សេចក្ដីប្រកាសព័ត៌មានរបស់ប្រតិភូសហភាពអឺរ៉ុបប្រចាំនៅកម្ពុជា ដែលផ្សព្វផ្សាយនៅថ្ងៃទី១៩ ខែមេសា បានឲ្យដឹងថា ទឹកប្រាក់ជំនួយដែលមានតម្លៃស្មើនឹង ១,៦លានដុល្លារអាមេរិកនេះ គឺបានមកពីកម្មវិធី ឧបករណ៍សហភាពអឺរ៉ុប ដើម្បីលទ្ធិប្រជាធិបតេយ្យ និងសិទ្ធិមនុស្ស។ ថវិកានេះនឹងផ្ដល់ជូនដល់អង្គការមិនមែនរដ្ឋាភិបាល ដែលមានគម្រោងកម្មវិធីនានា ដើម្បីការអភិវឌ្ឍ និងពង្រីកលទ្ធិប្រជាធិបតេយ្យ និងការគោរពសិទ្ធិមនុស្សនៅកម្ពុជា ការលើកកម្ពស់ និងពង្រឹងសិទ្ធិអំណាចរបស់ជនជាតិដើម និងសហគមន៍របស់ពួកគេ ពង្រឹងតួនាទីស្ត្រីនៅក្នុងសង្គម និងឆាកនយោបាយជាដើម។
ជំនួយនេះក៏នឹងផ្ដល់ទៅឲ្យសង្គមស៊ីវិលដែលបំពេញការងារខាងផ្នែកប្រយុទ្ធប្រឆាំងការជួញដូរមនុស្ស ទប់ស្កាត់ការធ្វើទារុណកម្ម និងកែលម្អលក្ខខណ្ឌនៅក្នុងពន្ធនាគារ ដើម្បីធានាការពារសិទ្ធិរបស់ពិរុទ្ធជន និងទណ្ឌិត ព្រមទាំងការលើកកម្ពស់សន្តិសុខ និងកម្មសិទ្ធិដីធ្លីសម្រាប់ក្រុមប្រជាពលរដ្ឋដែលងាយរងគ្រោះ និងដែលទន់ខ្សោយបំផុត។ រីឯកាលបរិច្ឆេទនៃការទទួលសំណើសុំថវិកាសម្រាប់គម្រោងកម្មវិធីថ្មីផ្នែកសិទ្ធិមនុស្សនេះ គឺចាប់ផ្ដើមពីថ្ងៃទី១៩ ខែមេសា រហូតដល់ថ្ងៃទី១២ ខែកក្កដា ឆ្នាំ២០១០។
សហភាពអឺរ៉ុបបានប្រកាសទទួលសំណើសុំជំនួយហិរញ្ញវត្ថុបែបនេះជារៀងរាល់ឆ្នាំ ចាប់តាំងពីឆ្នាំ២០០៤មក ហើយបច្ចុប្បន្ននេះបានផ្ដល់មូលនិធិសម្រាប់គម្រោងកម្មវិធីការងារសិទ្ធិមនុស្សចំនួន ៣៣ ដែលអនុវត្តដោយអង្គការមិនមែនរដ្ឋាភិបាលជាតិ និងអន្តរជាតិ ចំនួន ២៦ នៅកម្ពុជា៕