រដ្ឋមន្ត្រីក្រសួងពាណិជ្ជកម្ម លោក ចម ប្រសិទ្ធ បានមានប្រសាសន៍ថាគោលនយោបាយដែលផ្សាភ្ជាប់ពាណិជ្ជកម្មទៅនឹងលក្ខខណ្ឌការងារនិងការគោរពសិទ្ធិកម្មករ បានធ្វើឲ្យវិស័យកាត់ដេរក្នុងប្រទេសកម្ពុជានៅតែមានលទ្ធភាពប្រកួតប្រជែងជាមួយបណ្ដាប្រទេសផ្សេងទៀត ដូចជាចិន វៀតណាម ប៉ាគីស្ថាន និងឥណ្ឌា ជាដើម ។
លោក ចម ប្រសិទ្ធ បានមានប្រសាសន៍ថា ៖ «យើងបានត្រៀមតាំងពី ៥-៦ឆ្នាំមុនទៅហើយ ដើម្បីធ្វើយ៉ាងម៉េចអាចយើងនៅប្រកួតបាននៅពេលដែលអស់របាំងហ្នឹង ។ អ៊ីចឹងអ្វីដែលយើងធ្វើគឺជាគោលនយោបាយផ្សាភ្ជាប់ពាណិជ្ជកម្មទៅនឹងលក្ខខណ្ឌការងារ ។ យើងចង់ឲ្យរោងចក្រទាំងឡាយដែលផលិតនៅក្នុងកម្ពុជានេះគឺគោរពសិទ្ធិកម្មករ» ។
លោករដ្ឋមន្ត្រីក្រសួងពាណិជ្ជកម្មបានបន្តទៀតថា ប្រទេសកម្ពុជាបានបន្តទាមទារឲ្យសហរដ្ឋអាមេរិកបន្ធូរបន្ថយពន្ធចំពោះទំនិញរបស់កម្ពុជា ដើម្បីឲ្យកម្ពុជាមានលទ្ធភាពប្រកួតប្រជែងជាមួយនឹងប្រទេសធំៗ ដូចជា ចិន និងវៀតណាម ។
លោក ចម ប្រសិទ្ធ បានឲ្យដឹងទៀតថារហូតមកទល់នឹងពេលនេះ ទំនិញកម្ពុជាចំនួនជាង៦ពាន់មុខបានរួចពន្ធនាំចូលក្នុងទីផ្សារសហរដ្ឋអាមេរិក ហើយនៅជាង៦ពាន់មុខទៀតដែលមិនទាន់បានរួចពន្ធ ។
លោក ចម ប្រសិទ្ធ ក៏បានឲ្យដឹងទៀតថាវិស័យកាត់ដេរនឹងមានការកើនឡើងក្រោយពេលការបោះឆ្នោត ហើយបានបដិសេធចំពោះការលើកឡើងថា រោងចក្រកាត់ដេរនៅក្នុងប្រទេសកម្ពុជានឹងត្រូវបិទទ្វារ បើសិនណាជាតម្លៃប្រេងនៅតែថ្លៃ ដែលការលើកឡើងនេះបានបង្កឲ្យមានការព្រួយបារម្ភចំពោះកម្មករ កម្មការិនីខ្មែរ ។
តាមរបាយការណ៍របស់អង្គការពលកម្មអន្តរជាតិ (ILO) កាលពីខែសីហា ឆ្នាំ ២០០៨ បានឲ្យដឹងថាសហរដ្ឋអាមេរិកគឺជាទីផ្សារសម្លៀកបំពាក់ធំបំផុតសម្រាប់កម្ពុជា ។ កាលពីឆ្នាំ ២០០៧ ប្រទេសកម្ពុជាបាននាំចេញផលិតផលសម្លៀកបំពាក់ជាង៧០% ទៅសហរដ្ឋអាមេរិក ហើយ ២២% ទៅប្រទេសក្នុងសហគមន៍អឺរ៉ុប ។
លោក ចម ប្រសិទ្ធ បានមានប្រសាសន៍ថាល្បឿននៃការនាំចេញសម្លៀកបំពាក់ នឹងនៅតែកើនឡើងដដែល ៖ «ប្រហែលជាល្បឿននៃការនាំចេញរបស់យើងទៅសហរដ្ឋអាមេរិកមិនធ្លាក់ពេកទេ ។ រាល់ឆ្នាំយើងកើនពី ១៥ ទៅ ២០% ប៉ុន្តែឆ្នាំ ២០០៨ នេះ ខ្ញុំសង្ឃឹមថាយ៉ាងច្រើនណាស់ ខ្ទង់ ៧ ទៅ ៨% មានន័យថាយើងនៅតែកើន នាំចេញថែមបានកាន់តែច្រើន ប៉ុន្តែគ្រាន់តែយើងមិនកើនបាន២០% ដូចមុនទេ» ។
លោក ចម ប្រសិទ្ធ បានមានប្រសាសន៍ថាចាប់ពីខែមករាដល់ខែកក្កដា ឆ្នាំ ២០០៨ ការនាំចេញផលិតផលសម្លៀកបំពាក់កម្ពុជាទៅបរទេស គិតជាទឹកប្រាក់ចំនួន ២,៤ពាន់លានដុល្លារ ហើយថាកាលពីឆ្នាំ ២០០៧ ការនាំចេញគិតជាទឹកប្រាក់គឺ ៤ពាន់លានដុល្លារសហរដ្ឋអាមេរិក ។ លោកបានបន្តថា ២ភាគ៣ នៃផលិតផលសម្លៀកបំពាក់ទាំងអស់នោះគឺនាំចេញទៅទីផ្សារសហរដ្ឋអាមេរិក ។
បើតាមរបាយការណ៍របស់អង្គការ ILO បានឲ្យដឹងថាសព្វថ្ងៃកម្មកររោងចក្រកាត់ដេរមានចំនួនប្រមាណ ៣សែន៥ម៉ឺននាក់ ដែលចំនួននេះមានការកើនឡើងប្រមាណ ១៨% បើប្រៀបធៀបទៅនឹងពីរឆ្នាំកន្លងទៅ ៕