ជំនួយថវិការបស់សហភាពអឺរ៉ុប លើកនេះ គឺសម្រាប់ដំណើរការគម្រោងកម្មវិធី អប់រំសម្រាប់ទាំងអស់គ្នា ក្នុងកម្រិតបឋម និងមធ្យមសិក្សា ដោយផ្ដោតទៅលើផ្នែកសំខាន់៣ រួមមានការបោះពុម្ពសៀវភៅមេរៀន បណ្ដុះបណ្ដាលធនធានមនុស្ស និងផ្តល់អាហារូបករណ៍ដល់សិស្សក្រីក្រ។
ទាក់ទងនឹងការបោះពុម្ពសៀវភៅសិក្សា មន្ត្រីផ្នែកទំនាក់ទំនងព័ត៌មាននៃសហភាពអឺរ៉ុប ប្រចាំនៅកម្ពុជា អ្នកស្រី ប៉ុក ពូន គូសបញ្ជាក់ថា គម្រោងកម្មវិធីនេះនឹងជួយក្រសួងអប់រំ យុវជន និងកីឡា ក្នុងការបោះពុម្ពសៀវភៅមេរៀនគ្រប់មុខវិជ្ជា ដើម្បីចែកចាយឥតគិតថ្លៃដល់សិស្សានុសិស្ស នៅទូទាំងប្រទេស។
ចំណែកការពង្រឹងធនធានមនុស្សវិញ អ្នកស្រី ប៉ុក ពូន ឱ្យដឹងបន្ថែមថា រួមមានការបណ្ដុះបណ្ដាលដល់គ្រូបង្គោល និងជួយផ្តល់មធ្យោបាយធ្វើដំណើរជាដើម៖ «ផ្តល់វគ្គបណ្ដុះបណ្ដាលដល់គាត់ និងផ្តល់មធ្យោបាយធ្វើដំណើរ ដូចជាគ្រូបង្គោលដែលគាត់ចុះទៅបង្រៀនគ្រូនៅជនបទឆ្ងាយៗ នៅមូលដ្ឋាន យើងមានទិញម៉ូតូជូនគាត់ជិះរៀងខ្លួន។ ចំណែកខាងផ្លូវទឹក គឺយើងមានផ្តល់កាណូត សម្រាប់ប្រើប្រាស់រួមជាសហគមន៍ ដែលនៅក្រោមការគ្រប់គ្រងរបស់មន្ទីរ ឬការិយាល័យអប់រំខេត្ត និងស្រុក»។
ចំពោះកម្មវិធីផ្តល់អាហារូបករណ៍ដល់សិស្សក្រីក្រ គឺអនុវត្តដោយក្រសួងអប់រំ យុវជន និងកីឡា ដោយផ្អែកតាមរបាយការណ៍ទិន្នន័យជំរឿនរបស់អង្គការ ជី.ធី.ហ្សេដ (GTZ) របស់ប្រទេសអាល្លឺម៉ង់ និងត្រួតពិនិត្យដោយសហភាពអឺរ៉ុប។
អ្នកស្រី ប៉ុក ពូន បញ្ជាក់ថា គម្រោងនេះគឺផ្តល់ជាសំខាន់ដល់សិស្សកម្រិតមធ្យមសិក្សា៖ «ដែលថាយើងជួយអាហារូបករណ៍ដល់សិស្សក្រីក្រហ្នឹង គឺយើងជួយជាលក្ខណៈថវិកា ដើម្បីជួយសម្រាលដល់ក្រុមគ្រួសារ ឱ្យកូនសិស្សអាចទិញ ដូចជាទិញខោអាវសម្រាប់ស្លៀកទៅរៀនជាដើម»។
វិស័យអប់រំសិក្សាធិការ គឺជាផ្នែកចម្បងមួយ ដែលសហភាពអឺរ៉ុប បានជួយឧបត្ថម្ភគាំទ្រដល់ប្រទេសកម្ពុជា។ កញ្ចប់ថវិកាជំនួយលើកនេះ ដែលមានទឹកប្រាក់ចំនួនជិត ៧លានអឺរ៉ូ ស្មើនឹងប្រមាណជាង ៣៦ពាន់លានរៀល គឺសម្រាប់ប្រើប្រាស់ក្នុងឆ្នាំសិក្សា២០១២-២០១៣។ ជំនួយនេះ គឺបន្ថែមទៅលើថវិកាចំនួនជិត ៨លានអឺរ៉ូ ស្មើនឹងប្រមាណ ៤១ពាន់លានរៀល ដែលសហភាពអឺរ៉ុប បានផ្តល់ដល់ក្រសួងអប់រំ ក្នុងឆ្នាំសិក្សា២០១១-២០១២ កន្លងទៅ។
នៅក្នុងពិធីប្រគល់ថវិកាជំនួយ នៅថ្ងៃទី៣០ ខែមករា នេះ តំណាងសហភាពអឺរ៉ុប ប្រចាំនៅកម្ពុជា និងតំណាងក្រសួងអប់រំ យុវជន និងកីឡា ក៏នឹងពិភាក្សាគ្នាលម្អិតអំពីលទ្ធភាព និងទិសដៅក្នុងការអនុវត្តបន្តគម្រោងកម្មវិធីសម្រាប់រយៈពេល ២ឆ្នាំទៅមុខទៀត គឺឆ្នាំ២០១៤ ដល់ឆ្នាំ២០១៦៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។