គណៈធម្មយុត្តិស្នើសុំបង្កើតអាគារធិការដ្ឋានដាច់ដោយឡែក
ដោយ កែវពេជ្រ មេត្តា
2012-02-25
គណៈសង្ឃនៃគណៈធម្មយុត្តិកនិកាយបានស្នើសុំដល់រាជរដ្ឋាភិបាល ឲ្យជួយបង្កើតអាគារធិការដ្ឋានពុទ្ធិកសិក្សាគណៈធម្មយុត្តិមួយដាច់ដោយឡែកពីអាគារធិការដ្ឋានពុទ្ធិកសិក្សាជាតិ។
អនុសំវច្ឆរមហាសន្និបាតមន្ត្រីសង្ឃគណៈធម្មយុត្តិកនិកាយទូទាំងប្រទេស លើកទី២០ កាលពីថ្ងៃទី២៣-២៤ កុម្ភៈ ២០១២ នៅរាជធានីភ្នំពេញ
មន្ត្រីសង្ឃ និងគណៈកម្មការអាចារ្យវត្តនៃព្រះពុទ្ធសាសនាគណៈធម្មយុត្តិកនិកាយប្រមាណជាង ៦០០រូប មកពីបណ្ដាខេត្តក្រុងផ្សេងៗ បានជួបជុំគ្នាបើកអង្គប្រជុំអនុសំវច្ឆរមហាសន្និបាតមន្ត្រីសង្ឃនៅទូទាំងប្រទេស លើកទី២០ ដើម្បីជជែកវែកញែកអំពីការប្រតិបត្តិធម៌ វិន័យផ្នែកធម្មយុត្តិនៅកម្ពុជា។
កិច្ចប្រជុំនេះបានធ្វើឡើងនៅក្រសួងធម្មការ និងសាសនា នៅទីក្រុងភ្នំពេញ កាលពីថ្ងៃទី២៣ ដល់២៤ ខែកុម្ភៈ ឆ្នាំ២០១២។
នៅក្នុងអនុសំវច្ឆរទាំងពីរថ្ងៃនោះ គេបានផ្ដោតជាសំខាន់គឺពង្រឹងរចនាសម្ព័ន្ធគណៈសង្ឃធម្មយុត្តិ ការសិក្សាធម៌ វិន័យរបស់ភិក្ខុ សាមណេរ និងពង្រឹងវិស័យពុទ្ធិកសិក្សាផ្នែកធម្មយុត្តិ ដូចជាបង្កើតសាលារៀនសម្រាប់ព្រះសង្ឃធម្មយុត្ត រួមមានពុទ្ធិកសកលវិទ្យាល័យជាដើម។
សម្ដេចព្រះអភិសិរីសុគន្ធាមហាសង្ឃរាជាធិបតី បូរ គ្រី សម្ដេចព្រះមហាសង្ឃរាជនៃគណៈធម្មយុត្តិកនិកាយនៃប្រទេសកម្ពុជា បានមានព្រះថេរដីកានៅក្នុងអនុសំវច្ឆរនោះថា តាមពិតទៅ វិស័យពុទ្ធិកសិក្សារបស់ព្រះសង្ឃផ្នែកធម្មយុត្តិ គឺមានបង្កើតច្រើនដែរហើយ ទាំងពុទ្ធិបឋមសិក្សា មធ្យមសិក្សា និងឧត្ដមសិក្សា ក៏ប៉ុន្តែសម្រាប់អាគារធិការដ្ឋានដើម្បីមើលគ្រប់គ្រងពុទ្ធិកសិក្សា ឬការរៀនសូត្ររបស់ព្រះសង្ឃធម្មយុត្តិនៅពុំទាន់មានទេ តាំងពីដើមរៀងមក រហូតមកដល់ពេលនេះ។
សម្ដេចព្រះមហាសង្ឃរាជនៃគណៈធម្មយុត្តិកនិកាយបានមានព្រះថេរដីកាទៀតថា ទាំងអាគារធិការដ្ឋានក្ដី ទាំងពុទ្ធិកសិក្សាក្តី គឺដើរតួយ៉ាងសំខាន់ណាស់ក្នុងការពង្រឹងវិស័យព្រះពុទ្ធសាសនា ពិសេសគឺពង្រឹងការសិក្សាភាសាបាលី ៖ "ដែលជាភាសាគោល ភាសាគ្រឹះសម្រាប់ព្រះពុទ្ធសាសនាយើង"។
