ប៉ុន្តែ រដ្ឋមន្ត្រីក្រសួងឧស្សាហកម្ម រ៉ែ និងថាមពល អះអាងថា ប្រទេសកម្ពុជា នឹងមានបណ្ដាញចែកចាយចរន្តអគ្គិសនីដល់បណ្ដាភូមិក្នុងទូទាំងប្រទេស មុនឆ្នាំ២០៣០ និងមានអគ្គិសនីប្រើប្រាស់គ្រប់ភូមិនៅឆ្នាំ២០២០។
រដ្ឋមន្ត្រីក្រសួងឧស្សាហកម្ម រ៉ែ និងថាមពល លោក ស៊ុយ សែម បានអះអាងក្នុងបទសម្ភាសន៍ជាមួយវិទ្យុអាស៊ីសេរី នៅពីថ្ងៃទី២៣ ធ្នូ ថា ប្រទេសកម្ពុជា នឹងមានអគ្គិសនីប្រើប្រាស់គ្រប់ភូមិទាំងអស់ក្នុងទូទាំងប្រទេស យ៉ាងយូរបំផុតនៅឆ្នាំ២០២០ ខាងមុខនេះ។
លោករដ្ឋមន្ត្រីក្រសួងឧស្សាហកម្ម រ៉ែ និងថាមពល បានមានប្រសាសន៍យ៉ាងដូច្នេះក្នុងពិធីជួបជុំផ្ដល់បទពិសោធន៍ដល់សិស្សានុសិស្សនៅវិទ្យាល័យកណ្ដៀង ដោយលោកបានបញ្ជាក់បន្ថែមថា ថាមពលអគ្គិសនីនេះ គឺបានមកពីប្រភពជាច្រើន មានដូចជា ប្រភពវារីអគ្គិសនី ប្រភពដើរដោយថាមពលធ្យូងថ្ម ប្រភពថាមពលជីវម៉ាស និងប្រភពថាមពលពន្លឺព្រះអាទិត្យជាដើម។
ក្នុងឱកាសនេះ លោករដ្ឋមន្ត្រីក្រសួងឧស្សាហកម្ម រ៉ែ និងថាមពល ក៏បានអះអាងដែរថា លោកនឹងតខ្សែបណ្ដាញចរន្តឲ្យប្រជាពលរដ្ឋ ៧០% ក្នុងទូទាំងប្រទេសបានប្រើប្រាស់មុនដំណាច់ឆ្នាំ២០៣០៖ «ដល់ឆ្នាំ២០៣០ បណ្ដាញរបស់ជាតិ បណ្ដាញចែកចាយតាមខ្សែ អាហ្នឹងយើងលែងនិយាយរឿងអាគុយអីហើយ ៧០% នៃគ្រួសារប្រជាជនទូទាំងប្រទេសមានអគ្គិសនីដែលតពីបណ្ដាញចែកចាយដែលមានគុណភាព ស្ថិរភាពមានសុវត្ថិភាពត្រឹមត្រូវ។ ហ្នឹងផែនការយើង គឺប៉ុណ្ណឹង។ ប៉ុន្តែ ស្អីជាមហិច្ឆតារបស់យើងនោះ គឺផែនការយើងដាក់ឲ្យវែង ប៉ុន្តែយើងខិតខំបង្រួមឲ្យខ្លីជាងហ្នឹង នេះជាមហិច្ឆតារបស់យើង»។
យ៉ាងនេះក្ដី សមាជិកព្រឹទ្ធសភាមកពីគណបក្ស សម រង្ស៊ី គឺលោក អេង ឆៃអ៊ាង មានប្រសាសន៍ថា ការអះអាងនេះ អាចក្លាយជាការពិតបាន។ ប៉ុន្តែលោកថា នេះមិនមែនជាមោទនភាពសម្រាប់ប្រជាពលរដ្ឋខ្មែរនោះទេ ព្រោះប្រជាពលរដ្ឋត្រូវប្រើប្រាស់ថាមពលមួយដែលមានតម្លៃខ្ពស់មិនសមស្រប និងជីវភាពប្រចាំថ្ងៃរបស់ពួកគាត់ឡើយ។ ព្រឹទ្ធសមាជិករូបនេះបន្តថា ការអះអាងខ្លះ គឺធ្វើឡើងដើម្បីចំណេញនយោបាយប៉ុណ្ណោះ។
លោក អេង ឆៃអ៊ាង៖ «បើយើងប្រៀបធៀបជាមួយប្រទេសជិតខាងយើងនោះ គឺយើងដើរយឺតជាងគេឆ្ងាយណាស់។ នៅវៀតណាម ថៃ អគ្គិសនីគេទៅដល់ភូមិតាំងពីយូរឆ្នាំមកហើយ ហើយតម្លៃថោកទៀតផង។ អ្វីដែលជាមោទនភាពនោះ គឺយើងធ្វើយ៉ាងណាឲ្យមានអគ្គិសនីដល់ភូមិ ហើយមានតម្លៃថោក ដើម្បីឲ្យប្រជាពលរដ្ឋអាចប្រើប្រាស់បានតាមតម្រូវការក្នុងជីវភាពប្រចាំថ្ងៃផង ទើបប្រសើរ»។
ប្រហាក់ប្រហែលនេះដែរ អ្នកវិភាគបញ្ហាសង្គម គឺលោក កែម ឡី មានប្រសាសន៍ថា ការអះអាងនេះអាចក្លាយជាការពិត ឬយ៉ាងណានោះ អាស្រ័យលើឆន្ទៈនយោបាយរបស់អ្នកដឹកនាំប្រទេស៖ «ប្រសិនបើយើងខ្ចីលុយគេ ហើយគេឲ្យខ្ចីគ្រប់គ្រាន់នោះ គឺអាចធ្វើបាន។ ក៏ប៉ុន្តែយើងត្រូវគិតអំពីផលវិបាករបស់វា ព្រោះជួនកាលយើងមិនទាន់បានប្រើប្រាស់អគ្គិសនីនេះផង ស្រាប់តែកើតមានវិបត្តិបំណុលក៏ថាបាន»។
លោក កែម ឡី បន្តថា មានការអះអាងនានាដែលកន្លងទៅក៏មិនអាចសម្រេចបានដែរ ដូចជាការអះអាងពីការនាំស្រូវចេញឲ្យបាន ១លានតោនក្នុងមួយឆ្នាំ ការអះអាងពីការបូមយកប្រេងកាតឆៅពីក្នុងបាតសមុទ្រឲ្យបាននៅថ្ងៃទី១២ ខែ១២ ឆ្នាំ២០១២ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Dear his excellency...there is around 1.30 hour power cut everyday in Phnom Penh, the capital city of Cambodia...
Dec 26, 2012 09:11 PM
This Man and his wife are Moha Corrupted! His approval of natural resource exploration destroy our country Environmental systems. Watch out Folks!
Dec 26, 2012 02:57 PM
Khmer government must stop singing; spoke and speaking without responsibility. Dream Dream.. About oil had cancelled twice if not confused. Please forget about industries destroy country like environment if Khmer government is smart. Khmer goverment must know that country has no enough national resources in processing for living so it must think about industry with forgeting destroying environment. There are many concepts for development just take real human resources not family connection/tree.
Dec 26, 2012 10:12 AM
