លោកឧត្តមសេនីយ៍ឯក សុខ ផល អគ្គស្នងការរងនគរបាលជាតិ បានមានប្រសាសន៍ប្រាប់វិទ្យុអាស៊ីសេរីនៅថ្ងៃនេះថា ការបង្កើនកិច្ចការពារសន្តិសុខនោះបានធ្វើឡើងទាំងកងកម្លាំងសន្តិសុខនិងបណ្តាញព័ត៌មាន។
លោកឧត្តមសេនីយ៍ឯក សុខ ផល បានមានប្រសាសន៍ថា ៖ «យកចិត្តទុកដាក់បង្កើនការបន្ថែមកម្លាំងល្បាតត្រួតពិនិត្យចំហ ទី១។ ទី២ យើងបង្កើនការប្រមូលព័ត៌មានផ្សេងៗដែលពាក់ព័ន្ធទៅការការពារកន្លែងសំខាន់ៗ ដូចជាអូតែលធំៗ ទូត និវាសដ្ឋាន កន្លែងសប្បាយអីផ្សេងៗ ឧទាហរណ៍ អង្គវត្ត សៀមរាប កំពង់សោម អ៊ីចឹងទៅណា៎។ យើងមានការប្រុងប្រយ័ត្នដែរ មានការត្រួតពិនិត្យព័ត៌មាន ប្រមូលព័ត៌មាន ហើយបង្កើនកម្លាំងល្បាត»។
ទោះជាយ៉ាងណាក៏ដោយលោកឧត្តមសេនីយ៍ឯក សុខ ផល បានបញ្ជាក់ថា មិនមានសញ្ញាអាក្រក់ណាមួយអំពីបញ្ហាភេរវកម្មមាននៅក្នុងប្រទេសនោះទេ។
គួរបញ្ជាក់ថា ចាប់តាំងពីថ្ងៃពុធមកមានមនុស្សជាង១២០នាក់ហើយដែលបានស្លាប់និងជាង៣០០នាក់ផ្សេងទៀតបានរងរបួសដោយសារការវាយប្រហារពីពួកភេរវករនៅទីក្រុងមុមបៃ (Mumbai) ប្រទេសឥណ្ឌា ដែលមន្រ្តីឥណ្ឌានិងអ្នកជំនាញពីប្រទេសនានាបានដាក់ការសង្ស័យថា ជាការបង្កឡើងដោយក្រុមសកម្មប្រយុទ្ធអ៊ិស្លាមនិយមនៅប្រទេសប៉ាគីស្ថាន។
មន្រ្តីស្ថានទូតសហរដ្ឋអាមេរិកប្រចាំទីក្រុងភ្នំពេញ លោក John Johnson បានសរសេរតាមរយៈសារទូរសព្ទ័ប្រាប់វិទ្យុអាស៊ីសេរីនៅថ្ងៃនេះថា តាមបទបញ្ចាផ្ទៃក្នុង លោកមិនអាចធ្វើអត្ថាធិប្បាយអំពីបញ្ហាសន្តិសុខបានទេ៕