កម្ពុជា-ថៃឯកភាពគ្នាក្នុងការដោះស្រាយបញ្ហាព្រំដែនដោយសន្តិវិធី
ដោយ សុខ សេរី
2008-08-20
មន្រ្តីជាន់ខ្ពស់របស់រដ្ឋាភិបាលថៃនិងព្រះមហាក្សត្រថៃ ជាមួយគ្នានឹងមន្រ្តីជាន់ខ្ពស់របស់រដ្ឋាភិបាលកម្ពុជា បានឯកភាពគ្នានឹងបន្តការដោះស្រាយបញ្ហាព្រំដែននិងប្រាសាទព្រះវិហារ ព្រមទាំងប្រាសាទតាមាន់ដោយសន្តិវិធី គឺមិនប្រើកងកម្លាំងប្រយុទ្ធគ្នានោះទេ ។
កិច្ចចរចារវាងរដ្ឋមន្ត្រីការបរទេសកម្ពុជានិងថៃ កាលពីថ្ងៃទី១៩ សីហា ២០០៨ នៅក្នុងក្រុងហួហ៊ីន ប្រទេសថៃ។
លោក ហោ ណាំហុង ឧបនាយករដ្ឋមន្រ្តីនិងជារដ្ឋមន្រ្តីក្រសួងការបរទេសកម្ពុជា ដែលបានដឹកនាំគណៈប្រតិភូជាន់ខ្ពស់របស់រដ្ឋាភិបាលកម្ពុជាវិលត្រទ្បប់មកពីការចរចារយៈពេលពីរថៃ្ងក្នុងប្រទេសថៃ និងបានចូលគាល់ព្រះមហាក្សត្រថៃផងដែរនោះ បានមានប្រសាសន៍ប្រាប់ក្រុមអ្នកកាសែតនៅថៃ្ងពុធនេះ នៅឯព្រលានយន្តហោះអន្តរជាតិភ្នំពេញ ដូច្នេះថា ៖ «ព្រះមហាក្សត្រថៃ ខ្ញុំបានធ្វើរបាយការណ៍ថ្វាយលោក អំពីជោគជ័យនៃការពិភាក្សាគ្នាបន្តបន្ទាប់ តាំងពីសៀមរាបរហូតមកដល់ថ្ងៃម្សិលមិញនេះ បានទូលថ្វាយលោក ។ លោកក៏មានបន្ទូលបញ្ជាក់ហើយបញ្ជាក់ទៀតថា យើងគួរដោះស្រាយបញ្ហានេះដោយសន្តិភាព ចៀសវាងសង្គ្រាម ក្នុងស្មារតីប្រទេសជិតខាង ។ ឯកឧត្ដម តេជ ប៊ុនណាក រដ្ឋមន្ត្រីក្រសួងការបរទេសថៃក៏ឯកភាពជាមួយខ្ញុំថា យុគសម័យនេះការដោះស្រាយបញ្ហាព្រំដែនដោយវិធីយោធាវាហួសសម័យហើយ» ។
ក្រៅពីនេះប្រទេសកម្ពុជានិងថៃបានឯកភាពគ្នាបើកការចរចាទេ្វភាគីជាលើកទី៤ រវាងក្រុមការងារនៃប្រទេសទាំងពីរ នឹងធ្វើឡើងនៅថៃ្ងទី២៩ ខែសីហាសប្តាហ៍ខាងមុខនេះនៅក្នុងខេត្តសៀមរាប និងផ្តោតទៅលើការរៀបចំកងកម្លាំងទ័ពទាំងសងខាងទ្បើងវិញ ឈានទៅរកការដកកងទ័ពលើកទី២ ពីប្រាសាទព្រះវិហារ ជាពិសេសនៅវត្តកែវសិក្ខាគិរីស្វារៈ ឬវត្តប្រាសាទព្រះវិហារ នាពេលខាងមុខ ។
លោក ហោ ណាំហុង ប្រមុខការទូតកម្ពុជានៃប្រទេសកម្ពុជា បានអះអាងឲ្យដឹងថា ប្រទេសកម្ពុជានិងថៃបានឯកភាពគ្នាដោះមីនរួមគ្នានៅតាមខ្សែបន្ទាត់ព្រំដែននៃតំបន់ដែលកំពុងតែមានជម្លោះនឹងគ្នានោះ ។
