ប្រតិកម្មដ៏កម្ររបស់អ្នកភូមិបានធ្វើឡើងដោយសំអាងថា មេភូមិអូរដាបានជំរិតទារលុយពីការធ្វើលិខិតស្នាមការយកភាគរយក្នុងការលក់ដីនិងការរ៉ៃអង្គាសលុយពីអ្នកភូមិនៅក្នុងមូលដ្ឋាន។
លោក សឹង ហៀង តំណាងប្រជាពលរដ្ឋបានថ្លែងថា អ្នកភូមិចំនួន៥៣១នាក់បាននាំគ្នាផ្តិតមេដៃធ្វើពាក្យប្តឹងទៅសាលាឃុំចក្រី សាលាស្រុកភ្នំព្រឹក ដើម្បីឲ្យមានការដោះស្រាយតាមឆន្ទៈរបស់អ្នកភូមិដែលមិនពេញចិត្តនឹងការដឹកនាំរបស់លោក ហេង សារ៉េត ជាមេភូមិអូរដា។
លោកថ្លែងយ៉ាងដូចេ្នះថា ៖ «បញ្ហាទី១ ការចុះធ្វើអត្រានុកូលដ្ឋានមេភូមិអូរដារូបនេះ គាត់បានបង្គាប់បញ្ជាឲ្យប្រជាពលរដ្ឋបង់ឲ្យគាត់ចំនួនពី២៥០០រៀលទៅ១ម៉ឺនរៀលរហូតដល់១០០ដុល្លារ។ បញ្ហាទី២ គឺការលក់ដីធ្លី ប្រជាពលរដ្ឋមានការលក់ដីធ្លីទៅឈ្មួញដែលគាត់ចុះមកទិញនោះ មេភូមិរូបនេះគាត់បានបង្គាប់ឲ្យយក៤%ពីប្រជាពលរដ្ឋ។ បញ្ហាទី៣ ប្រជាពលរដ្ឋដែលគាត់មកសុំការរស់នៅក្រោមការគ្រប់គ្រងរបស់មេភូមិអូរដា មេភូមិរូបនេះបានបង្គាប់យកលុយពីប្រជាពលរដ្ឋពី៤ម៉ឺនរៀលទៅ៥ម៉ឺនរៀលក្នុងមួយគ្រួសារ»។
លោក សឹង ហៀង បានបន្តថា ៖ «បញ្ហាទី៤ការធ្វើសៀវភៅគ្រួសារ គាត់បានបង្គាប់យកពីប្រជាពលរដ្ឋពី៣ម៉ឺន៥ពាន់ទៅ៤ម៉ឺនរៀលក្នុងមួយគ្រួសារ ហើយពេលយកមកចែកជូនប្រជាពលរដ្ឋវិញគាត់យក២ពាន់រៀលបន្ថែមលើហ្នឹងទៀត ដូចជាអត្តសញ្ញាណប័ណ្ណក៏២ពាន់រៀលដែរ»។
លោកស្រី មុំ រ៉េត អាយុ៤៥ឆ្នាំបាននិយាយថា លោកស្រីត្រូវបានគេជំរិតទារលុយចំនួន១០០ដុល្លារជាថ្នូរក្នុងការចុះឈ្មោះក្នុងបញ្ជីអត្រានុគោលដ្ឋាន។
លោកស្រី មុំ រ៉េត បានឲ្យដឹងថា ៖ «ខ្ញុំធ្វើអត្រានុគោលដ្ឋានយក១០០ដុល្លារ គាត់ថា ថ្នាក់លើឲ្យយក១០០ដុល្លារ ខ្ញុំ៥០ដុល្លារអត់ព្រមទេ ថាយក១០០តែម្ដង ខ្ញុំផ្ទាល់។ ហើយដូចប្រជាជនគ្នាចង់ចុះចូលជាសមាជិកក្នុងភូមិត្រូវយកម្នាក់៥០០បាត បានបានចូល បើមិនបានទេ អត់ទេ។ គ្នាក៏នៅតាមចិញ្ចើមថ្នល់ សុំផ្ទះគេជ្រកអ៊ីចឹងទៅ»។
ជាមួយគ្នានេះដែរ លោក សោ រ៉េន អាយុ២៩ឆ្នាំ និងអ្នកភូមិអូរដាទាំងនោះស្នើឲ្យដក លោក ហេង សារ៉ត មេភូមិអូរដា ចេញពីតំណែង ៖ «បងប្អូនទាំងអស់ចង់ឲ្យទម្លាក់ចោល ចង់ឲ្យផ្លាស់ប្តូរមេភូមិហ្នឹងចេញបានសុខចិត្ត ព្រោះអីគាត់ធ្វើអំពើកន្លងមកនេះខុសឆ្គងច្រើនណាស់»។