នៅក្នុងអនុសំវច្ឆរមហាសន្និបាតមន្រ្ដីសង្ឃគណៈធម្មយុត្តិកនិកាយនោះដែរ អ្នកស្រី ផុន ផល្លា រដ្ឋលេខាធិការនៃក្រសួងធម្មការ និងសាសនា។ អ្នកស្រីបានមានប្រសាសន៍ថា តាំងពីដើមរៀងមក រហូតមកដល់សព្វថ្ងៃ ការគោរពព្រះពុទ្ធសាសនានៅកម្ពុជាមាននិកាយពីរ គឺគណៈមហានិកាយ និងគណៈធម្មយុត្តិកនិកាយ។ រីឯចំណែកការបដិបត្តិធម៌វិន័យរបស់ព្រះសង្ឃទាំងពីរគណៈ និងការគោរពបូជារបស់ប្រជាពលរដ្ឋខ្មែរជាពុទ្ធបរិស័ទកាលពីសម័យមុន និងសម័យបច្ចុប្បន្នក៏ឃើញមិនទំនាស់គ្នាអ្វីដែរ។ ហេតុដូច្នេះហើយសព្វថ្ងៃនេះ ដោយហេតុថា ព្រះពុទ្ធសាសនាជាសាសនារបស់រដ្ឋនោះ គឺក្រសួងធម្មការ និងសាសនា មានតួនាទីជាអ្នកគ្រប់គ្រងទាំងគណៈមហានិកាយ និងគណៈធម្មយុត្តិកនិកាយ ៖ "ហើយរហូតមកដល់ឥឡូវហ្នឹងយើងចង់ថែរក្សាឲ្យនិកាយទាំងពីរហ្នឹងមានអ្វីៗប្រហាក់ប្រហែលគ្នា"។
អ្នកចូលរួមនៅក្នុងអនុសំវច្ឆរមហាសន្និបាតមន្ត្រីសង្ឃគណៈធម្មយុត្តិកនិកាយជាអាចារ្យ និងគណៈកម្មការវត្តផ្នែកធម្មយុត្តិដែលមកពីបណ្ដាខេត្តផ្សេងៗនោះ បានបញ្ជាក់ប្រាប់ដែរថា គេចង់ឲ្យមានអាគារធិការដ្ឋាន ឬពុទ្ធិកសិក្សានៅតាមវត្តអារាមធម្មយុត្តិឲ្យបានច្រើនដែរ ពីព្រោះថាសព្វថ្ងៃការសិក្សាធម៌វិន័យរបស់ព្រះសង្ឃ និងគ្រហស្ថផ្នែកខាងធម្មយុត្តិនោះ គឺនៅមានភាពច្របូកច្របល់ជាមួយនិងគណៈមហានិកាយនៅឡើយទេ។
ក្នុងចំណោមគណៈកម្មការដែលចូលរួម លោក លី គឺមសន សមាជិកគណៈកម្មការវត្តថ្វាយដង្គំ នៅខេត្តសៀមរាប។ លោកបានមានប្រសាសន៍ថា ការរៀនច្របូកច្របល់គ្នាធម៌មហានិកាយផង និងធម្មយុត្តិផងនោះ ហាក់មិនមានការរីកចម្រើន។ ដូច្នេះប្រសិនបើមានការបង្កើតឲ្យមានពុទ្ធិកសិក្សាក្នុងវត្ដធម្មយុត្តិតែមួយនោះ លោកគិតថាប្រសើរ។
