ហ៊ុន សែន នឹងចុះចេញពីតំណែងដោយសន្តិវិធីបើបក្សប្រជាជនចាញ់
ដោយ មណ្ឌលកែវ
2008-06-23
៣ថ្ងៃមុនយុទ្ធនាការឃោសនាបោះឆ្នោត លោកនាយករដ្ឋមន្រ្តី ហ៊ុន សែន បានប្រកាសនៅឯខេត្តពោធិ៍សាត់ថា លោកនឹងចុះចេញពីតំណែងព្រមទាំងធ្វើពិធីប្រគល់និងផ្ទេរត្រាជូនរដ្ឋមន្រ្តីថ្មីនៃគណបក្សដែលឈ្នះឆ្នោតដោយសន្តិវិធី ប្រសិនបើគណបក្សប្រជាជនចាញ់ឆ្នោត នៅថ្ងៃទី២៧ កក្កដា ឆ្នាំ២០០៨ ខាងមុខនេះ ។
នាយករដ្ឋមន្ត្រីខ្មែរ លោក ហ៊ុន សែន ។
លោកនាយករដ្ឋមន្រ្តី ហ៊ុន សែន បានប្រកាសយ៉ាងដូច្នេះនៅឯវិធីសម្ពោធមជ្ឈមណ្ឌលអភិវឌ្ឍន៍ ប៊ុន រ៉ានី ហ៊ុន សែន ស្ពានថ្មសំពៅមាស និងផ្សារពោធិ៍សាត់ កាលពីព្រឹកថ្ងៃទី២២ មិថុនា ក្នុងទីរួមខេត្តពោធិ៍សាត់ ។
លោកនាយករដ្ឋមន្រ្តីបានមានប្រសាសន៍ថា ៖ «អ្នកឯងឈ្នះ អ្នកឯងយកទាំងអស់ចុះ ខ្ញុំដើរចេញ អាហ្នឹងអ៊ីចឹងតែម្ដង ហើយយើងទាំងអស់គ្នា ត្រៀមដើរចេញតែម្ដង ត្រៀមដើរចេញ ។ អត់ទេ ហ៊្វុនស៊ិចប៉ិច ខ្ញុំមិនថាទេ ហ៊្វុនស៊ិនប៉ិចចង់ទៅរួមជាមួយអ្នកណាដទៃទៀត ទៅចុះ ព្រោះអានេះសិទ្ធិរបស់ហ៊្វុនស៊ិនប៉ិច តែមន្រ្តីគណបក្សប្រជាជនទាំងអស់ត្រៀមដើរចេញ ។ ហើយយើងត្រៀមប្រកាសទទួលស្គាល់លទ្ធផលនៃការបោះឆ្នោតយើងទៀត ។ កាតព្វកិច្ចដែលនៅសេសសល់របស់ខ្ញុំព្រះករុណាខ្ញុំ និងថ្នាក់ដឹកនាំដទៃទៀត គឺរៀបចំរក្សាស្ថិរភាពឲ្យបានល្អ និងផ្ទេរអំណាចដោយសន្តិវិធីទៅឲ្យបក្សដែលឈ្នះឆ្នោត ព្រោះមិនមែនឈ្នះថ្ងៃហ្នឹង ស្អែកឡើងចូលគណៈរដ្ឋមន្រ្តី មិនអាចធ្វើទៅរួចទេ ។ សភាប្រជុំយ៉ាងយូរជិត៦០ថ្ងៃ ក្រោយការបោះឆ្នោត អ៊ីចឹងអាចថា៤០ថ្ងៃ បន្ទាប់ពីការបោះឆ្នោត ៤០ ឬ ៣៥ថ្ងៃ សភាប្រជុំ ប្រជុំហើយ បង្កើតរាជរដ្ឋាភិបាល បង្កើតរាជរដ្ឋាភិបាលហើយ ទើបស្បថចូលកាន់តំណែង ទើបរាជរដ្ឋាភិបាលចាស់អស់សុពលភាព ។ ហើយពេលនោះខ្ញុំព្រះករុណាខ្ញុំនឹងទៅកាន់ទីស្ដីការគណៈរដ្ឋមន្រ្តី ចុះហត្ថលេខាប្រគល់ ហើយបញ្ជាឲ្យរដ្ឋមន្រ្តីនានាក្នុងរាជរដ្ឋាភិបាល ធ្វើពិធីប្រគល់ត្រានិងអ្វីៗទាំងឡាយជូនរដ្ឋមន្រ្តីដែលឈ្នះឆ្នោតថ្មី» ។