លោកបានបញ្ជាក់ឲ្យដឹងថា នៅពេលណាមានការរៀបចំដកទាំងស្រុងនៃកងទ័ពភាគីកម្ពុជានិងថៃពីតំបន់ប្រាសាទព្រះវិហារនោះ កម្ពុជាមានគម្រោងការបើកច្រកព្រំដែននៅប្រាសាទព្រះវិហារ ដើម្បីទទួលភ្ញៀវទេសចរណ៍ឲ្យមកទស្សនាប្រាសាទព្រះវិហារ ហើយកម្ពុជានឹងដកពាក្យបណ្តឹងរបស់ខ្លួននៅឯក្រុមប្រឹក្សាសន្តិសុខរបស់អង្គការសហប្រជាជាតិដែលប្រទេសកម្ពុជាកំពុងតែសុំព្យួរនោះ ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ ដែលបានធ្វើបាតុកម្មអហិង្សាមិនបានសម្រេច កាលពីចុងសប្តាហ៍កន្លងទៅថ្មីៗនេះនៅក្នុងទីក្រុងភ្នំពេញ ដើម្បីសម្ដែងការប្រឆាំងនឹងការឈ្លានពានរបស់កងទ័ពថៃ បានមានប្រសាសន៍ប្រតិកម្មចំពោះលទ្ធផលនៃការចរចានេះថា ៖ «យើងឈ្នះ យើងមានប្រៀបលើសៀម បើយើងស្នើសុំទៅក្រុមប្រឹក្សាសន្តិសុខអង្គការសហប្រជាជាតិ ជួយធ្វើអន្តរាគមន៍ទាក់ទិនទៅនឹងចោរសៀមឈ្លានពានកម្ពុជា» ។
លោក វ៉ា គឹមហុង ប្រធានគណៈកម្មាធិការចម្រុះដោះស្រាយបញ្ហាវិវាទព្រំដែនកម្ពុជា បានមានប្រសាសន៍នៅថៃ្ងពុធនេះ នៅឯព្រលានយន្តហោះអន្តរជាតិភ្នំពេញ ថា កម្ពុជាមានឯកសារកម្មសិទ្ធិនិងឯកសារផែនទីទទួលស្គាល់ដោយអន្តរជាតិថា ប្រាសាទតាមាន់តូចនិងប្រាសាទតាមាន់ធំដែលជាបញ្ហានៅសេលសល់នោះ គឺជាកម្មសិទ្ធិស្របច្បាប់របស់កម្ពុជា ។
លោក វ៉ា គឹមហុង បានមានប្រសាសន៍ថា ៖ «កម្មសិទ្ធិរបស់យើងដូចជា តាមាន់ធំ តាមាន់តូច យើងមានកម្មសិទ្ធិ» ។
សូមរំឭកថាកម្ពុជានិងថៃបានយល់ព្រមគ្នាដកកងទ័ពទាំងសងខាងភាគច្រើនរួចទៅហើយកាលពីពេលថ្មីៗនេះ ហើយការចរចាទេ្វភាគីលើកទី៤នៅខេត្តសៀមរាប នៅថៃ្ងទី២៩ ខែសីហាសប្តាហ៍ខាងមុខនេះ គឺឈានទៅរកការដកកងទ័ពទាំងស្រុងនៃភាគីកម្ពុជានិងថៃ ៕
អត្ថបទដែលទាក់ទង
ស្ថានការណ៍នៅតំបន់ជម្លោះព្រំដែនមានសភាពតានតឹង
កម្ពុជាមានពេលច្រើនថែមទៀតដើម្បីដាក់ជូនផែនការអភិរក្សប្រាសាទព្រះវិហារ
ទាហានថៃ-ខ្មែរប្រឈមមុខគ្នានៅខាងលិចព្រះវិហារ ប៉ុន្តែគ្មានការផ្ទុះអាវុធទេ
អាជ្ញាធរខ្មែរចាប់បញ្ជូនសង្ឃថៃ៦អង្គទៅថៃវិញពីបទឆ្លងដែនខុសច្បាប់
នាយករដ្ឋមន្ត្រីខ្មែរព្រមានបាញ់ទម្លាក់យន្តហោះថៃដែលហោះចូលដែនអាកាសខ្មែរ
ទាហានថៃប៉ុនប៉ងសង់លេណដ្ឋានបេតុងប៉ុន្តែត្រូវទាហានខ្មែររារាំង
ជំនួបបិទទ្វារនាថ្ងៃ២៧មិថុនារវាងមន្ត្រីថៃនិងនាយករដ្ឋមន្ត្រីខ្មែរ
មេដឹកនាំខ្មែរទទួលជួបមន្ត្រីជាន់ខ្ពស់ថៃ២រូប
អ្នកភូមិមួយចំនួននៅក្បែរតំបន់ជម្លោះព្រំដែនចាកចេញពីលំនៅ
នាយករដ្ឋមន្ត្រីខ្មែរសោកស្ដាយចំពោះឥរិយាបថរបស់មេដឹកនាំថៃ