អ្នកស្រី ម៉ុំ ផាត ជាពុទ្ធបរិស័ទខាងធម្មយុត្តិ និងជាគណៈកម្មការវត្តព្រះពុទ្ធវិជ្ជា នៅស្រុកស្នួល ខេត្តក្រចេះ ដែលបានចូលរួមនៅក្នុងអនុសំវច្ឆរមហាសន្និបាតមន្ត្រីសង្ឃគណៈធម្មយុត្តិកនិកាយ បានមានប្រសាសន៍ប្រាប់ដែរថា គាត់មិនគិតអំពីបញ្ហាច្របូកច្របល់ជាមួយនិងគណៈមហានិកាយអ្វីនោះទេ សំខាន់គឺថាប្រសិនបើមានពុទ្ធិកសិក្សាធម្មយុត្តិច្រើននោះ គឺអាចជួយដល់ព្រះសង្ឃបានសិក្សារៀនសូត្រកាន់តែចេះដឹងជ្រៅជ្រះពីព្រះពុទ្ធសាសនាច្រើន។
ទាក់ទងនិងការគោរពព្រះពុទ្ធសាសនាផ្នែកធម្មយុត្តិនេះ សម្ដេចព្រះអភិសិរីសុគន្ធាមហាសង្ឃរាជាធិបតី បូរ គ្រី សម្ដេចព្រះមហាសង្ឃរាជនៃគណៈធម្មយុត្តិកនិកាយនៃប្រទេសកម្ពុជា បានមានព្រះថេរដីកាថា តាមពិតទៅ គណៈមហានិកាយក្ដី ធម្មយុត្តិក្ដី គឺជាព្រះពុទ្ធសាសនាតែមួយ មិនមានទាស់ខុសអ្វីទេ ពីព្រោះនិកាយទាំងពីរនេះបានប្រតិបត្តិតាមព្រះត្រៃបិដកពុទ្ធវចនតែមួយដូចគ្នា។
ការគោរពព្រះពុទ្ធសាសនាផ្នែកខាងគណៈធម្មយុត្តិកនិកាយនៅកម្ពុជា គឺបានកើតមានឡើងតាំងពីក្នុងសម័យព្រះមហាក្សត្រខ្មែរមួយអង្គ គឺព្រះករុណា ព្រះបាទសម្ដេចព្រះអង្គឌួង កាលពីឆ្នាំ១៨៥៧។ ក្នុងកាលនោះ ព្រះអង្គបានតែងតាំងព្រះមហាប៉ាន់ ជាសម្ដេចសង្ឃនាយកនៃគណៈធម្មយុត្តិកនិកាយនៃព្រះរាជាណាចក្រកម្ពុជា។
ព្រះមហាប៉ាន់នោះ គឺជាព្រះសង្ឃខ្មែរមួយអង្គដែលបាននិមន្តទៅរៀនធម៌ វិន័យព្រះពុទ្ធសាសនានៅប្រទេសថៃ ក្នុងសម័យនោះ ហើយនៅពេលនិមន្តត្រឡប់មកមាតុប្រទេសវិញ ក៏បាននាំយកទាំងវប្បធម៌ព្រះពុទ្ធសាសនាគណៈធម្មយុត្តិនេះមកជាមួយផង។ ប្រការនេះហើយ ចាប់តាំងពីពេលនោះមក ប្រទេសកម្ពុជាក៏ប្រកាន់ការគោរពព្រះពុទ្ធសាសនាទាំងគណៈមហានិកាយ និងគណៈធម្មយុត្តិ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
អត្ថបទដែលទាក់ទង
រដ្ឋាភិបាលកំពុងកែសម្រួលប្រពៃណីទំនៀមទម្លាប់ឲ្យក្លាយជាក្បួនខ្នាតជាតិ
សាលារៀនភាសាចិនរីកដុះដាលនៅកម្ពុជា
សាលាបញ្ញាសាស្ត្រគ្រោងបំបួសយុវជន ៣០០នាក់
ប្រវត្តិទំនាក់ទំនងរវាងសត្វនាគនិងពលរដ្ឋខ្មែរ
ប្រភពដើមនិងទស្សនៈពុទ្ធសាសនាជុំវិញឆ្នាំរោងនិងសត្វនាគ
បុណ្យឆ្លងចេត្រនៅតំបន់អង្គរ
បុណ្យឆ្លងចេត្រនៅតំបន់អង្គរ
ក្រុមសិល្បៈខ្មែរនៅខេត្តកោះកុងទៅសម្ដែងនៅប្រទេសថៃ
មតិ
Click here to add your own comment