ចំណែកឯ លោក ហេង សារ៉េត មេភូមិអូរដាបានប្រតិកម្មថា ការចោទប្រកាន់របស់អ្នកភូមិទៅលើរូបលោកគឺមិនត្រឹមត្រូវទេ។
លោកបញ្ជាក់ថា ៖ «ការពិតទៅ ការចោទប្រកាន់គឺជាការខុសច្បាប់ ខ្ញុំមានតួនាទីអី ទៅធ្វើអត្រានុកូលដ្ឋានយកលុយនោះ? គាត់ថា ខ្ញុំមានអំពើពុករលួយហើយខ្ញុំឆ្ងល់ដែរថា តើអំពើពុករលួយស្អីខ្លះ ឧទារហណ៍ដូចគាត់លើកពាក្យ អ្នកប្រឆាំងគេលើកថា ដូចជាការយកភាគរយក្នុងលក់ទិញដីអីជាដើម ហើយការលក់ទិញដីយកភាគរយវាមិនមែនត្រឹមអាណត្តិនេះណា! តាំងពីជំនាន់២០០០ ២០០១ តាំងពីជំនាន់ លោក ឡ នៅ។ យើងទទួលយកមែន ប៉ុន្តែមិនមែនត្រឹមតែអាណត្តិខ្ញុំនេះទេ តាំងពីអើយមកហើយ»។
លោក ហេង សារ៉េត បានចោទប្រកាន់ក្រុមអ្នកភូមិទាំងនោះវិញថា គឺជាពួកគណបក្សប្រឆាំងដែលចាំតែឆក់ឱកាសនៅពេលរូបលោកមានកំហុស ៖ «ក្រៅពីរូបហ្នឹងទៀតគេចោទថា ខ្ញុំជាមេភូមិពុករលួយ។ គេថាខ្ញុំជាឈ្លើងជញ្ជក់ឈាមប្រជាពលរដ្ឋ ការពិតទៅខ្ញុំគ្រាន់តែជម្រាបអ៊ីចេះថា គេខាងគណបក្សប្រឆាំង គេឆក់ឱកាសនៅពេលដែលយើងឆក់ល្វែងពេលចែកអំណោយអង្ករ ADB ហ្នឹង គេយកអង្ករមកឲ្យចែក ខ្ញុំចែកទៅតាមគោលការណ៍របស់គេ»។
ទោះជាមានការបដិសេធដូច្នេះក្តី លោក អ៊ុន វ៉ាត អាយុ៥០ឆ្នាំអ្នកភូមិម្នាក់ទៀតបានថ្លែងចោទប្រកាន់ថា លោកមេភូមិបានទារលុយពីរូបលោកយ៉ាងតិចណាស់ចំនួនពីរដងទាក់ទងទៅនឹងការទិញដូរដីធ្លី។
លោក អ៊ុន វ៉ាត បានឲ្យដឹងថា ៖ «ខ្ញុំមកទិញដីនៅក្នុងភូមិហ្នឹង គាត់បានបង្គាប់យកលុយពីខ្ញុំ៤ម៉ឺន៥ពាន់រៀល។ ទី២ គាត់ឃើញខ្ញុំទិញដីហើយ គាត់បង្កាប់ឲ្យអនុភូមិទៅយកលុយពីខ្ញុំ ៣ម៉ឺនរៀលទៀត ហើយពីចំនួនប្រជាពលរដ្ឋដឹកពោត សណ្តែក ដឹកស្រូវ ក៏គាត់យកតាមកម្រិតដែលគាត់ដាក់ពោតស្នូល៣បាត សណ្តែកសៀង៥បាត ពោតគ្រាប់៥បាត។ អាហ្នឹងគាត់ថា គាត់យកពន្ធផ្លូវ គាត់ថា យកមកកសាងនេះកសាងនោះប៉ុន្តែអត់ឃើញ»។
កាលពីថ្ងៃទី៣០ និង ៣១ ខែតុលាកន្លងទៅ អ្នកភូមិជាង២០០នាក់ក៏បានលើកគ្នាទៅផ្ទះលោក ហេង សារ៉េត មេភូមិអូរដាម្តងរួចមកហើយ ដើម្បីទាមទារឲ្យលោក ហេង សារ៉េត លាឈប់ពីតួនាទីជាមេភូមិ ហើយជំរុញឲ្យមានការរើសមេភូមិថ្មីមកជំនួសវិញ។ ទោះជាយ៉ាងណាការលើកគ្នាតវ៉ានោះមិនបានបង្កឲ្យមានអំពើហិង្សាឬបង្ករបួសស្នាមអ្វីទេ។
