ព្រះតេជព្រះគុណ លួន សុវ៉ាត មានសង្ឃដីកាប្រាប់វិទ្យុអាស៊ីសេរីនៅយប់ថ្ងៃអាទិត្យ ទី២៧ មីនា នេះថា ព្រះអង្គត្រូវបានអាជ្ញាធរកម្ពុជា តាមរកចាប់ព្រះអង្គកាលពីព្រឹកថ្ងៃទី២៥ មីនា កន្លងទៅនេះ នៅខណៈដែលព្រះអង្គឈរទត និងថតរូបក្រុមអ្នកតវ៉ាទាមទារឲ្យមានដំណោះស្រាយនូវសិទ្ធិកាន់កាប់ដីធ្លី នៅតំបន់បឹងកក់ ដែលបានធ្វើឡើងនៅមុខសាលារាជធានីភ្នំពេញ។ ការតាមរកចាប់ព្រះកាយព្រះអង្គនេះ អាជ្ញាធរបានចោទថាព្រះអង្គបានធ្វើខុសនឹងវិន័យព្រះពុទ្ធសាសនា ដោយបានចូលរួមក្នុងក្រុមបាតុកម្ម។
ឆ្លើយតបទៅនឹងការចោទប្រកាន់នេះ ព្រះតេជព្រះគុណ លួន សុវ៉ាត បានមានសង្ឃដីកាថា ព្រះអង្គពុំបានធ្វើអ្វីខុសនឹងព្រះពុទ្ធសាសនាឡើយ។ ប៉ុន្តែអាជ្ញាធរបានព្យាយាមបណ្ដេញព្រះអង្គឲ្យចេញពីកន្លែងនោះ តែព្រះអង្គមិនព្រមធ្វើតាម ៖ "អាត្មាអត់មានពាក់ព័ន្ធនិងបងប្អូនអ្នកបឹងកក់ទេ អាត្មាគ្រាន់តែក្នុងនាមព្រះសង្ឃមួយអង្គ អាត្មាគ្រាន់តែឈរមើលប៉ុណ្ណឹង ដូច្នេះអាត្មាអត់មានខុសច្បាប់ខុសទម្លាប់អីទេ អ៊ីចឹងការលួងលោមព្យាយាមឲ្យអាត្មាចេញហ្នឹង ក៏អាត្មាមិនព្រមចេញ អ៊ីចឹងគេក៏បាននិយាយថា បើមិនចេញ គឺសុំឲ្យទទួលខុសត្រូវដោយខ្លួនគេអត់ទទួលខុសត្រូវទេ"។
ក្នុងគ្រានោះ ព្រះតេជព្រះគុណ លួន សុវ៉ាត ក៏ត្រូវមន្ត្រីសង្កេតការណ៍នៃការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា និមន្តចូលរថយន្ត ហើយដឹកចេញទៅរកកន្លែងសុវត្ថិភាព។ ព្រះអង្គមានសង្ឃដីកាបញ្ជាក់ ៖ "ដោយការព្រួយបារម្ភសុវត្ថិភាពខាងផ្នែកការពារសិទ្ធិមនុស្សនៅប្រទេសកម្ពុជា គេក៏បានបញ្ចៀសអាត្មាចេញពីចំណោមប្រជាពលរដ្ឋ ហើយមកកន្លែងដែលមានសុវត្ថិភាព បន្ទាបមកគេបានតាមឡានរហូត គេបានទៅដល់វត្តដែលអាត្មាគង់នៅ ហើយដល់កុដិ ជាការពិតគេត្រៀមជើងការ និងធ្វើការឡោមព័ទ្ធ ឬក៏ចាប់ខ្លួនអាត្មាមែន"។
ព្រះតេជព្រះគុណ លួន សុវ៉ាត ថ្មីៗនេះ បានបញ្ជាក់ប្រាប់វិទ្យុអាស៊ីសេរីដែរថា នៅលើគេហទំព័រ Face Book របស់ព្រះអង្គ មានអ្នកក្លែងបន្លំលូចបញ្ចូលអត្ថបទជេរប្រមាថអ្នកដឹកនាំរដ្ឋាភិបាលកម្ពុជា ដោយបានយកព្រះនាម និងព្រះឆាយាល័ក្ខណ៍របស់ព្រះអង្គមកប្រើ នៅបន្ទាប់ពីព្រះអង្គបាននិមន្តត្រឡប់ពីកិច្ចប្រជុំនៅសហរដ្ឋអាមេរិកតាមការអញ្ជើញរបស់អង្គការសិទ្ធិមនុស្សអន្តរជាតិមួយ នៅសហរដ្ឋអាមេរិកមក។
ព្រះតេជព្រះគុណ លួន សុវ៉ាត ធ្លាប់បានចេញមុខតស៊ូមតិក្នុងការរកយុត្តិធម៌ជូនប្រជាជនរងគ្រោះក្នុងជម្លោះដីធ្លីមួយកន្លែង នៅក្នុងឃុំជីក្រែង ស្រុកជីក្រែងនៃខេត្តសៀមរាប បន្ទាប់ពីក្រុមសមត្ថកិច្ចប៉ូលិស ប្រើអំពើហិង្សាបាញ់រះទៅលើប្រជាកសិករ ដែលកំពុងតែច្រូតស្រូវ បង្កឲ្យរងរបួសជាច្រើននាក់ ហើយក្នុងនោះមានសាច់ញាតិព្រះអង្គចំនួនពីរនាក់រងរបួសដែរ។ ព្រះតេជព្រះគុណ លួន សុវ៉ាត ព្រះអង្គក៏ធ្លាប់បានទទួលការគំរាមពីអាជ្ញាធរជាច្រើនដងផងដែរ បន្ទាប់ពីព្រះអង្គចេញព្រះភក្ត្រញឹកញាប់ជាសាធារណៈ ជួយរកដំណោះស្រាយចំពោះបញ្ហាដីធ្លីជូនកសិករនៅក្នុងខែត្រសៀមរាបមកនោះ។
នៅយប់ថ្ងៃអាទិត្យម្សិលមិញនេះ វិទ្យុអាស៊ីសេរីនៅមិនទាន់អាចទាក់ទងសុំការបំភ្លឺពីអាជ្ញាធរមានសមត្ថកិច្ចបាននៅឡើយទេ។
បច្ចុប្បន្នព្រះតេជព្រះគុណ លួន សុវ៉ាត ស្ថិតនៅទីកន្លែងសុវត្ថិភាពក្រោមការការពាររបស់ការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា៕