ប្រសាសន៍បញ្ជាក់របស់លោកឧបនាយករដ្ឋមន្ត្រី ហោ ណាំហុង ដែលជារដ្ឋមន្ត្រីក្រសួងការបរទេសបានធ្វើឡើងនៅក្នុងសន្និសីទមួយជាមួយអ្នកកាសែតនៅឯក្រសួងការបរទេស នាព្រឹកថ្ងៃសុក្រ ទី២៧ មិថុនា ។
លោកឧបនាយករដ្ឋមន្ត្រី ហោ ណាំហុង បានមានប្រសាសន៍ថា ៖ «បើតុលាការខ្មែរកាត់ អាចអ្នកខ្លះគេថា តុលាការខ្មែរមិនយុត្តិធម៌ ក៏ប៉ុន្តែចាំមើលតុលាការបារាំងកាត់វិញយ៉ាងម៉េច តើគេថាម៉េច ?» ។
ប្រធានគណបក្សប្រឆាំង លោក សម រង្ស៊ី បានសម្ដែងការសប្បាយចិត្តដែលករណីបណ្ដឹងនោះ ត្រូវបានដាក់ទៅតុលាការប្រទេសបារាំង ដែលលោកបានអះអាងថាមានឯករាជភាពជាងតុលាការក្នុងប្រទេសកម្ពុជា ។ លោកក៏បានមានប្រសាសន៍ថា ដំណើរការនៃការតទល់គ្នាក្នុងពាក្យបណ្ដឹងនោះនឹងចាប់ផ្ដើមនៅឆ្នាំក្រោយ ។
លោក សម រង្ស៊ី បានឲ្យដឹងថា ៖ «ប្រទេសបារាំងតុលាការគេឯករាជ្យ តុលាការគេមិនមែនស្ដាប់បញ្ជាគណបក្សកាន់អំណាចផ្ដាច់ការដូចនៅប្រទេសកម្ពុជាទេ ។ ខ្ញុំសប្បាយចិត្តណាស់បានទៅលាតត្រដាងការពិត មានភស្តុតាង មានសាក្សីបង្ហាញអំពីតួនាទីកាលពីរបបខ្មែរក្រហមបានធ្វើអីខ្លះ ? ខ្ញុំរង់ចាំតែពេលហ្នឹងហើយតើ ខ្ញុំសប្បាយចិត្តណាស់មានឱកាសទៅតទល់គ្នានៅតុលាការបារាំង មានតែតុលាការខ្មែរទេដែលយើងមិនអាចធ្វើអីបានទេ ចំពោះអ្នកកាន់អំណាចសព្វថ្ងៃនេះ» ។
ទន្ទឹមគ្នានោះដែរ លោកឧបនាយករដ្ឋមន្ត្រី ហោ ណាំហុង ក៏បានប្រកាសថា លោកនឹងដកពាក្យបណ្ដឹងចោទប្រកាន់បេក្ខជនតំណាងរាស្ត្រគណបក្សសមរង្ស៊ីប្រចាំមណ្ឌលភ្នំពេញគឺលោក ដាំ សិទ្ធិ ដែលជានិពន្ធនាយកកាសែត មនសិការខ្មែរ ពីតុលាការក្រុងភ្នំពេញហើយ ។ លោក ដាំ សិទ្ធិ មិនបានមានប្រតិកម្មអ្វីចំពោះការដកពាក្យបណ្ដឹងនោះទេ ។
លោកឧបនាយករដ្ឋមន្ត្រី ហោ ណាំហុង ដែលជារដ្ឋមន្ត្រីក្រសួងការបរទេសបានប្ដឹងចោទប្រកាន់ លោក ដាំ សិទ្ធិ ដែលជាបេក្ខជនតំណាងរាស្ត្រមណ្ឌលភ្នំពេញរបស់គណបក្សសមរង្ស៊ី និងជានិពន្ធនាយកកាសែតមនសិការខ្មែរ ព្រមទាំងប្រធានគណបក្សប្រឆាំង លោក សម រង្ស៊ី ថាបានបរិហារកេរ្តិ៍លោកនិងផ្សាយព័ត៌មានមិនពិត បន្ទាប់ពីលោក សម រង្ស៊ី បានធ្វើសេចក្ដីថ្លែងជាសាធារណៈមួយកាលពីថ្ងៃទី១៧ មេសា ឆ្នាំ២០០៨ កន្លងទៅនេះ នៅឯវាលពិឃាដបឹងជើងឯក ដោយថា លោក ហោ ណាំហុង គឺជាអតីតមេគុកបឹងត្របែកក្នុងរបបខ្មែរក្រហម ហើយសម្ដីនេះត្រូវបានលោក ដាំ សិទ្ធិ ដកស្រង់យកទៅផ្សាយក្នុងកាសែតរបស់លោកគឺកាសែតមនសិការខ្មែរ ។
គួរជម្រាបថាលោក ដាំ សិទ្ធិ ត្រូវបានតុលាការក្រុងភ្នំពេញដោះលែងឲ្យនៅក្រៅឃុំបណ្ដោះអាសន្ន កាលពីថ្ងៃទី១៥ មិថុនា បន្ទាប់ពីមានអន្តរាគមន៍ពីលោកនាយករដ្ឋមន្ត្រី ហ៊ុន សែន ។
សហគមន៍អន្តរជាតិធ្លាប់បានសម្ដែងការព្រួយបារម្ភថា ពាក្យបណ្ដឹងរបស់លោក ហោ ណាំហុង ទៅលើលោក សម រង្ស៊ី និងលោក ដាំ សិទ្ធិ នឹងមានឥទ្ធិពលមិនល្អទៅលើដំណើរការនៃការបោះឆ្នោតសកល ខែកក្កដា ឆ្នាំ២០០៨នេះ ៕