លោក សោម ផន មេឃុំចក្រីក្នុងស្រុកភ្នំព្រឹក ខេត្តបាត់ដំបង បានថ្លែងថា សាលាឃុំកំពុងធ្វើការស្រាវជ្រាវហើយបានធ្វើការបំភ្លឺចំនួនបីដងរួចមកហើយជុំវិញករណីខាងលើនេះ។ លោកបន្តថា ករណីនេះគឺជារឿងគំនុំរវាងអ្នកភូមិនិងប្រធានភូមិ។
លោក សោម ផន បានមានប្រសាសន៍ថា ៖ «រឿងនេះវាជាបញ្ហាគំនុំឬក៏មានបញ្ហាតាំងពីយូរមកហើយ តិចៗអ៊ីចឹងមកដល់ពេលមានបញ្ហាទាក់ទងនឹងការចែកអង្ករវាទៅជាចលនាមួយខឹង។ ទី១ ក្រុមប្រឹក្សាឃុំខ្ញុំបានបំភ្លឺ ទី២ ខ្ញុំមេឃុំបានចុះទៅបំភ្លឺ ហើយទី៣ ថ្នាក់ស្រុកបានចុះទៅបំភ្លឺបញ្ហាហ្នឹងដែរ។ ករណីហ្នឹងថ្នាក់លើបានចុះស្រាវជ្រាវអស់ហើយ ហើយការពិតខ្ញុំផ្អែកលើថ្នាក់ស្រុកដែរ បើស្រុកគាត់គិតថា ដោះម៉េចបានស្រួល ខ្ញុំផ្អែកទៅលើហ្នឹង ឥឡូវកំពុងតែពិភាក្សាគ្នា»។
មិនអាចទាក់ទងសុំការបញ្ជាក់ពីលោកអភិបាលស្រុកភ្នំព្រឹកជុំវិញបញ្ហាខាងលើនេះបានទេ ប៉ុន្តែលោក សារ៉េត វិសេធ អធិការរងនគរបាលស្រុកភ្នំព្រឹកបានថ្លែងថា លោកបានទទួលពាក្យបណ្តឹងនិងស្នាមមេដៃរបស់អ្នកភូមិទាំង៥៣១នាក់នោះ ហើយកំពុងធ្វើការសិក្សាបន្ថែមទៀតជុំវិញការចោទប្រកាន់នេះ។
លោក សារ៉េត វិសេធ បានឲ្យដឹងថា ៖ «លិខិតភស្តុតាង យើងនឹងស្រាវជ្រាវបន្ថែមទៀត ប៉ុន្តែជំហានដំបូងយើងឲ្យមេភូមិហ្នឹងសម្រាកការងាររបស់មេភូមិហ្នឹងមួយរយៈសិន ហើយឲ្យអនុភូមិដឹកនាំការងារភូមិបណ្តោះអាសន្នសិន»។
លោកបានបន្តថា លោកនឹងកោះហៅតំណាងប្រជាពលរដ្ឋទាំង៥៣១នាក់និងមេភូមិមកសាកសួរបន្ថែមទៀតដើម្បីធ្វើការសន្និដ្ឋានជុំវិញការចោទប្រកាន់នេះ ហើយនឹងបញ្ជូនទៅអភិបាលស្រុកធ្វើសេចក្តីសម្រេចនៅពេលក្រោយ។
លោក សារ៉េត វិសេធ បានមានប្រសាសន៍ថា ៖ «ខ្ញុំនឹងហៅប្រជាពលរដ្ឋដែលធ្វើញត្តិទាំង៥៣១នាក់ហ្នឹង ហើយខ្ញុំហៅមនុស្សសំខាន់ៗដើម្បីខ្ញុំបញ្ជាក់ថា រឿងហ្នឹងវាពិតដូចការចោទប្រកាន់របស់គាត់ឬអត់ ហើយខ្ញុំនឹងហៅមេភូមិសួរទៀត ហើយយើងសន្និដ្ឋានមើល តើកំហុសរបស់គាត់វាពិតប៉ុន្មានភាគរយ ដើម្បីយើងរាយការណ៍ឲ្យអភិបាលស្រុក ហើយអភិបាលស្រុកសម្រេច»។
យោងតាមការអះអាងរបស់ក្រុមអ្នកភូមិបានសម្តែងឆន្ទៈដូចគ្នាថា ពួកគេសុំឲ្យលោក ហេង សារ៉េត មេភូមិ លាឈប់ពីតំណែង ហើយស្នើឲ្យរកមេភូមិថ្មីមកជំនួសវិញដោយសំអាងថា លោក ហេង សារ៉េត បានប្រព្រឹត្តខុសពីតួនាទីជាមេភូមិ៕