រដ្ឋមន្រ្តីសិទ្ធិមនុស្សនៃប្រទេសបារាំង លោកស្រី រ៉ាម៉ា យ៉ាដ (Rama Yade) បានមានប្រសាសន៍ កាលពីថ្ងៃសុក្រម្សិលមិញថា បារាំងនឹងផ្តល់ប្រាក់ជំនួយ១លានដុល្លារអាមេរិកថែមទៀត ដល់សាលាក្តីខ្មែរក្រហមដែលកំពុងមានបញ្ហាខ្វះថវិកាដែលអាចនឹងធ្វើឲ្យដំណើរការកាត់សេចក្តីអតីតមេដឹកនាំខែ្មរក្រហមអាចនឹងពន្យារតទៅទៀត ។
នៅក្នុងទស្សនកិច្ចចំនួនបីថ្ងៃនៅកម្ពុជា លោកស្រីបានជួបជាមួយនឹងមន្រ្តីនៃសាលាក្តីខ្មែរក្រហមនិងមន្រ្តីអង្គការសហប្រជាជាតិ គាំទ្រសាលាក្តីខ្មែរក្រហម កាលពីថ្ងៃព្រហស្បតិ៍លោកស្រីបានបញ្ជាក់ជាថ្មីថា ប្រទេសបារាំងគាំទ្រដល់ដំណើរការកាត់ទោសអតីតមេដឹកនាំខ្មែរក្រហម ពីបទប្រព្រឹត្តអំពើឃោរឃៅក្នុងអំឡុងឆ្នាំ១៩៧៥ រហូតដល់ ១៩៧៩ ។
សូមជម្រាបថា ប្រទេសបារាំងជាអ្នកផ្តល់ប្រាក់ជំនួយលំដាប់ថ្នាក់ទី២ បន្ទាប់ពីប្រទេសជប៉ុនដែលមានទឹកប្រាក់សារុបចំនួន ៥លានដុល្លារនៅក្នុងមូលនិធិលើកដំបូង ៕