តំណាងរាស្រ្តគណបក្សសមរង្ស៊ី លោក សុន ឆ័យ មានប្រសាសន៍ថា អំពើរបស់អាជ្ញាធរនោះជាទង្វើខុសច្បាប់ទាំងស្រុងក្នុងការបង្ខំបណ្តេញពលរដ្ឋ បើទោះបីប្រជាជនរស់នៅលើដីហាមឃាត់ក៏ដោយត្រូវជូនដំណឹងមុនសិន។
លោកថា រដ្ឋាភិបាលគួរពិចារណាដោះស្រាយបន្ទាន់ជុំវិញរឿងនេះ ហើយតំណាងរាស្រ្តរង់ចាំពាក្យប្តឹងពីពលរដ្ឋឃុំតាកែននោះដើម្បីជួយដោះស្រាយតាមផ្លូវច្បាប់។
លោក សុន ឆ័យ មានប្រសាសន៍ថា ៖ «អ្វីដែលធ្វើដល់បងប្អូនជាង២០០គ្រួសារនៅអន្លង់ក្រោមនេះគឺជាអំពើខុសច្បាប់ ហើយវាអមនុស្សធម៌ទៅទៀត។ វាជាការខុសគោលការណ៍គ្រប់គ្រងដោយពលរដ្ឋ ដោយអត់មានដីធ្លីរស់នៅ គឺមានសិទ្ធិផ្ដល់ជម្រកដល់ពលរដ្ឋមិនមែនទៅធ្វើបាបពលរដ្ឋដូច្នោះទេ»។
រីឯមន្រ្តីការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ការបណ្តេញពលរដ្ឋដោយប្រើកម្លាំងយោធានិងអំពើហិង្សា ហើយគ្មានការជូនដំណឹងមុនវាជារឿងរំលោភច្បាប់និងរំលោភសិទ្ធិមនុស្សធ្ងន់ធ្ងរ។ លោកថា យោធាជាកម្លាំងការពារជាតិមិនត្រូវយកយោធាមកវាយដំពលរដ្ឋខ្លួនឯងដូច្នេះទេ។
លោក អំ សំអាត បានឲ្យដឹងថា ៖ «ការប្រើប្រាស់កម្លាំងដោយប្រើអំពើហិង្សាទៅលើប្រជាពលរដ្ឋវាមិនមែនជាដំណោះស្រាយសមស្របសម្រាប់ដោះស្រាយទេ យើងសុំឲ្យប្រើវិធីដោះស្រាយតាមសន្តិវិធី»។
មន្រ្តីសមាគមការពារសិទ្ធិមនុស្សអាដហុកខេត្តកំពត អ្នកស្រី ទ្រី ឈូន មានប្រសាសន៍ថា ក្រុមបង្រ្កាបពលរដ្ឋនោះគឺជាយោធាកងពលតូចលេខ៣១ កងអាវុធហត្ថនិងមន្រ្តីបរិស្ថាន។ អ្នកស្រីថា ចំណុចក្បាលដំរី អន្លង់ក្រោម អន្លង់លើ សុទ្ធតែស្ថិតក្នុងរង្វង់ពាក់ព័ន្ធដីអភិវឌ្ឍន៍ជនពិការ។
ប្រធាន៥០ខ្នងភូមិអន្លង់ក្រោម លោក ហុង ចាន់ថា ឲ្យដឹងនៅថ្ងៃពុធថា បន្ទាប់ពីផ្ទះនិងទ្រព្យសម្បត្តិឆេះអស់ប្រជាជនទាំងនោះកំពុងដាច់ស្បៀង ហើយមានប្រជាជន៣០%បានធ្វើដំណើរឆ្លងទឹកទៅសុំអ្នកភូមិអន្លង់ក្មេងលេង ឃុំបាក់រទេះ ស្រុកកំពង់សីលា ខេត្តកោះកុង ដែលនៅជាប់ឃុំតាកែន ស្រុកឈូក ខេត្តកំពត រស់នៅបណ្តោះអាសន្ន។ ឯមួយចំនួនធំទៀតទ្រាំរស់នៅលើគំនរផេះផ្ទះឆេះនេះដើម្បីរង់ចាំរដ្ឋាភិបាលនិងអង្គការនានាជួយដោះស្រាយបញ្ហាវិវាទដីដែលជាឧទ្យានជាតិបូកគោនោះ ៖ «ភាគច្រើន ប្រហែលជា១៧០គ្រួសារជាងដែរ កំពុងដេកនៅលើគំនរផេះ»។
សូមជម្រាបថា អំពើហិង្សានោះបាននាំឲ្យមានអ្នករបួស៧នាក់ ស្រាល៤នាក់ និងរបួសធ្ងន់៣នាក់។
អ្នករបួសធ្ងន់ឈ្មោះ ប្រាក់ យ៉ុង អាយុ៥១ឆ្នាំ អះអាងពីមន្ទីរពេទ្យខេត្តកំពង់ស្ពឺថា ៖ «ពេលវ៉ៃខ្ញុំហើយ គេដាក់ខ្នោះខ្ញុំទៅកន្លែងប៉ុស្តិ៍គេនោះ នៅកន្លែងទាហាន កន្លែងប៉ុស្តិ៍ប៉ូលិស»។
លោក បាន ហុងរិន អាយុ៥២ឆ្នាំ របួសធ្ងន់ សម្រាកមន្ទីរពេទ្យខេត្តកំពង់ស្ពឺដែរ បានអះអាងថា ៖ «មុនដំបូងវាឲ្យរុះ ដល់រុះវាមិនចេញ គេដុត។ ដល់ដុត រារាំងគេមិនឲ្យដុត គេទាត់ គេធាក់ គេវ៉ៃ»។
មន្រ្តីការពារសិទ្ធិមនុស្សលីកាដូឲ្យដឹងថា កំពុងត្រៀមស្បៀងជួយសង្រ្គោះបន្ទាន់ប្រជាជនជាង២០០គ្រួសារនៅចំណុចអន្លង់ក្រោមនោះហើយ៕