លោក យ៉ែម បុញ្ញារិទ្ធ តំណាងរាស្រ្តគណបក្សសិទ្ធិមនុស្សមណ្ឌលព្រៃវែងមានប្រសាសន៍ថា ថ្វីបើការចាកចេញរបស់លោក កែវ រ៉េមី មិនមានផលប៉ះទង្គិច ប៉ុន្តែកំណែទម្រង់និងការរៀបចំរចនាសម្ព័ន្ធរបស់បក្សនៅក្រោយពេលបោះឆ្នោតរួច ត្រូវតែធ្វើឡើងវិញ។
លោកបន្តទៀតថា កិច្ចប្រជុំនោះនិងផ្តោតផងដែរទៅលើការផ្តល់ដំណឹងទៅដល់មន្រ្តីបក្សគ្រប់ស្រទាប់និងបន្តការចងសម្ព័ន្ធជាមួយគណបក្សប្រឆាំងសមរង្ស៊ីទៅមុខទៀត។
លោក យ៉ែម បុញ្ញារិទ្ធ បានឲ្យដឹងថា ៖ «ថ្នាក់ដឹកនាំទាំងប៉ុន្មានមូលមតិគ្នាច្បាស់លាស់ទៅលើរឿងជាតិនិយមពិតប្រាកដនិងគោលនយោបាយ។ លើសពីនេះទៅទៀតដែលយើងព្យាយាមដូចគណបក្សសិទ្ធិមនុស្សធ្លាប់តែនិយាយអ៊ីចឹង គឺថាយើងយល់ឃើញថា មានតែការរួបរួមអ្នកប្រជាធិបតេយ្យទេដែលអាចបម្រើការពារ និងកសាងប្រទេសជាតិយើងបានដោយពិតប្រាកដ»។
កាលពីថ្ងៃអង្គារកន្លងទៅ អនុប្រធានគណបក្សសិទ្ធិមនុស្ស លោក កែវ រ៉េមី និងមន្រ្តី២នាក់ទៀតផ្នែកហិរញ្ញវត្ថុបានចុះចូលគណបក្សប្រជាជនកម្ពុជា។
លោក កែវ រ៉េមី មានប្រសាសន៍នៅក្នុងឱកាសនោះថា ការធ្វើនយោបាយប្រឆាំងរយៈពេល២០ឆ្នាំរបស់លោកពុំមានលទ្ធផលហេតុនេះហើយបានជានាំឲ្យមានការចុះចូលនោះ។
ការចុះចូលនេះទៀតសោតក៏បានធ្វើឡើងនៅក្រោយ លោក កឹម សុខុន ដែលជាប្អូនប្រុសរបស់លោក កឹម សុខា មេដឹកនាំបក្ស និងលោក ចាន់ វ៉ែន ដែលជាមន្រ្តីកំពូលរបស់គណបក្សសិទ្ធិមនុស្សម្នាក់ទៀតបានចូលរួមជាមួយគណបក្សប្រជាជនកាលពីជាងមួយខែមុន។
ជាមួយគ្នានេះ លោក គាត សុគន្ធ អនុប្រធានគណបក្សសិទ្ធិមនុស្សមួយរូបទៀតបញ្ជាក់អំពីជំហររបស់លោកយ៉ាងដូច្នេះ ៖ «បើសិនណាជាខ្ញុំចេញពីគណបក្សនយោបាយ គឺខ្ញុំឈប់ធ្វើនយោបាយហើយ បើចេញពីគណបក្សសិទ្ធិមនុស្ស»។
ការរត់ចេញរបស់អ្នកនយោបាយគណបក្សផ្សេងចូលរួមជាមួយនឹងគណបក្សប្រជាជនកម្ពុជាបានកើតឡើងមុនគេទៅលើគណបក្សហ៊្វុនស៊ិនប៉ិចរហូតដល់ធ្វើឲ្យគណបក្សនេះស្ទើររកសំឡេងគាំទ្រមិនបាន។
ក្រោយមកទៀតនៅមុនពេលបោះឆ្នោតម្ដងៗ គេឃើញមន្ត្រីគណបក្សប្រឆាំងសមរង្ស៊ីក៏ចាប់ផ្តើមចូលទៅគណបក្សប្រជាជនដែរ ឥឡូវនេះដល់វេនគណបក្សសិទ្ធិមនុស្សនេះម្ដងដែលគណបក្សនេះទើបនឹងបានសំឡេងគាំទ្រចំនួន៣អាសនៈនៅក្នុងរដ្ឋសភានាអាណត្តិថ្មីនេះ។
ជាទូទៅរាល់លើកនៃការចាកចេញរបស់មន្ត្រីក្រុមអ្នកប្រឆាំងគេបាននាំគ្នាបកអាក្រាតគណបក្សរបស់ខ្លួនដែលធ្លាប់ធ្វើការជាមួយ ហើយបានសរសើរគណបក្សប្រជាជនកម្ពុជា។ ប៉ុន្តែអ្នកដែលកំពុងបន្តការងារក្នុងបក្សជំទាស់វិញបានចោទថា ក្រុមអ្នកចុះចូលជាមួយគណបក្សប្រជាជនធ្វើឡើងដើម្បីអំណាចផ្ទាល់ខ្លួនប៉ុណ្ណោះ។
អតីតប្រធានមជ្ឈមណ្ឌលអភិវឌ្ឍន៍សង្គមនិងជាអ្នកវិភាគឯករាជ្យនាពេលបច្ចុប្បន្ន អ្នកស្រី ជា វណ្ណាត បានអត្ថាធិប្បាយថាចលនាអ្នកប្រឆាំងអាចនឹងចុះខ្សោយ បើសិនជាមន្រ្តីជាន់ខ្ពស់នៃក្រុមអ្នកប្រឆាំងចេះតែបន្តធ្វើរបៀបនេះ៕