ថ្លែងក្នុងឱកាសនេះដែរលោកនាយករដ្ឋមន្រ្តីក៏បានបញ្ជាក់ជាថ្មីទៀត អំពីជំហររបស់គណបក្សប្រជាជនកម្ពុជា ចំពោះសម្ព័ន្ធភាពតែមួយគត់ក្នុងរដ្ឋាភិបាលដែលបង្កើតឡើងដោយគណបក្សប្រជាជនកម្ពុជា ក្នុងករណីដែលគណបក្សនេះឈ្នះឆ្នោត គឺគណបក្សហ៊្វុនស៊ិនប៉ិច បើទោះបីជាគណបក្សនេះទទួលបានប៉ុន្មានអាសនៈក្នុងសភាក៏ដោយចុះ ។
លោកនាយករដ្ឋមន្រ្តីបានមានប្រសាសន៍ថា ៖ «ហើយបើគណបក្សហ៊្វុនស៊ិនប៉ិចមានកៅអី គឺគណបក្សប្រជាជនធ្វើតែជាមួយនឹងហ៊្វុនស៊ិនប៉ិចតែប៉ុណ្ណោះ» ។
លោកនាយករដ្ឋមន្រ្តីក៏បានធ្វើការអំពាវនាវចំពោះសមាជិកគណបក្សប្រជាជនកម្ពុជាគ្រប់លំដាប់ថ្នាក់ ឲ្យមានការអត់ធ្មត់ដល់កម្រិតខ្ពស់បំផុត ប្រសិនបើមានការឃោសនាវាយប្រហារពីគណបក្សដទៃមកលើគណបក្សប្រជាជនកម្ពុជានោះ ។
ក្នុងឱកាសនេះដែរលោកនាយករដ្ឋមន្រ្តីក៏បានមានប្រសាសន៍ថា នេះជាថ្ងៃចុងក្រោយដែលបន្ទាប់ពីថ្ងៃនេះទៅ គឺលោកនឹងមិនមានប្រសាសន៍ឬធ្វើសេចក្ដីថ្លែងការណ៍ណាមួយទៀតឡើយ ។
ប្រធានផ្នែកអង្កេតអង្គការខុមហ្រ្វែល គឺលោក ម៉ា សុផល មានប្រសាសន៍ថាពុំមានច្បាប់ណាមួយហាមឃាត់នោះទេ តែនេះជាទម្លាប់ដែលលោកនាយករដ្ឋមន្រ្តីតែងតែធ្វើនៅរៀងរាល់ពេលយុទ្ធនាការឃោសនាបោះឆ្នោតម្ដងៗប៉ុណ្ណោះ ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
នាយករដ្ឋមន្ត្រីថៃប្រឈមមុខនឹងការទាមទារឲ្យចុះចេញពីតំណែង
នាយករដ្ឋមន្ត្រីថៃនឹងមិនលាលែងពីតំណែងតាមការទាមទាររបស់ក្រុមអ្នកតវ៉ា
ស្ថានការណ៍នយោបាយនៅប្រទេសថៃកាន់តែតានតឹង
ភាពតានតឹងផ្នែកនយោបាយនៅប្រទេសថៃឈានដល់សភាពធ្ងន់ធ្ងរ
បក្សប្រឆាំង៖ ការបញ្ចប់ថ្ងៃតវ៉ាពីការបោះឆ្នោតជាការបង្ហាញនូវភាពអយុត្តិធម៌
បក្សសមរង្ស៊ីនិងបក្សសិទ្ធិមនុស្សសរសេរលិខិតទៅប្រធានាធិបតីឥណ្ឌូណេស៊ី
ចលនាខ្មែរម្ចាស់ស្រុកនឹងធ្វើសន្និបាតលើកទី២នៅថ្ងៃ៣០ សីហា នៅអាមេរិក
គណៈកម្មការជំនាញទាំង៩របស់រដ្ឋសភាថ្មីនឹងត្រូវកាន់កាប់ដោយបក្សប្រជាជន
សម រង្ស៊ី ចោទថា រដ្ឋាភិបាលហ៊ុន សែន មិនគោរពច្បាប់, ជាម យៀប បដិសេធ
ព្រះរាជតម្រិះរបស់អតីតព្រះមហាក្សត្រជុំវិញបញ្ហារាជវង្សានុវង្សនិងនយោបាយ
