លោក កែវ វណ្ណថន មន្រ្តីជាន់ខ្ពស់នៃអាជ្ញាធរនគរបាលកម្ពុជា និងជាមន្រ្តីនគរបាលរបស់ Interpol បានមានប្រសាសន៍ប្រាប់វិទ្យុអាស៊ីសេរីថា លោកមានការសង្ស័យថាលោកស្រី ជា រដ្ឋា កំពុងតែលាក់ខ្លួននៅក្នុងប្រទេសថៃនៅទ្បើយទេ ប៉ុនែ្តអាជ្ញាធរថៃមិនទាន់ឆ្លើយតបមកអាជ្ញាធរកម្ពុជាជុំវិញករណីលោកស្រី ជា រដ្ឋា នោះ។
លោក កែវ វណ្ណថន បានឲ្យដឹងថា ៖ «ខ្ញុំបានជូនដំណឹងទៅអស់ហើយ ជាពិសេសគឺនៅប្រទេសអាស៊ាន ទាំងអស់និយាយរួម សមាជិក Interpol ទាំងអស់នៅលើពិភពលោក។ យើងនៅតែបន្ត»។
លោកបានបញ្ជាក់ឲ្យដឹងថា អាជ្ញាធរនគរបាល Interpol បានចេញនិវេតក្រហម (Red Notice) ផ្ញើទៅប្រទេសចំនួន១៨០ប្រទេសដែលជាសមាជិករបស់ Interpol ដើម្បីសែ្វងរកចាប់ខ្លួនលោកស្រី ជា រដ្ឋា ដោយបានប្រាប់អំពីភិនភាគនិងរូបថតរបស់លោកស្រី ជា រដ្ឋា។
ការស្វែងរកចាប់ខ្លួនលោកស្រី ជា រដ្ឋា ដែលជាអតីតមេបញ្ជាការរងនៃកងរាជអាវុធហត្ថកម្ពុជា គឺនៅក្រោយពេលដែលតុលាការក្រុងភ្នំពេញ បានចេញដីកាស្វែងរកចាប់ខ្លួនលោកស្រី ជា រដ្ឋា ក្រោមបទចោទថាលោកស្រីមានការជាប់ពាក់ព័ន្ធក្នុងអំពើវាយប្រហារដោយទឹកអាស៊ីតមកលើ លោកស្រី យ៉ា សុខនីម អាយុ៣៥ឆ្នាំ ដែលជាម្តាយមីងរបស់នាង អ៊ិន សុខលីដា ដែលសេចក្តីរាយការណ៍នានាបានឲ្យដឹងថា នាង អ៊ិន សុខលីដា និងលោកស្រី ជា រដ្ឋា ធ្លាប់មានទំនាក់ទំនងសេ្នហាភេទដូចគ្នា។
នាង អ៊ិន សុខលីដា ត្រូវបានគេស្គាល់ថាជាតារាសម្ដែងនិងជាអតីតបវរកញ្ញាទេសចរណ៍របស់កម្ពុជា។ មិនអាចទាក់ទងក្រុមគ្រួសាររបស់នាង អ៊ិន សុខលីដា បានភ្លាមៗទេនៅថៃ្ងអង្គារនេះ ជុំវិញស្ថានការណ៍រស់នៅរបស់ក្រុមគ្រួសាររបស់នាងនាពេលបច្ចុប្បន្ននេះ។
លោក អំ សំអាត ប្រធានផែ្នកស៊ើបអង្កេតរបស់អង្គការសិទ្ធិមនុស្ស លីកាដូ ដែលបានស៊ើបអង្កេតរឿងនេះកន្លងមក បានមានប្រសាសន៍ប្រាប់វិទ្យុអាស៊ីសេរីថា ៖ «មានភស្តុតាងមួយចំនួនដែលពាក់ព័ន្ធនឹងជនសង្ស័យ ដោយសង្ស័យទៅលើលោកស្រី ជា រដ្ឋា ដែលជាអតីតអនុរងសេនាធិការប៉េអឹមលើផ្ទៃប្រទេស ហើយនិងក្រុមកូនចៅរបស់គាត់ដែលជាអង្គរក្សរបស់គាត់ ២-៣នាក់ទៀត។ អ៊ីចឹងហើយយើងឃើញថា ក្រុមគ្រួសាររបស់ជនរងគ្រោះបច្ចុប្បន្ននេះ គឺកំពុងតែនៅមានការភិតភ័យពីសុវត្ថិភាពផ្ទាល់ខ្លួនរបស់ក្រុមគ្រួសារ»។
លោកស្រី ជា រដ្ឋា ដែលសមត្ថកិច្ចនគរបាល Interpol កំពុងតែស្វែងរកចាប់ខ្លួននោះ ធ្លាប់បានឆ្លើយបដិសេធប្រាប់វិទ្យុអាស៊ីសេរីកាលពីពេលកន្លងទៅនេះថា លោកស្រីគ្មានការជាប់ពាក់ព័ន្ធក្នុងអំពើវាយប្រហារដោយទឹកអាស៊ីតដូចការចោទប្រកាន់នោះទេ។
សូមរំឮកថា តារាចម្រៀងនិងតារាសិល្បៈក្នុងប្រទេសកម្ពុជា ជាពិសេសជាស្រី្តភេទ បានរងការបាញ់សម្លាប់និងរងរបួសធ្ងន់កន្លងមក មានដូចជាលោកស្រី ពិសិទ្ធ ពិលីកា នាង ទូច ស្រីនិច និងនាង ពៅ បញ្ញាពេជ្រ ជាដើម ប៉ុនែ្តគេកត់សម្គាល់ឃើញថាអាជ្ញាធរនគរបាលកម្ពុជានៅមិនទាន់បានចាប់ខ្លួនជនសង្ស័យណាម្នាក់មកផ្តន្ទាទោសនៅឡើយទេ៕