតៃវ៉ាន់។ សុខ សេរី ៖ តើលោកតវ៉ាយ៉ាងម៉េច? តំណាងពលរដ្ឋ ៖ ខ្ញុំតវ៉ាមិនយល់ព្រមនឹងសាលដីកាដែលមិនយុត្តិធម៌។ ខ្ញុំចង់បានដីស្រែរបស់ប្រជាពលរដ្ឋទាំងអស់ហ្នឹងមកបង្កបង្កើនផលចិញ្ចឹមជីវិតទៅអនាគតវិញ។
ប្រជាពលរដ្ឋឈ្មោះ សាន មាន អាយុ៣៦ឆ្នាំ នៅក្នុងភូមិពោធិ៍ ឃុំដំណាក់រាំង ស្រុកឧត្តុង្គ ខេត្តកំពង់ស្ពឺ បានថែ្លងថា ៖ «តវ៉ារឿងដីស្រែរបស់ខ្ញុំ ដីស្រែប្រជាជនចំនួន៨៨គ្រួសារ។ សម្រាប់ដីខ្ញុំផ្ទាល់តែម្ដងប្រហែលជា១ហិកតាជាង»។
មេប៉ុស្តិ៍នគរបាលនៅក្នុងឃុំភ្នំតូច ស្រុកឧត្តុង្គ ខេត្តកំពង់ស្ពឺ ដែលកំពុងតែរក្សាសន្តិសុខនៅកន្លែងតវ៉ានោះបានមានប្រសាសន៍ថា ៖ «ថ្ងៃហ្នឹងមិនមានអំពើហិង្សាកើតឡើងទេ គ្រាន់តែតវ៉ាប្រតិកម្មនៅកន្លែងដីរបស់គាត់ហ្នឹង»។
មេឃុំភ្នំតូច ស្រុកឧត្តុង្គ ខេត្តកំពង់ស្ពឺ លោក យិន គឿង បានមានប្រសាសន៍ថា រឿងនេះហួសពីសមត្ថកិច្ចរបស់លោកក្នុងការដោះស្រាយ ៖ «ឥឡូវហ្នឹងកំពុងតែទប់ស្កាត់ដែរ ប៉ុន្តែមិនដឹងយ៉ាងម៉េចយើងមិនទាន់ដឹងទេ។ រឿងហ្នឹងគេប្ដឹងទៅតុលាការប៉ុន្មានឆ្នាំហើយ ទៅមកៗអត់ឈប់សោះ»។
ក្រុមអ្នកតវ៉ាបានសន្យាថា ពួកគេនឹងបន្តការតវ៉ាទៀតនៅពេលដែលក្រុមហ៊ុនចុះមកឈូសឆាយដីនៅថ្ងៃទី១៨ ខែមីនា សប្តាហ៍ក្រោយនេះ។
វិទ្យុអាស៊ីសេរីនៅមិនទាន់អាចទាក់ទងតំណាងក្រុមហ៊ុនម៉េង កេត ដើម្បីសុំការពន្យល់បាននៅឡើយទេនៅថ្ងៃទី១២ ខែមីនានេះ៕